518-ə hissə-Kəhfi surə-102-106 şərifə ayəon

518-ə hissə

أَفَحَسِبَ الَّذِينَ كَفَرُوا أَن يَتَّخِذُوا عِبَادِي مِن دُونِي أَوْلِيَاء إِنَّا أَعْتَدْنَا جَهَنَّمَ لِلْكَافِرِينَ نُزُلاً (102) 

Ayə kofir bıə kəson çımı bandəon çımı əvəzi boştə hami(yol) vıjniyey fikədən? Hukmən əmə cəhəndımımon bo kofiron ğəbul kardeyro hozzı kardəmone.

Dəvardə proqramə oxoyədə bə kofiron iyən cəhəndımi əhli xısusiyyəton işorə kardedəbe. ın ayə çə bəhsi dəvomədə hamyedə:ayə həxı puşniyə kəson iyən bo əy məsey və vindey hozzı nıbə kəson,qımon kardedən ehanə çı Xıdo əvəzi bə Xıdo bandəon pənoh bobən,əvoni bə baxtəvərəti bərosnen iyən çəvon problemon həll bəkayn?

Əvon de kom məntığ iyən dəlilon Xıdoşon vadoə iyən çı Xıdo ofəyə məxloği boştə sıtoyiş kardeyro vıjniyəşone? Qıləy ruj bome ki,əvon anəndə bə ruji həsrət bəban və bəvindeyn ki, həmonə ruji sovə Xıdo hiçki boçəvon dardi dəvo kardey zıneydəni.

Çın ayəku umutedəmon:

1-kofiron bo Xıdo iyən ğıyoməti ruji inkor kardey xoto hiç qıləy dırıstə dəlilışon ni və əvon bəştə zənn iyən qımoni əsos jıqo roşon vıjniyə.

2-kufr fəğəd Xıdo bə həşə jıey ni,ğərəz Xıdo cokəson viloyət və yolyəti ğəbul kardey həm kufre. zira sovə əy hiçki çəy palu ğərol doey nibəbe.

قُلْ هَلْ نُنَبِّئُكُمْ بِالْأَخْسَرِينَ أَعْمَالاً (103) 

Vuji:ayə bəşmə çı məxloği həmməysə vey ziyonkorə qılə xəbə bıdəm?

الَّذِينَ ضَلَّ سَعْيُهُمْ فِي الْحَيَاةِ الدُّنْيَا وَهُمْ يَحْسَبُونَ أَنَّهُمْ يُحْسِنُونَ صُنْعاً (104) 

Əvon ki, dınyo jimonədə çəvon zəhmət məhv bəbe(bə hədər bəşe).qıləy holədə ki,fik kardedən çok iyən loyığinə ko əncom doydən.

In ayəon bə ə şəxson işorə kardedə ki,bəştə xomə xiyoli əsos fik kardedən,çəvon dınyoədə bıə koon çok iyən loyığinə koonin.ısət çı əhli-kitob bıbu ki,bə bidət iyən xorafaton giriftor bıən,ya çı mısılmınon bıbu çı həxə royku mınhərif bıən iyən çı no əhlon viloyət və yolyətişon ğəbul kardə.

Insoni təhdid kardə xətəronku qıləyni ıme ki,əvon ıştə koon çok vindedən və xiyol kardedən ki, əvon oxoyədə nicot pəydu bəkayn və bə baxtəvərəti bərəseyn.əmmo çoko ki, pardəon bə kəno bışon,mıəyyən bəbe ki,əvon bə ğəflət iyən məğrurəti dıço bıən və çəvon qırd zəhməton bə bod şıə.ruşine ki,jıqo fərdon bə qıləy yolə xəsorət və ziyoni giriftor bıən. zira əvon həm çı dınyo iyən çəy ləzzətonku mandən və həmən axırəti dınyoədə çı vəhışti nemətonku məhrum bəmandeyn.

In ayəon insoni çı həyğətonku ğəflətədə bıey iyən bemənoə zənni xətəronku aqah kardedə iyən bəy xəbərdorəti doydə ki,bə puçə xomə xiyolon giriftor nıbon və bə ağl iyən vəhyi təkyə nıkardə holədə hiç qıləy ko əncom nıdəyn.

Çın ayəonku umutedəmon:

1-ziyodə ko və cəhd,insoni nicot nibədoe.muhim səhihə koon zıney iyən çokə koon əncom doeyro ilahi hədəfon çok-çoki zıneye.

2-realist bıbəmon iyən həyğəton bıvindəmon,nəinki,xiyolkəmon və sırf bəştə muhosibəon təkyə məkəmon.zira mumkine çəmə mıhosibəon de həyğəton mıtobiğ nıbu.

أُولَئِكَ الَّذِينَ كَفَرُوا بِآيَاتِ رَبِّهِمْ وَلِقَائِهِ فَحَبِطَتْ أَعْمَالُهُمْ فَلَا نُقِيمُ لَهُمْ يَوْمَ الْقِيَامَةِ وَزْناً (105) 

Əvon ə şəxsonin ki, bəştə pərvərdıqori ayəon iyən de əy bıə vindemoni kufr(inkor) kardedən.çən,çəvon əməlon məhv be.çən, əmə ğıyomətədə bo əvon qıləy mizon(tavzo) bərpo nibəkamon.(çun çəvon koon hiç qıləy ğeymətışon ni).

ذَلِكَ جَزَاؤُهُمْ جَهَنَّمُ بِمَا كَفَرُوا وَاتَّخَذُوا آيَاتِي وَرُسُلِي هُزُواً (106) 

Çəvon ım cəhəndımədə bıə cəzo,bəçəy xotoe ki,əvon kofir bin iyən bə çımı ayəon iyən vığandə(peyğombəron) məsxərə kardedəbin.

In ayəon ıştə əməl ya əğıdə və ya har deynəniyədə de problemon dim bə dim omə şəxson oxo, cəhəndım zıneydən.zira joqo fərdon  koon harçənd çəvon palu çok iyən bə xoş omeydə, əmmo ğıyoməti ruji çəvon ilahi dəstqohədə hiç qıləy erjo-ğeymətışon nibəbe. liza boçəvon əməlon pamuero bə mizon iyən tavzo ehtiyoc nibəbe. çı çokə əməli puç bıey qıləy təhlukəonkue ki,çokə ko soybon təhdid kardedə. həxı inkor kardey çı əməlon botıl bıey amilonku qıləyniye.məsələn qıləy koəvon ki, i umr bəştə mudiri xıdmət kardedə iyən çəy əmron çok-çoki bə vırə rosneydə, əmmo oxoyədə de dıjmon və norəvoə sıxani vositə ıştə mudiriku co bedə. çəy həmınə ım yavə rəftor çəy çandə sornə koon bə puç bekardedə iyən bo əy hiççi baği oqəteydəni.

Çın ayəonku umutedəmon:

1-bə koon zohiri diyə məkəmon ki,mumkine qahi faxti çəmə çəşədə dljd iyən ğəşənq bə çəş bıçiy.mumkine həmonə koon çı dıləku pıxən və hiç qıləy ğeymətışon ni. bənə dıləş təyli bıə qıləy təbil iyən dəfi ki,çəy sədo bılınde iyən odəmi quşi kor kardedə.

2-bə Xıdo kofir bıey iyən bə ilahi ayəon və bə peyğombəron məsxərə kardey oxo, çı qırd çokə koon çı miyoniku şıeye.insoni tale de çəy koy oxo anqıle.