Osmoniyə surəon-156
Osmoniyə surəon-156
Kərimə-Ğıron bə maddi nəzəku luks jimoni iyən sərvəti beerj iyən beğeymətin bıey işorə kardedə və 33 iyən 34-ə ayəonədə hamyedə:ehanə kofiron maddi cəhəto rifohinə jimon boyis bedəni ki,qırd millət bə kufri meyl pəydukon və qıləy vohidə umməti formadə bə zəlolət eqınon,əmə bo bə Rəhnonə Xıdo kofir bıə kəson çəvon bonəkulon nığəku bıə kəson ğərol ədomon və həmçinin bo bəpe şıeyro sırdon.çımisə əlovə boçəvon kəon çandə qılə bə iyən taxton ğəro ədomon ki,bəy təkyəkon.
Zixrufi mıborəkə surə 35-ə ayədə həmonə bəhsi dəvomədə hamyedə:”və çandə nev zər-zibo (aləton hozzı kardemone)əmmo,ımon həmmə ğərəz dınyo jimoni məta(bəhrə) co çi ni və ıştı pərvərdıqori palu bıə axırət bə pərhizkoron məxsuse”.
Həyğətədə ın ayə bə kufri səmt şıə kaməzərfiyyət iyən dınyotələbə fərdon işorə kardedə ki,Xıdovənde-Aləm maddi sərzəminon bə kofiron ğısmətəkəy ta həmməkəs bızınon ımon çı insoni şəxsiyyyəti meyar nin.de qıləy co təbiri çın maddi ləzzətonku çı kofir iyən zolımon bəhrə bardey,çəvon şəxsiyyəti muhim bıey meyar ni və nə çı muminon bə kofiron doə bıə nemətonku məhum bıey.Xıdovənde-Xalığ çı maddi nemətonku ağılmandə həddədə oko doey icozəş doə və əy çı dınyo jimoni və quzəroni dəvordıneyro tovsiyəş kardə. liza,pərhizkoron ıştə zohiri dınyo jimoni zər-zibo barədə fik kardey əvəzi,axırəti fiki kardedən və çəy barədə norohətin.ilahi pəyğombəron həm de çın məsələonku bə kəno mandey,ın duyə erj və ğeyməton rədd kardedəbin və insonə prinsipon yəni elm,təğva və pokəti çəy əvəzi ğərol doydəbin.
Zuxrufi mıborəkə surə 36-ə ayə bə dınyo maddi jimoni ğərğ bıey iyən bəy dıl dəvastey əsər və təsironku qıləyni işorə kardedə ki,əv həm çı Rəhmonə Xıdoku dim qordıney iyən bə şəytoni itoət kardeyku iborəte. Joqo ki,hamyedə:”və hakəs Rəhmonə Xıdo zikriku dim bıqordıno,qıləy şəytoni bəy mısəllət bəkardemon. çən,hejo deəy bəico (çəy dust)bəbe”.
43-ə ayədə ijən bə Kərimə-Ğıroni işorə kardedə və çı pəyğombər(S)-İKU tələb kardedə ki,bətı vəhy bıə çiyku ğoym dəçık ki,tı rostə ro iyən sıratəl mustəğimədəş.ıştı kitob iyən bərnomədə hiç qıləy kəcəti və inhirofəti mevcud ni və çəvon ıştı risoləti ğəbul nıkardey bəştı həxədə nıbey dəlolət kardedəni.bətı vəhy bıə ım Ğıron tı iyən ıştı ğovmi bə yod dənoydə və bəpe çı jimoni bərnomə bıbu və rəyrə şıməku sıvol kardey bəbe ki,de ın ilahi proqrami iyən osmoniyə vəhyi çiçon karde?...
