Osmoniyə surəon-225

Osmoniyə surəon-225

Peşo dıqlə imoninə jenonku misol jeydə ki,çəvonku iminə qılə Muzahimi kinə Asiyə be.əv çı Fironi jimoni həmro be ki,kufrədə bə qıləy dərəcə rəsəbe ki,ələni iyən oşkoə formadə fəryod jedəbe:mı şımə yolə pərvərdıqorim.əmmo,çoko ki,Asiyə Mosə(ə)-i çı sehrbozon mığobilədə bıə mecuzəş mışohidəş karde,çəy ğəlbi nığılə vırədə imoni nur ruşin be və həmonə ləzə iyən aniku bə Mosə(ə)-i imonış varde.deməkə ki,Fironi jimoni həmro sarayda jimon kardedəbe,dınyəvi qırd nemətonku ləzzət bardedəbe iyən çokə rifohinə jimonış hestebe və harçi oruzu kardeyədə bə dast vardedəbe.Asiyə hejo ıştə imoni məxfi kardedəbe.əmmo,çoko ki,firon çəy imoniku xəbədo be,çandə kərə əvış Xıdovəndi pərəstış kardeyku nəhyış karde,əmmo ın istiğamətinə jeni hiçvaxti bə fironi tələbon təslim nıbe.nəhoyətən,fironi əmrış karde ki,Asiyə dast-lınqi de mısmori bıduton və həşi sutunə şuon jiyədə ğərol bıdon və çəy sinə səpe həm qıləy dıjdə sığışon noe.ım imoninə jen ıştə umri oxonə ləzə iyən anədə bə Xıdovəndi jıqo dıvoş karde:”Xıdolim ha! bomı vəhıştədə ıştə civar və kənoyədə qıləy kə binakə və mıni firon iyən çəy əməlonku ozodkə və mıni çın zolımə ğovmiku nicot bıdə,peroxon”.(Təhrim-11).

Xıdovənde-Aləm həm çın mumin iyən fədokorə jeni dıvoş icobət və ğəbulış karde və əvış bə vəhışt daxil kardeşe və çəy jimoni həmro fironi ğudrət iyən kufr bəçəy imoni hiç qıləy zərəlış rosne nızıne.bəlkəm,Asiyə vəhıştədə çı dınyo həmməysə çşokə jenon kənoyədə ğərolış qəte.

Xıdo-Rəsul(s)-iku rəsə rəvoyətədə omə:”vəhışti əhli jenon ço nəfərin:Xuvəylidi kinə Xədicə, Muhəmmədi kinə Fatimə(s)İmrani kinə Məryəm və fironi jimoni həmro,Muzahimi kinə Asiyə.....

İmrani kinə Məryəm dıminə şəxsiyyəte ki,Təhrimi surədə əv de imoninə jenon nomi zikr bedə və 12-ə ayədə hamyedə:”və həmçinin Xıdovənd misolış je de İmrani kinə Məryəmi ki,ıştə dovnəş pok oqətəşe və əmə ıştə rufiku bəy pu kardemone....”.əv de Xıdovəndi fərmoni jimoni həmro nıbə holədə qıləy fərzəndış bə dınyio vardeki,Xıdovəndi “ulul-əzm” peyğombəronku be.

Peşo izofə və əlovə kardedə:”Əv ıştə pərvərdıqori sıxan iyən kitobış təsdığ karde və bə Xıdo fərmoni muti bıə kəsonku be”.

Məryəm(ə)-i barzə səviyədə bıə qıləy imonış hestebe bə qırd ilahi əmr iyən osmoniyə kitobon imonış vardəbe və əməli nəzəku həm hejo bə ilahi əmron əməl kardedeəbe.Kərimə-Ğıron əy de pokdovnəti iyən iffətinə jeni nomi sıtoyiş kardedə Ğıroni mıxtəlifə ayəonədə çın imonin iyən barzə məğami soyb bıə şəxsiyyəti həxədə ziyodə mətləbon bəyon kardedə ki,çəy muhimmə ğısmət deçəy ıştən nomi bino bıə surədə omə.Kərimə-Ğıron de ın təbiron  çı yəhudiyonku idastə çəy barədə bıə norəvo iyən mınhərifə sıxanon rədd kardedə və ım namusin iyən pokdovnə jeni pok hisob klardedə....

Mulki mıborəkə surə bə məşhurə  ğovl iyən sıxani əsos,qırd ayəonış Məkkədə nozil bıə.Mulki surə 30 qılə ayəku iborəte və çın surə əsliyə mehvər və məzmun Xıdovənde-Xalıği malikiyyət və hakimiyyətiku təşkil doydə.bın surədə kuliiyə formadə bəhs bıə mətləbon çımiku iborəte: Xıdovəndi məbdə iyən sıfəti ətrofədə bıə bəhson,xılğəti,məxsusən osmonon iyən astovəon  heyrətamizə nizom və sistem,zəmini xılğət və çəy neməton,pərəndəon ofəyəmon,cari bıə ovon və quş,çəş iyən zıney əbzoron xılğət,miad və cəhəndımi əzob,əzobi məmuron de cəhəndımi əhli dialoq və votemonon,kofir iyən zolımon de çandə nev dınyəvi iyən uxrəvi əzobon torsıney və təhdid kardey......