527-ə hissə-Məryəmi surə-41-45 şərifə ayəon

527-ə hissə

وَاذْكُرْ فِي الْكِتَابِ إِبْرَاهِيمَ إِنَّهُ كَانَ صِدِّيقاً نَّبِيّاً (41) 

Bın kitobədə İbreyimi zikrkə ki, həyğətən əv qıləy rostəvıjə peyğombər be.

إِذْ قَالَ لِأَبِيهِ يَا أَبَتِ لِمَ تَعْبُدُ مَا لَا يَسْمَعُ وَلَا يُبْصِرُ وَلَا يُغْنِي عَنكَ شَيْئاً (42) 

Bə zəmon ki, bəştə pış(amuş) vote: ha çımı pı ha! boçi nıməsə, nıvində iyən tıni qıləy çiku be ehtiyoc nıkardə (bətı xəyo-zərəlış nıbə) çiyon pərəstış kardedəş?

Navnə ayəonədə həzrəte Zəkəriyya(ə),həzrəte Məryəm(ə) iyən həzrəte İsa(ə)-i jimoni i hissə bəyoni bədiqə,ın ayəon bə həzrəte İbreyim(ə)-i deştə amu bıə diyaloqi işorə kardedə və sıftədə həzrəte İbreyim(ə)-i  vəsf kardə holədə hamyedə: əv qıləy sıddığ iyən rostəvıjə şəxs be.yəni qıləy şəxs ki,çəy ğəlb,zıvon iyən əməlış iye iyən çəy votemon və rəftorış bə rosti iyən dırıstəti əsose.

Çun çı həzrəte İbreyim(ə)-i pı çı dınyoku şıəbe və çəy amu Azər çəy ğəyyumətiş bəştə ohdəş peqətəbe,Kərimə-Ğıron çəyku de pıə təbiri nom bardedə.qıləy holədə ki, həzrəte İbreyim(ə)-i pı qıləy momin iyən Xıdopərəstə şəxs be.əmmo çəy amu Azər qıləy bıtpərəst iyən mışrikə fərd be.liza həzrəte İbreyim(ə) de namə zıvoni və de sıvoli formə əy dərosneydə ki,bıtpərəstəti bo əy hiç qıləy foydəş nibəbe.həmonə bıton ki,hətta bəsə insononsə bejin iyən çəvon hətta məse iyən vindey ğudrətışon həm ni,ısət çı bımando əvon çı bəşəri koon barədə qıləy tədbir bıvindon.

Çın ayəonku umutedəmon:

1-cokəson isloh iyən irşodi koyədə,de camiyə fərdon məşğul bıey əvəzi,bəbe bəştə nezə odəmon soyəx bışəmon.

2-nəhy əz munkəri koyədə,sinno-sor fərğ kardedəni.məsələn,qıləy fərzənd çı xeyzoni yoli irşod kardey bəzıne.

يَا أَبَتِ إِنِّي قَدْ جَاءنِي مِنَ الْعِلْمِ مَا لَمْ يَأْتِكَ فَاتَّبِعْنِي أَهْدِكَ صِرَاطاً سَوِيّاً (43) 

(Şinə)Pı! həyğətən, botı nıomə qıləy elm bomı omə. çən, bəmı tabe bıbu ki, tıni bə rostə ro hidoyətkəm.

Çı bıtpərəstəti befoydə bıey bəyoni bəpeştə,həzrəte İbreyim(ə) ıştəni çı Xıdo peyğombər elan kardedə və hamyedə:çı Xıdo tərəfiku bəmı vəhy bedə.liza şımə çımı zınə çiyon zıneydəniyon.bomı ruşin iyən ğətiye ki,çı mardey bədiqə bərzəxi aləm iyən ğıyomət heste və əmə çiç əncom doydəmon,bəbe ilahi məhkmədə cəvob bıdəmon. az zıneydəmkom koon Xıdo palu çoke iyən kom qıləyni yavə və bə xoşnomə ko. çən,həxə sıxani bıməsən iyən əy ğəbulkənən ki,bəşmə bə sıratəl-mustəğimi tərəf hidoyəti boyis bəbe.

Çın ayəku umutedəmon:

1-şırki rişə,həyğətiku aqah nıbeye.liza peyğombəron hejo bə məxloği çı şırki ziyodə ziyanon barədə xəbərdorətiyon doydəbin.

2-inson bəbe bə alimi tabe bıbu,ısət əv çı yol bıbu ya hırd.meyar elm iyən aqahətiye, nəinki, çı fərdon sinno-sor.

3-peyğombəron milləti bəçəy tərəf dəvət kardə ro,etidol iyən miyonə roye.çı harcurnə ifrot iyən təfritiku bə diyəro.

يَا أَبَتِ لَا تَعْبُدِ الشَّيْطَانَ إِنَّ الشَّيْطَانَ كَانَ لِلرَّحْمَنِ عَصِيّاً (44) 

Ha(şinə) pı! Bə şəytoni ibodət məkə ki, bə rosti şəyton bə Rəhmanə Xıdo asi bıə.

يَا أَبَتِ إِنِّي أَخَافُ أَن يَمَسَّكَ عَذَابٌ مِّنَ الرَّحْمَن فَتَكُونَ لِلشَّيْطَانِ وَلِيّاً (45) 

Ha(şinə)pı! az tarsedəm ki, Xıdovəndi tərəfiku bətı qıləy əzob bırəso iyən tı çı şəytoni dustonku bıboyş.

Bıton inkori bəpeştə,həzrəte İbreyim(ə) çı şəytoni xətər iyən təhlukə bə məxloği quşi rosneydə.qıləy şəyton ki,həmonə sıftəku bə Odəm(ə)-i səjdə nıkardey xoto bə Xıdovəndi əmri nıpemande iyən ilahi dərqoyku tojnıey be.çanəndə yavə iyən bevəce ki, inson çı qıləy kəsi bandə bıbu ki,hozzı nıbe hətta iləzə iyən an bəy səjdəkəy. zira əv ıştəni bəsə insonisə bəpe zıneydəbe və bəştə təkəbbır iyən yoləşəxəti xoto bə Xıdo əmri tabe nıbe.

Həzrəte İbreyim(ə) bıton pərəstış kardey,inov bə şəytoni ibodət kardeye və ıştə yolış çın koyku nəhyış karde.zira bə hakəsi itoət kardey və tabe bıey,çəy bandə bıey və inov əy ibodət və pərəstış kardey mənoədəy.əvon ki,ıştə ağl iyən fikonışon bə kəno noə və hiç qıləy dəlil iyən məntığ nıbə holədə çı şəytoni ilğaon və vəsvəson jiyədə bıton pərəstış kardedən,həyğətədə əvon şəytoni ıştəni pərəstış kardedən.

Həlbəttə Xıdovənd Rəhman iyən Mehribone.əmmo çı şəytoni dayirə və çərçivədə ğərol qəte, insoni çı Rəhmonə Xıdo dayirə və muhitiku xaric kardedə və bəçəy rəhməti şomil bedəni.

Çın ayəonku umutedəmon:

1-nəhy əz munkəri koy ki,təbiiyə surətədə bo məsəkəsi tele,çı hissiyatonku oko bıdəmon ta çəy ğəbul kardey zəminə hozzı bıbu.çoko ki,bın ayəonədə ço kərə həzrəte İbreyim(ə) hamyeşe:şinə pı!

2-qahi faxti inson qıləy ko bıkəy ki,Rəhmon iyən Mehribonə Xıdovənd bəy ğəzəb nıkəy iyən əy bə əzob giriftor nıkəy.qıləy holədə ki,Xıdovəndi rəhmət çəy ğəzəbiku bənave.