512-ə hissə-Kəhfi surə-67-73 şərifə ayəon

512-ə hissə

قَالَ إِنَّكَ لَن تَسْتَطِيعَ مَعِيَ صَبْراً (67) 

(Xızri)Voteşe: tı hiçfaxti bə demı bə ico bıey səbr kardey əzıniş.

وَكَيْفَ تَصْبِرُ عَلَى مَا لَمْ تُحِطْ بِهِ خُبْراً (68)

Qıləy çi komil nızınə holədə çokonə tı bəy tov bəvaş?

Navnə proqramədə votemone ki,həzrəte Mosə(ə) bo ilahi elmon və ğeybiyə koon ğəbul kardey xoto,de Xızr(ə) mıloğat kardey iyən çəy elmi xəzinəku bəhrə bardey tələbədə be. liza boəy pəydu kardeyro,çəy dumo nəve ta inki,oxoyədə çandə macəra bəpeştə əvış pəydu karde.ın ayəon hamyedə:həmonə sıftədə həzrəte Xızr(ə) bə həzrəte Mosə(ə)-i voteşe:çımı koon joqoe ki,tı bəy tov vardey iyən bəy səbr kardey əzıniş.harçənd bəştə nıznə çi səbr kardey vey saxt iyən muşkile.

Çın ayəonku umutedəmon:

1-muəllim bəbe ıştə şagirdon zərfiyyətiku xəbəş bıbu və ehanə lozım bıvindo,joqo çə elmi muşkilaton bəy bəyonkəy ki,ta bo deəy bə ico bıey hozzıətiş bıbu.peşonə ayəonədə bəvindemon ki,hətta həzrəte Mosə(ə) həm bə Xızr(ə)-i koon tov vardeyış nızıne.

2-çı ziyodə kin-kudurət və daveon mənşə,çı fərdon iyənde fik və hədəfonku məlumat nıbeye.

قَالَ سَتَجِدُنِي إِن شَاء اللَّهُ صَابِراً وَلَا أَعْصِي لَكَ أَمْراً (69) 

(Mosə)Voteşe: inşaallah mıni çı səbr kardə kəsonku bəvindeş və qırd koonədə bətı pebəmandım.

قَالَ فَإِنِ اتَّبَعْتَنِي فَلَا تَسْأَلْنِي عَن شَيْءٍ حَتَّى أُحْدِثَ لَكَ مِنْهُ ذِكْراً (70) 

(Xızri)Voteşe: çən,ehanə tı dumo mı omiş, tainki, az bətı qıləy çi nıvote, çımıku hiççi xəbə məstən.

Ha holədə həzrəte Mosə(ə) de Xızr(ə)-i bə ico bıey xoto ıştə hozzı beyış elan karde. Mosə(ə) ğəbulış karde ki,nəinki,etıroz nibəkay,bəlkəm hiç qıləy sıxan həm nıvoti iyən hiççi xəbə nıstəni.fəğət bıvindo,bıməso iyən bə Xızr(ə)-i əmron pemando.

Çın ayəonku umutedəmon:

1-ehanə bə cokəson sıxan doydəmon ki,qıləy ko əncom bədomon,”inşaallah” votey çı yodo beməkəmon iyən ilahi piye ıştə yodədə oqətəmon.

2-ilahi məsumvə pokə ovliyaon mığobilədə muti bıbəmon və ehanə qıləy çi hikməti nıdərəsimon,etıroz məkəmon.

فَانطَلَقَا حَتَّى إِذَا رَكِبَا فِي السَّفِينَةِ خَرَقَهَا قَالَ أَخَرَقْتَهَا لِتُغْرِقَ أَهْلَهَا لَقَدْ جِئْتَ شَيْئاً إِمْراً (71) 

Çən, ə dıqlə(bəico) bə ro dəqınin taninki, bə kəşti suvar bin(Xızri) əvış hıl karde. Mosə (de etıroz iyən təəccıbi) voteşe:ayə əvı hıl karde ki,çəy sərnişinon ğərğ bıbon. bərosti tı qıləy norəvoə ko əncom doe.

قَالَ أَلَمْ أَقُلْ إِنَّكَ لَن تَسْتَطِيعَ مَعِيَ صَبْراً (72) 

Xızri voteşe:ayə mı bətı nıvoteme tı hiç faxti demı bə ico bıey tov vardey əzıniş.

قَالَ لَا تُؤَاخِذْنِي بِمَا نَسِيتُ وَلَا تُرْهِقْنِي مِنْ أَمْرِي عُسْراً (73) 

(Mosə)Voteşe: mıni bəçımı yodo bekardey xoto tənbih məkə və çımı koyədə bəçımı ələyh ciddi(ğəddor) məbi.

Çoko ki, çın ayəon iyən peşonə omə ayəonku sərəse bedə,həzrəte Xızri(ə) bə Mosə(ə)-i təlim doə çi nəzəri iyən kəlomiyə surətədə nıbe,bəlkəm inov elmiyə təlimon be ki,mıxtəlifə muhit və şərayitonədə bıə.təbiiye həzrəte Mosə(ə) ki,çı Xızr(ə)-i sırronku xəbəş nıbe,kardey nıəzni çəy ğeyri-adi iyən əcib-ğəribə koon vindeyədə tam bıjəno.harçənd əv çımi bənav sıxanış doəbe ki,hiç qıləy etıroz nıkəy və hətta qıləy sıvol həm nıkəy.

Iminə macəra bə zəmon be ki,əvon bə qıləy kəşti suvar bin və həzrəte Xızr(ə) hiç qıləy dəlil nıbə holədə binoş karde bo kəşti hıl kardey.qıləy ko ki,bə bə kəşti soybi zərəlo-ziyoni iyən bə kəştiyədə bıə kəson ğərğ bıey boyis əbi.ım ko(zohirədə) həm bə şəryəti ğanunon əks be və həm bə ağli zidd be.çımisə əlovə ım kəştiyədə bıə kəson coni həm bə xətər eğandedəbe.həzrəte Mosə(ə) çəş kardedə nıbe ki,hətta qıləy addiyə inson həm jıqo ko bıkəy,ısət vindeşe ki,çəy Xıdo tərəfiku ilahi mellimi  unvanədə ğəbul kardə şəxs,jıqo qıləy əcibə ko əncom doydə.əve ıştə doə sıxanış çı yodo bekarde və dılış hestebe nəhy əz munkər bıkəy.

Əmmo həzrəte Xızr(ə)-i cəvob ım be ki,tı ğərol be tam bıjənoş və hiççi nıvotış. həzrəte Mosə(ə) ıştə votə sıxaniku peşmon be və voteşe ki,Xızr(ə) çəy xətoku dəvardo iyən əy rədd nıkəy.

Çın ayəonku umutedəmon:

1-əgər çı ilahi pokə ovliyaon elm iyən hikmətımon ğəbul karde və harçənd çəy hərəkəton bo əmə əcib həm bıbu,etıroz məkəmon ta çəy faxtədə əv ruşin bıbu ya ıştən əy izohkəy.

2-xilofə ko mığobilədə tam jıey,cayiz ni.çən,həzrəte Mosə(ə) de kəşti hıl kardey mıxolifətış sərost be.fəğət çəy ayb ım be ki,həzrəte Mosə(ə) bə həzrəte Xızr(ə)-i doə sıxani əks beşe.