525-ə hissə-Məryəmi surə-29-34 şərifə ayəon

525-ə hissə

فَأَشَارَتْ إِلَيْهِ قَالُوا كَيْفَ نُكَلِّمُ مَن كَانَ فِي الْمَهْدِ صَبِيّاً (29) 

Çən, Məryəmi bəçəy(bə İsa) tərəf işorəş karde.voteşone: əmə çokonə de qofoədə bıə əğıli qəp bıjənəmon.

قَالَ إِنِّي عَبْدُ اللَّهِ آتَانِيَ الْكِتَابَ وَجَعَلَنِي نَبِيّاً (30) 

(İsa bə zıvon ome)Voteşe: Xıdo bandəm az, əv bəmı(osmoniyə) kitobış doə iyən mınış peyğombər ğərolış doə.

Dəvardə proqramədə votemone ki,çun həzrəte Məryəm(ə) deştə tojə bə dınyo omə hırdəni bəştə ğovmi tərəf oqardeyədə,milləti binoş karde bəy tane jıey ki,tı ım əğılı çı konco varde,ıştıki,şuə nıbe? tı ki,qıləy pokə ayləku biş,çoko ın yavə ko əncomı doe?

Əmmo Məryəm(ə) ıştən qıləy sıxan votey əvəzi,bə həmonə qofoədə bıə əğıli işorəş karde ta çı məxloği cəvobi bıdəy. Milləti vindeşe ki,Məryəm(ə) bəçəvon sıvolon cəvob doey əvəzi, bə qofoədə bıə hırdəni işorə kardedə ta çəvon cəvobi bıdəy,tiki həm ğeyzin bin. qıləy tojə bə dınyo omə əğıl ki,təbiiyə surətədə kardey nıəzıni sıxankəy iyən ıştə mo mıdofiyəkəy.

Əmmo de Xıdovəndi irodə həmonə qofoədə bıə əğıl bə zıvon ome və ıştənış joqo təğdimış karde:az çı Xıdo bandəonku qıləynim ki,əy bəmı ziyodə lutfış kardə və ğərole mıni bo Bəni-İsrayili peyğombər ğərol bıdəy iyən boəvon ro nışon doey xoto bəmı qıləy kitob nozilkəy.

Deməkə ki, həzrəte İsa(ə)  ıştəni çı Xıdo bandə elan kardəşe,əmmo çəy tərəfdoron çəy barədə ğuluvv iyən ifrotışon karde və əvışon çı Xıdo zoə zıneşone.ım qıləy təhlukəy ki, qırd dinon tərəfdoron təhdid kardedə.

Çın ayəonku umutedəmon:

1-ehanə əmə pok bıbəmon,hətta qıləy bezıvonə hırdən həm bə bohton iyən şayiəon cəvob bədoon və çəmə pokəti mıdofiyə bəkayn.

2-risolət iyən nıbuvvəti məğam,bo Xıdo xolisonə bandə bıey nəticəy iyən ilahi lutfon çı bandəçəti nəticəy.

وَجَعَلَنِي مُبَارَكاً أَيْنَ مَا كُنتُ وَأَوْصَانِي بِالصَّلَاةِ وَالزَّكَاةِ مَا دُمْتُ حَيّاً (31) 

Az ha vırədə bıbum, Xıdovəndi mınış bərəkəti moy(səbəbış) ğərol doə ta çanəndə bəyjim, bəmış nımoj iyən zəkotış sıfarışış kardə.

وَبَرّاً بِوَالِدَتِي وَلَمْ يَجْعَلْنِي جَبَّاراً شَقِيّاً (32) 

Və mınış bə çımı moə nisbətədə çokəko əkəş ğərol doə və(bə məxloği nisbtədə) sıtəmkor iyən sığə dılış ğərol doəni.

Həzrəte İsa(ə) ki,qofoədə be,nəinki,ıştə mo çı məxloği bəy nisbət doə norəvoə bohtonon mığobilədə mıdofiyə kardedəbe,bəlkəm əv ıştənış peyğombər həm elanış karde. yəni əv həm Xıdovəndi bənə nımoj iyən zəkoti bıə əmron mığobilədə muti iyən bə əmri tabe be və həmən bəştə xıyzon iyən ğovmi xıdmət rosney ıştə vəzifə hisob kardedəbe. təbiiye vucudış joqo qırd de xəy iyən bərəkəti pur bıə və çəy xəy bə qırd məxloği rəsə qıləy şəxsi vucud,fəğəd bəçəy jimoni zəmoni məhdud ni.

Çın ayəonku umutedəmon:

1-nımoj iyən zəkot,qırd osmoniyə dinonədə qıləy mıştərəkə vəzifəy və fəğət bə islomi məxsus ni.

2-bəştə valideyni çokəti kardey,məxsusən bəştə mo,çı peyğombəron əxloğikue.

وَالسَّلَامُ عَلَيَّ يَوْمَ وُلِدتُّ وَيَوْمَ أَمُوتُ وَيَوْمَ أُبْعَثُ حَيّاً (33) 

Səlom bıbu bəçımı bə dınyo omə ruji və bəçımı mardə ijən sənibəton bəyji bıə ruji.

ذَلِكَ عِيسَى ابْنُ مَرْيَمَ قَوْلَ الْحَقِّ الَّذِي فِيهِ يَمْتَرُونَ (34) 

Ime Məryəmi zoə İsa. (həmonə)dırıstə sıxan ki, çəy barədə şəkk kardedən.

Həzrəte İsa(ə) nəinki,de Xıdovəndi irodə ıştə mecuzəvari bə dınyo omeyku iyən bə məxloği ıştə jimoni dırozi xəy rosneyku sıxan voteşe,bəlkəm bəştə mardey iyən ğıyoməti ruji bəyji bıeyış həm işorəş karde ta nışon bıdəy əv həm bənə co insonon qıləy bəşəre ki,bə dınyo omeydə iyən qıləy məhdudə umrış heste və oxoyədə bəmarde.

Çı Xıdo çokə bandəon,məxsusən çı peyğombəron palu muhimmə çi,jimoni royədə çı harcurnə inhirof və fırsiyeku səlomət mandeye ki,Xıdovəndi əvış boştə peyğombəronış təzmin kardə ta məxloğ de peştıpurəti çəvon şıə roy iyən məktəbi dəvom bıdəyn iyən bə hiç qıləy şəkko-tərdidi dıço nıbon.

Əmmo de təəssıfi məxloğiku iqlə qrup ya bəştə nodonəti və ya bəştə yavə məğsədon xoto,çı peyğombəron barədə bə şəkko-tərdidi dıço bedən.milləti i hissə əvoni çı bəşəri həddiku bəpe bardedən iyən bə Xıdoəti məğami rosneydən.çımi mığobilədə kali insonon əvoni çı bəşəri həddiku beyji bardedən iyən əvoni cındo və nodon hisob kardedən.

Qıləy holədə həx ıme ki,əvon həm bənə co insonon bəşərin ki,bəvon vəhy bedə iyən çəvon vəzifə Xıdo vəhyi bə məxloği rosney iyən ilahi təlimon camiyədə bərğərol kardeye.

Çın ayəonku umutedəmon:

1-mardey iyən ğıyoməti məhkəmədə cəm bıey,bo qırd insonon heste,hətta bo ilahi ovliyaon iyən peyğombəron və bın koyədə hiçkəs istisna ni.

2-çokonə mardey iyən ğıyoməti ruji çokonə bəyji bıey muhimme.liza qırd ilahi ovliyaon ıştə umri ağıbətiku norohət bin iyən dıvo kardedəbin ki,mısılmon bıə holo bımardon. yəni bə Xıdo komilən təslim bıə holədə.

3-vəynə dinon tərəfdoron inhirofi nışon doey iyən çəvon barədə həxə sıxani rosney, Kərimə-Ğıroni missiyaku qıləyniye.