523-ə hissə-Məryəmi surə-18-23 şərifə ayəon

523-ə hissə

قَالَتْ إِنِّي أَعُوذُ بِالرَّحْمَن مِنكَ إِن كُنتَ تَقِيّاً (18) 

(Məryəmi bə həmınə firiştə)Voteşe: həyğətən,az ıştıku bə Rəhman bıə Xıdo pənoh bardedəm. ehanə pərhizkoriş?(çımıku bə diyəro bımand).

قَالَ إِنَّمَا أَنَا رَسُولُ رَبِّكِ لِأَهَبَ لَكِ غُلَاماً زَكِيّاً (19) 

(Mələki)Voteşe: bərosti mı ıştı pərvərdıqori vığandə daynəm(oməm) ta qıləy pokə zoə bətı bıbaxşım.

Dəvardə proqramədə ərzımon karde ki,həzrəte Məryəm(ə) Beytul-Mığəddəsi qıləy kıncədə etikofış kardəbe iyən de ibodəti məşğul be ki,qıləy reçinə cıvon çəy xəlvət kardə vırədə pəydu be.Məryəm(ə) çəy vucudiku bə tars iyən təəccıbi dıço be.ın ayəon hamyedə:həzrəte Məryəm(ə) ki,bə holədə sovə Xıdo hiç qıləy pənohqoş nıbe, bə həmonə cıvoni xitobış karde voteşe:mı ıştıku bə Xıdo pənoh bardedəm və ehanə tı qıləy pokə cıvonişbu,çımıku bə diyəro bımand iyən ım vırə tərkkə.həmonə cıvon bo həzrəte Məryəmi(ə)-i orom kardey xoto voteşe:az inson nim,bəlkəm Xıdo palu omə qıləy mələkim və çımı vəzifə ıme ki,tıni çı pokə fərzənd iyən hırdəni soybkəm.

In ayəon de çokə formə nışon doydə ki,pokdovnə jenon de noməhrəmə merdon bə ico bıeyku de şiddəti ijtinob kardedən iyən jıqo qıləy  vəzyətonədə bə Xıdovənde-Aləmi pənoh bardeydən.qıləy ko ki,məələsəf ımrujnə jimonədə bəy dığğət kardedənin və mıxtəlifə muhitonədə əv qıləy addiyə ko unvanədə rayic bıə.

Çın ayəonku umutedəmon:

1-şeyton iyən şəytoniyə koonku bə Xıdo pnoh bardey,Ğıron iyən ilahi ovliya və pokon sıfarışonkue.

2-firiştəon nəinki,fəğət bo vəhyi rosneyo,bəlkəm bo ilahi əmron bə vırə rosney xoto həm nozil bedən iyən de ğeyri peyğombəron həm qəp jeydən.

قَالَتْ أَنَّى يَكُونُ لِي غُلَامٌ وَلَمْ يَمْسَسْنِي بَشَرٌ وَلَمْ أَكُ بَغِيّاً (20) 

(Məryəmi)Voteşe: çokonə mumkine çımı fərzənd bıbu? qıləy holədə ki,nə qıləy bəşəri dast bəmı qıniyə və nə mı yavə ko soyb bıənim?

قَالَ كَذَلِكِ قَالَ رَبُّكِ هُوَ عَلَيَّ هَيِّنٌ وَلِنَجْعَلَهُ آيَةً لِلنَّاسِ وَرَحْمَةً مِّنَّا وَكَانَ أَمْراً مَّقْضِيّاً (21) 

(Xıdo firiştə) Voteşe: mətləb jıqoe.ıştı pərvərdıqori hamyeşe:ım ko bomı hostone ta əy bo məxloği qıləy nışonə iyən ıştə tərəfiku qıləy rəhmət ğərol bıdəm və ım qıləy hətmi(həzohəlbətə) iyən ğətiyə koe.

Həzrəte Məryəm(ə) ki,sıftədə çı qıləy cıvoni naqahanə omeyku tarse iyən təəccıbış karde, ısət çəy sıxanonku bə heyrət və təəccıbi boyis bəbe ki,çəy çokonə fərzənd bəbe ki, əv qıləy bakirə kinəy iyən şuəş ni.ım qıləy holədə be ki,əv ıştənış çı addiyə jimoniku coş kardəbe və Beytul-Mığəddəsədə de ibodəti məşğul be.

Əmmo firiştə çı qıləy ğəti iyən hətmiyə sıxaniku qəp jeydəbe.ilahi irodə bə ım ğərol oməbe ki,qıləy bakirə kinə fərzəndi soyb bıbu ta çı həzrəte İsa(ə)-i təvəllud de mecuzə bə ico bıbu.qıləy ko ki,Xıdovəndi palu hostone,harçənd təbii iyən addiyə holədə ğeyri-mumkin bə nəzə omeydə.

Çın ayəonku umutedəmon:

1-Xıdovəndi irodə bə qırd təbiiyə səbəb və illəton hakime və hiççi çımi bə həyğət rəseyro, bəy mane bıey əzıni.

2-peyğombəron vucud  bo milləti ilahi rəhməti moyəy,min cumlə həzərəte İsa(ə) ki, çəy vucud dılonədə bə Xıdo bıə imoni zumand kardedə iyən bo məxloi hidoyəti qıləy vositə bedə.

فَحَمَلَتْهُ فَانتَبَذَتْ بِهِ مَكَاناً قَصِيّاً (22) 

Çən, Məryəm(bə İsa) hamilə be və de əy bə qıləy diyəroə xəlvətə məkani tərəf şe.

فَأَجَاءهَا الْمَخَاضُ إِلَى جِذْعِ النَّخْلَةِ قَالَتْ يَا لَيْتَنِي مِتُّ قَبْلَ هَذَا وَكُنتُ نَسْياً مَّنسِيّاً(23) 

Çən, zandey doji əvış bə xımoə doy tərəfi kəşeşe(ta ıştəni bəy dahaşti). voteşe: ey kaş çımi bənav az mardə iyən çı yodo beşəbim.

De Xıdovəndi irodə firiştə bə həzrəte Məryəmi(ə) pu kardey,əv dıconi be.joqo ki, çəy hamilə bıey zıney bedəbe.həzərəte Məryəm(ə) məcbur be ıştə ibodət kardə vırəku xaric bıbu və bə biyoboni tərəf dim bıqəto ki,məxloğ əy nıvindon.tikəy dənıvarde ki,zandey doji çəy bədənış eqəte və çı 9 manqi dəvardey əvəzi,qıləy kırtə doji, çın ilahi peyğombəri bə dınyo omey şərayitış hozzı karde.əmmo Məryəm(ə) ıştən-boştə fik kardedəbe ki,bə milləti sıxan və bohtanon çoko cəvob bədoe və boəvon çı dəlil bəvarde? əv anəndə ğəmqin bıəbe ki,hətta ıştə mardey oruzu kardedəbe və voteşe:Xıdolim ha!ey kaş çımi bənav az mardəbim və bə jıqo qıləy təğdiri dıço bıənıbim.əv deməkə ki,bə qıləy qədə səhvi həm dıço bıənıbe, əmmo de qıləy vey yolə bohtani yəni de nopokəti bohtoni dim bə dim oməbe.

Çın ayəonku umutedəmon:

1-harçənd dıconəti iyən zandey qıləy saxt və çətinə koe,əmmo qıləy fərzəndi bə dınyo omey zəminə hozzı kardedə ki,deştə ziyodə bərəkət və xəy vardedə.

2-pokə şəxson palu mardey çı bədnomətisə vey çoke və çı jimoni ğeymət de pok iyən pokdovnəti pamuey bedə.