524-ə hissə-Məryəmi surə-24-28 şərifə ayəon

524-ə hissə

فَنَادَاهَا مِن تَحْتِهَا أَلَّا تَحْزَنِي قَدْ جَعَلَ رَبُّكِ تَحْتَكِ سَرِيّاً (24) 

Çən,(İsa çəy ləvədə) çəy lınqi ji tərəfiku əvış vanq je ki,(ha inəha!) ğəm məhə. həyğətən, ıştı pərvərdıqor ıştı(lınqi) jiku qıləy rəvonə ovış hozzı karde.

وَهُزِّي إِلَيْكِ بِجِذْعِ النَّخْلَةِ تُسَاقِطْ عَلَيْكِ رُطَباً جَنِيّاً (25)

Və çın xımoə do xıçəon bəştə tərəf oşand, bıdə tojə xımoon erizi beji.

Dəvardə bərnomədə votemone ki,de Xıdovəndi irodə iyən de Cəbrəyilə nomo bıə mələki vositə,həzrəte Məryəm(ə) dıconi be iyən qıləy kırtə zəmonədə bə zandey doji dıço be.liza noçor be ıştə Beytul-Muğədəsədə bıə ibodətqoku xaric bıbu.əv çı milləti mızəmmət iyən sə sıxanonku bə diyəro mandey xoto, bə şəhr şıey əvəzi,ıştə səş qəte şe bə biyobonon tərəf və ıştənış bə qıləy xımoə doş dəhaşte.

In ayəon hamyedə: Xıdovənd ıştə mo luzədə bıə hırdənış bə zıvonış varde ta bəçəy mo dılvandi bıdəy iyən bəçəy oroməti boyis bıbu.İsa(ə) bə dınyo omey bənav deştə mo sıxanış karde və bəy dılvandi doydəbe ki,norohət məbi və ğəm məhə.harçənd hiçki bəştı koməq nomoe,əmmo Xıdovənde-Aləm ıştə neməton yəni,tojə xımoon çı pentoniku iyən təmizə ovi çı jiku bətı əto bəkay.Odəmi dığğəti bəştə cəlb kardə çi ıme ki, çı Xıdo Rəsul(s) iyən Əli(ə)-iku omə rəsə hədisonədə nəğl bıə ki,bo hamilə jenon vey çokə xorək tojə xımoe və jenon zandey və mırəxxəs bıey bəpeştə bəbe çəvon iminə harde-həş xımo bıbu.

Çın ayəonku umutedəmon:

1-hamilə jeni bə ruhi iyən psixoloji cəhəto oroməti ehtiyocış heste. çəy xıyzoni əhl və nezə odəmon bəbe deştə sıxanon bəy dılvandi bıdəyn iyən çəy iztirabiku bə kamkəyn.

2-tojə xımo Xıdovəndi bəştə ovliyaon əto kardə məxsusə nemətonkue və bo çəyku istifodə kardey ziyodə sıfarış bıə.

فَكُلِي وَاشْرَبِي وَقَرِّي عَيْناً فَإِمَّا تَرَيِنَّ مِنَ الْبَشَرِ أَحَداً فَقُولِي إِنِّي نَذَرْتُ لِلرَّحْمَنِ صَوْماً فَلَنْ أُكَلِّمَ الْيَوْمَ إِنسِيّاً (26) 

Çən, çə(həmonə xımoku) bəhə və(çə oviku) peşom iyən(bın tojə hırdəni xoto) ıştə çəşi ruşinkə. çən, çı odəmonku ikəsi vindeyədə(de işorə bəvon) vuji: az bo Rəhmanə Xıdo sukuti(tam jıey) rujəm nəzr kardə, əve ımruj de hiç qıləy insoni qəp nibəjem.

De(moə ləvədə bıə) tojə əğıli sıxanon, çəy mo zandey xoto bıə norohətçətiku bə kam be, əmmo çəy dılədə ijən çı məxloği norəvoə sıxanonku bıə tars mandəbe. bın zəmon bəy ilhom be ki, tı sukuti rujə bıqət iyən de hiçkəsi sıxan məkə. tı bə hiçkəsi pars və sıvoli cəvob mədə ta hələ bunum çiç bıdə və Xıdovənd oxo qıləy ro oj bəkay botı və de qıləy ro ıştı muşkili həll bəkay.

Bın ayədə cəlbəkə nuktə ıme ki, fərzənd bə valideyni çəşi ruşinəti boyis bedə. qıləy ko ki, psixoliji cəhəto de təcrubə isbot bıə və fərzəndi təvəllud bə pı-mo jimoni vey yolə təsir noydə.

Çın ayəku umutedəmon:

1-bo çı kali sıvon iyən jimoni problemonku xaric bıeyro,nəzr kardey qıləy roye ki, Xıdo ovliyaon çəyku bəhrə bardedən.həlbəttə nəzr bəbe bo Xıdo xoto bıbu, harçənd bo çı muşkilatonku ozod bıeyro həm bıbu.

2-qahi faxti bəbe çı məxloği bohton iyən yavə sıxanon mığbilədə tam bıjəni ta həyğəton ıştən oşko bıbu.

فَأَتَتْ بِهِ قَوْمَهَا تَحْمِلُهُ قَالُوا يَا مَرْيَمُ لَقَدْ جِئْتِ شَيْئاً فَرِيّاً (27) 

Çən, Məryəm qıləy holədə ki,tojə bə dınyo omə hırdənış bəştə vanqoş qətəbe, ıştə nezə odəmon palu ome. (əvon)voteşone: ha Məryəm ha! bərosti tı bə qıləy vey yavə ko mırtəkib bıəş.

يَا أُخْتَ هَارُونَ مَا كَانَ أَبُوكِ امْرَأَ سَوْءٍ وَمَا كَانَتْ أُمُّكِ بَغِيّاً (28) 

Ha çı Haruni hov ha! ıştı pı bevəcə odəm nıbe iyən ıştı mo(həm)yavə ko soyb nıbe.

Mılxəs, ha holədə Məryəm(ə) kardey nıəzıni ki,biyobon iyən kəfşənədə bımando və əv bəbe bəştə ğovmi tərəf oqardənin be.əmmo təbiiyi be ki,məxloğ bəy de yavə çəşi diyə kardedəbin və bəy çı zino bohtoni ğandedəbin.bə həmməysə pok bıə jenon nopokəti bohtoni jıey,kanə tarıxış heste.çoko ki,Zəlixa həm bəştə zəmonə həmməysə pokə inson bıə həzrəte Yusif(ə)-i ım bohtanış ğandəbe.ım dırozə tarıxış bıə yavə ko, qıləy ibrəti dərse ki,bəbe inson mığət bıbu və bə camiyə atmosferi tabe nıbu və bə hiçkəsi ələyh zuyi-zənn nıkəy.mumkine məxloği veyni bəştə nodonəti, kin-kudurət  və pəxıləti xoto bə qıləy şəxsi nohəxədə bohton bığando, qıləy holədə ki,əsl həyğət co qıləy çi bıbu.

Çın ayəonku umutedəmon:

1-qahi faxti məxloği mıhokimə,rəyrə iyən bə zohiriyə ğərinəon xotoe,nəinki,de təhğiğ iyən bə həyğəti rəseyro bıə de nəvey vositə.çən,bə təsiri ji dəməşəmon.

2-valideyn,çı bıpyişone ya nıpyişone,bəştə fərzəndon rəftoron cəvabdehin.çən,bəbe bəştə əğılon tərbiyə doey koyədə cəhdkəmon ki,ıştə bəpeştə çokə nom bə dumo bınəmon.

3-yavə ko harkəs həm əncom bıdo,bevəce.əmmo çı pok və əsl-nəcobətinə xıyzoniku ım vey yavəy.