520-ə hissə-Məryəmi surə-1-5 şərifə ayəon

520-ə hissə

De Kəhfi mıborəkə surə bə oxo rəsey,ımruj əmə Məryəmi mıborəkə surə bino kardedəmon ki, çı Kərimə-Ğıroni nonzəminə surəy və Məkkədə nozil bıə.bın surədə çı həzrəte Zəkəriyya sərquzəştiku ibaxş,həzrəte Məryəmi,həzrəte İsa və həmçinin həzrəte Yəhya,İbreyim,İsmayil iyən İdris (ə)-i macəraonku zikr bıə.

Odəmi dığğəti bəştə cəlb kardə çi ıme ki,sovə həzrəte Məryəmi Kərimə-Ğıronə co hiç qıləy jeni nom oməni və fəğət həzrəte Məryəme ki,deçəy nomi Ğıronədə qıləy surə omə və əv həm həmınə Məryəmi surəy.ısətən bə ın mıborəkə surə i tosə seminə ayə dığğət kardedəmon:

بسم الله الرحمن الرحيم

كهيعص (1) 

Kaf, ha, ya, eyn, sad.

ذِكْرُ رَحْمَةِ رَبِّكَ عَبْدَهُ زَكَرِيَّا (2) 

(Bın surədə)Iştı pərvərdıqori lutfiku bəştə bandə Zəkəriyya nisbətədə zikr kardey(bə miyon omə).

إِذْ نَادَى رَبَّهُ نِدَاء خَفِيّاً (3) 

Qıləy zəmon ki, ıştə pərvərdıqorış de qıləy ahəstə sədo vanqış je.

Im surə bənə Ğıroni co 28-qılə surə de Muğəttə hərfon bino bedə.çoko ki,navko həm ğeydımon karde ım hərfon ki,Ğıroni çoədə i hissədə omə,rəmz iyən parolonkue ki, hənuz bo bəşəri kəşf bıəni.umu heste axırız-zəmonədə İmom Məhdi(ə) zuhuri zəmonədə çım hərfon sırron oşko bəbe.

Həzrəte Zəkəriyya çı (həzrəte Mosə(ə)-i bo) Harun(ə) –i fərzəndonkue.Zəkəriyya ıştən çı Bəni-İsrayili ənbiyaonku be iyən çəy nom haft kərə Kərimə-Ğıronədə zikr bıə.

Xıdovənde-Aləm Ğıronədə kali peyğombər iyən ğovmon sərquzəşton bəyon kardedə ta ıştə mehr iyən ğəzəbi bə çok iyən yavə insonon nışon bıdəy iyən bo vəomə milləti qıləy ibrət bıbu.ın ayəon çı Xıdovəndi bə Zəkəriyya(ə)-i bıə lutf iyən inoyəti zikr kardedə ki,əv çı məxloği çəşiku bə diyəro,Xıdovənde-Aləmiku tələbış karde ki,bəy qıləy fərzənd ətokəy.ğasbu çım dıvo məxfi bıey sırr ım bıə ki,məxloğ bəy məsxərə nıkəyn və nıvotin ki,ım səy muş sipyi bıə piyə merd ıştə umru oxoyədə Xıdokuş fərzənd piyedə.

Həlbəttə bə rəvoyəton əsos,vey çokə dıvo həmonə asta-astə iyən ıştə dılədə dıvo kardeye, nəinki, de bılındə sədo iyən oşkoə holətədə.

Çın ayəonku umutedəmon:

1-Xıdo ovliyaon nomi zikr kardey,qıləy erje ki,Xıdovəndi əvış Kərimə-Ğıronədə bəmə umutəşe.

2-ıştə jimonədə dıvo çı yodo beməkəmon ki,ım ilahi lutf iyən rəhməti ğəbul kardey zəminəy.

قَالَ رَبِّ إِنِّي وَهَنَ الْعَظْمُ مِنِّي وَاشْتَعَلَ الرَّأْسُ شَيْباً وَلَمْ أَكُن بِدُعَائِكَ رَبِّ شَقِيّاً (4) 

Zəkəriyya voteşe: Xıdolimha! Həyğətən,çımı astə sıst(lır) bıə iyən çımı səy mu bə piyəmerdəti xoto,sipyi bıə.Xıdolima! mı hiçfaxti tıni vanq jıeyədə(çəy icobətiku)məhrum bıənim.

وَإِنِّي خِفْتُ الْمَوَالِيَ مِن وَرَائِي وَكَانَتِ امْرَأَتِي عَاقِراً فَهَبْ لِي مِن لَّدُنكَ وَلِيّاً (5) 

Və həyğətən, az ıştə mardey bədiqə ıştə nezə odəmon iyən ıştə besonə jeniku tarsedəm. çən, ıştə tərəfiku bəmı qıləy canişin (fərzənd)ətokə.

Bə rəvoyəton əsos  həzrəte Zəkəriyya(ə) bəştə piyəmerdəti faxti rəsəbe,əmmo hırdəni soyb bıə nıbe iyən norohət be ki,çəy ğovmiku kali şəxson ki,səlohiyyət iyən ləyoğətış nıbe,ıştəni çəy canişınış elan kardey piyedə be.liza ıştə dıvoədə Xıdovənde-Aləmiku təlıbış karde ki,bəy qıləy salehə fərzənd ətokəy və əv çəy canişin bıbu və çəy bədiqə çəy şıə roy dəvom bıdəy.əmmo joqo çiyedə be ki,jıqo qıləy dıvo ğəbul bıənin nıbe.zira həm Zəkəriyya və həmən çəy jimoni həmro har deynən bəştə piy bıə faxti rəsəbin iyən təbiiyə surətədə çəvon fərzənd soybi bıey imkonış nıbe.

Əmmo çı Xıdovəndi dast bastə bıəni.əv ki,hestemoni aləmış ofəyə iyən çəy ğanunış noə, həmçinin bə ın ğanunon hakime iyən havırədə bıpyişe,bəştə hikmət və məsləhəti əsos həmonə ğanuni ləğv kardey zıneydə.çoko ki,otəş bo İbreyim(ə)-i sard be iyən ıştə sutuney ğabiliyyətış çı dast doe.

Umumən imoninə inson fizika iyən kimya ğanunon ğəbul kardedə iyən əvoni zıney və oko doey fikədəy.əmmo Xıdovəndi ğudrəti çı təbyəti fovğ və pentono zıneydə iyən ıştəni və ıştə tələbon çı maddi ğanunon çərçivədə məhdud kardedəni.

Bədiihiye de təbiiyə şikili bəy rəse imkonış nıbə iyən bə bəpe bıə tələbon rəsey ro vey çokə qılə dıvo kardeye.həlbəttə xəyə dıvo ki,bə fərd iyən camiyə ruşd iyən ozavziye boyis bıbu.nəinki,be məno iyən hədərə və bə həvaye-nəfsi əsos bıə tələbon. muhimmə nuktə ıme ki,qıləy şəxs ıştə həddədə səyo-cəhdkəy, nəinki, qımonkəy çəy dıvo çəy cəhdo-təloşi vırə qəteydə.

Əmmo bəbe dığğətkəy ki,dıvo isticobət və ğəbul bıey,de ilahi hikməti anqıle və mumkine əmə deştə cəhd iyən dıvo ijən bəştə tələbon nırəsəmon.liza Xıdo bəştə ğarzıxo məzınəmon,bəlkəm bəbe bovəkəy ki,Xıdo qıləy çiyon zıneydə ki,əmə zıneydənimon və mumkine Xıdo məsləhətış zınəni çəmə həmonə dıvo ğəbulkəy.

Çın ayəonku umutedəmon:

1-mominə bandəon hejo bə ilahi rəhməti umudəvon.boçi ki,ilahi rəhmətiku məyus bıey bə bədbəxtəti boyis bedə.

2-Xıdovənd insoni tələbon zıneydə,əmmo dıvo kardey bə insoni bandəçəti iyən ixlosi ruhiyyə pəydu bıey boyis bəbe ta inson bızıno bə Xıdo ehtiyocış heste,əve həni bə cokəson dıl nıdəvasto.

3-salehə fərzənd ilahi neməte ki,bə insoni mardey bəpeştə çokətiyon dəvom pəydu kardey boyis bəbe.