522-ə hissə-Məryəmi surə-12-17 şərifə ayəon

522-ə hissə

يَا يَحْيَى خُذِ الْكِتَابَ بِقُوَّةٍ وَآتَيْنَاهُ الْحُكْمَ صَبِيّاً (12) 

Ha Yəhya ha!(Xıdo) kitobiku ğoym bıqət iyən hırdənətiyədə bəy hikmət(nıbuvvət) əto kardemone.

وَحَنَاناً مِّن لَّدُنَّا وَزَكَاةً وَكَانَ تَقِيّاً (13) 

Və ijən ıştə tərəfiyo mehribonəti və pokəti bəy domone və əv təğvanin be.

Dəvardə bərnomədə votemone ki,Xıdovənde-Aləmi çı Zəkəriyya(ə)-i dıvoş ğəbul karde iyən çəy piyəmerdəti və çəy jimoni həmro piyəjenəti faxti bəvon qıləy fərzəndış əto karde  ki,Xıdovəndi ıştən çəy nomış Yəhya noəşbe.ın ayəon hamyedə: Xıdovənde-Aləm bə ın hırdəni ziyodə ağıl və huşış əto kardəbe.əv qıləy pok iyən pokdovnə fərzənd be iyən bə həmməkəsi ələyh məhəbbətin be.əv çı Xıdo tərəfiku məmur be ki,ıştə zəmoni kitobi yəni Tovrati icroədə ıştə dasto omə qırd ğıvvə oko bıdəy iyən bo Tovarti şəryəti təbyin kardey xoto ciddi ko bıkəy.

Həlbəttə ın əmr  fəğət bə Yəhya(ə)-i məxsus ni və Xıdovənd çandə qılə ayəonədə ilahi peyğombəron tərəfdoronro bo osmoniyə kitobi elmi umute iyən bəy əməl kardeyış sıfarış kardə və ilahi əmron icro kardeyədə çı harcurnə sıstətiku nəhyış kardə.

Çın ayəonku umutedəmon:

1-peyğombəron və çəvon tərəfdoron vəzifəşon heste ki,camiyədə dini hukmon bərğərol kardeyro ziyodə cəhdışon bıbu iyən bın koyədə ciddi hərəkətkəyn.

2-bə cokəson iyən bə Xıdo bandəon məhəbbət iyən rəhm kardey,qıləy ilahiyə sıfəte ki, Xıdovəndi əvış bəştə ovliyaonış əto kardə.

وَبَرّاً بِوَالِدَيْهِ وَلَمْ يَكُن جَبَّاراً عَصِيّاً (14) 

Və bəştə pı-mo nisbətədə çokə ko soyb be və(bə məxloği nisbətədə) hışkəqi və usyonkor nıbe.

وَسَلَامٌ عَلَيْهِ يَوْمَ وُلِدَ وَيَوْمَ يَمُوتُ وَيَوْمَ يُبْعَثُ حَيّاً (15) 

Və(loyığinə) səlom bəy bıbu, qıləy ruj ki, bə dınyo ome və qıləy ruj dınyoku bəşe və qıləy ruj ki, (bəyji)cəm bəbe.

Xıdovəndi bın ayəonədə çı həzrəte Yəhya(ə)-i xısusiyyətonış aşmardə.əv ıştə pərvərdıqori  mığobilədə vey pərhizkor be.ıştə valideyni vədə bəvon vey çoki kardebəbe. və bə məxloği nisbətədə de əvon de məhəbbət iyən rəf`əti rəftor kardedəbe, nəinki,de yoləşəxəti və təkəbbırəti.

Ayəon dəvomədə bə har qıləy insoni jimonədə bıə se qılə muhimmə dovrani işorə kardedə və hamyedə:Xıdovənd əmniyyət və səlomətəti boəy har seqlə vırədə ğərolış doe: çəy təvəllud iyən bə dınyo omə faxti.çəy mardə iyən çı dınyoku şıə faxti. və ğıyoməti ruji iyən çəy ilahi məhkəmədə hozzı bıə faxti.qıləy ruj ki,qırd insonon ijən sənibəton bəyji bəbeyn iyən bəştə həyğiyə həyoti bərəseyn.

Bın ayəonədə çı “səlom”-i kəlomiku murad iyən məğsəd,fəğət lutfi iyən zıvoniyə səlom ni, bəlkəm məğsəd əmniyyət iyən səlomətətiye ki,bəçəy təbyəti zidd iyən bəçəy ikrohi boyis bıə harcurnə koyku bə diyəro bıbu.

Çın ayəonku umutedəmon:

1-bə valideyni çokəti çı həmməkəsi vəzifəy və hiç kəs hiç qıləy zəmonədə çəyku maaf ni, harçənd qıləy ilahi ya iştimaiyə məğam və postış həm bıbu.

2- səlomətəti iyən əmniyyətədə  bıə solimə jimon çı pokdovnəti iyən pokəti,bə valideyni çokəti iyən çı qınoku pərhiz kardey girovədəy və qırd fərdon kardey zıneydən de joqo koon ıştə dınyo iyən axırətədə solimə jimoni təzmin bıkəyn.

وَاذْكُرْ فِي الْكِتَابِ مَرْيَمَ إِذِ انتَبَذَتْ مِنْ أَهْلِهَا مَكَاناً شَرْقِيّاً (16) 

Və bın kitobədə Məryəmi bə yod dənə bə zəmon ki, ıştə xıyzoniku co be qıləy şərğiyə tərəfədə ğərolış qəte.

فَاتَّخَذَتْ مِن دُونِهِمْ حِجَاباً فَأَرْسَلْنَا إِلَيْهَا رُوحَنَا فَتَمَثَّلَ لَهَا بَشَراً سَوِيّاً (17) 

Bə zəmon ki,çı cokəsonku bə diyəro boştə qıləy pardə ğərolış doe.bın zəmon əmə ıştəku(Ruhul-Ğudusro) bəçəy tərəf vığandemone. çən, əv qıləy komilə insoni şikilədə bəçəy çəş çiye.

Həzrəte Yəhya(ə) jimoni dastoni xulosə şikilədə bəyoni bədiqə,ın ayəon bə həzrəte İsa(ə)-i jimoni dastoni işorə kardedə ki,çəvon miyono çandə qılə şəbahət movcude və peşonə ayəonədə əvoni bəyon bəkamon.

Sıftədə bə islomi-peyğombəri(s) xitob kardedə və hamyedə:bın kitob iyən bın surədə ki, çəy nom Məryəme,çı həzərəte Məryəm(ə)-i de Ruhul-Ğudusi bıə macəra bəyon kardedə ki,de Məryəm(ə)-i ıştə ayləku co bıey iyən çəy Beytul-Mığəddəsədə de etikofi məşğul bıey bino beydə.əv ıştənış çı cokəsonku bə diyəroş karde iyən boştə qılə hicob və pardə ğərolış doe ta bo ibodət kardeyro qıləy xəlvətə məkanış bıbu.

De Xıdo izni ilahi mığərrəbə mələkonku qıləyni çı insoni şikilədə zohir be. Məryəm(ə) əy vindeyədə təəccıbış karde ki,çokonə qıləy şəxs bə jıqo xəlvətə vırə daxil bıə. çın macəra dəvom inşaallah omə bərnoməonədə bəşmə xıdmət rosney bəbe.

Çın ayəonku umutedəmon:

1-bə mənəviyə məğam iyən kəmolaton rəseyro,çı merd iyən jeni miyono fərğ ni.fəğət nıbuvvət qıləy məsuliyyəte ki,Xıdovəndi əvış bə jenon gi noəşni və ğərəz əv jenı-merd qırd fəziləton kəsb kardeyədə i və yeksanin.

2-Cəbrəyil və məlayikon sovə peyğombəron çı cokəson palu həm şeydən iyən de əvon qəp jeydən.

3-jen kardey bəzıne de mənəviyə fəziləton kəsb kardey,qıləy ko bıkəy ki,qıləy mələk bəçəy soyəx boy iyən de əy sıxankəy.