Osmoniyə surəon-230

Osmoniyə surəon-230

Ğələmi mıborəkə surə 5-6-ə ayonədə bəyon kardedə:”rəyrə tı bəvindeyş və əvon həm bəvindeyn ki,şıməku kon qıləyni məcnun və səfiye”.Xıdo-Rəsul(s) səhih və dəğiğə mevğıyyət və hərəkət və çəy sayədə islomi ozavziye iyən nufuzi,nışonış doe ki,əv çı ağl iyən diroyəti mənbəku nəşət seydə və səfi iyən beməxə əkəsonin ki,de bə aləmi dətıvə həşi nuri canqo-cidol kardedən...

Ğələmi mıborəkə surə ibaxş,həxı inkor kardə və de peyğombər(s)-i mıxolifət kardə kəson noloyığə sıfəton bəyon kardedə və ə həzrəti bəvon tabe bıeyku oqəteydə.joqo ki, hamyedə:”bə hakəsi ki,ziyodə ğəssəm hardedə və exroce,itoət məkə.ikəs ki,vey dumo (cokəson)aybiye və bo sıxaçinətiro şıe-omey kardedə.əkəs ki,de şiddəti bə xeyə ko mane bedə və təcavuzkor, qınokore.çımosnə əlovə,kin-kudurıətin,vey hardedə,hozi iyən bədnome”.(10-13).

De ın tərtibi Kərimə-Ğıron ruşin iyən oşko kardedə ki,islom,Ğıroni iyən peyğombər(s)-i mıxolifon duyəvıj,exroc,aybcu,xəbərçin,tuğyongər,qınokor iyən kin-kudurətinə fərdon bıən ki,beşək jıqo fərdon de qıləy yolə şəxsiyyət və islohəkə insoni mıxolifət kardey,çəş kardənin be.ımon həmonə kəson bin ki,kərimə-Ğıroni ayəon bəvon tilovət beyədə,votedəbin:”ımon navkonəyon xorafi əfsonəonin”.....

De”əshabil-cənnə” (boği soybon)nomi məğrurə kali sərvətinə fərdonku iborət daston,çə dastononkuye ki,Ğələmi mıborəkə surə 17 ta 33-ə ayəonədə bəyon bıə.bın dastonədə çı dınyo molonku məst bıə və de cokəson təhğıri ko məşğul bıə sıtəmkoron de zılləti orəxə ağıbəti bəyon kardedə.Kərimə-Ğıron de bəyoni çəşnavi doydə ki,ehanə inson bəştə dınyo maddi imkonat,mol-devlət iyən sərvəti xoto məğrur bıbu iyən çəy inhisor tələb kardə ruf bəy ğalib booy,həmmə çiyon boştə tələb bəkarde və cokəson məhrum bəkarde və oxoyədə həm bəsə boği soybonsə qıləy çokə ağıbətış nibəbe.ın boğ ki,bə məşhurə ğovl və sıxani əsos,Yəmənədə bıə,qıləy piyəmerdə mumini ixtiyorədə ğərolış qətəbe və ıştə ehtiyoci mığdorədə çəyku məhsul peqəteydəbe və əmandəni bə beçiz iyən ehtiyocinə şəxson doydəbe.əmmo,çoko ki,çı dınyoku şeçəy hırdənon voteşone:əmə ıştən bə ın məhsulon vey loyığimon və bə ğərol omin ki,qırd ehtiyocinə fərdon və fəğır-fuğəraon çın məhsulonku məhrumkon.çəvon bekardə ım ğərol bəçəvon pəxıləti iyən imoni zəyfəti xoto be.zira,əvon anədə ehtiyocin nıbin ki,ıştə de məhsuli pur bıə boği məhsulonku ibaxşi bə fəğıron məxsus kardey nızınon.çın ğəroli bədiqə.qıləy hartərəfinə əzobi həmonə boğoş dəqəte və qıləy dəhşətin iyən sutunə otəş dıço qıniye çı həmonə boği. həmonə havz iyən de mıxtəlif nev ləl-qılon pur bıə boğ,vəşış qəte sute və bənə siyuə şəvi be çəyku ğərəz  otəşi xokə hiççi nımande.maşki be,boği soybon qımon kardedəbin ki,ısət çəvon boğon bo məhsuli qırdə kardero hozzıe və bışon bıçınon.əvon qədə-qədə bə iaynde voteşone:”ehanə miyvəon çıniye məğsədon hestebu,bə kaştevoni sahə və bəştə boğon səmt hərəkətkənən!”.əvon (bə boği tərəf) dəqo qınin.qıləy holədə ki,ahəstə bə iyande votedəbin:mığət bıbən ımruj hətto iqlə fəğır həm bəşmə(boğon) daxil nıbu”.(21-24).

Jıqo bızın bəçəvon dədə navkonə çokə əməlon xoto be,fəğıron idastə ha sor sori bın vaxtonədə çəş kardedəbin ki,çın boği miyvəon çıniye zəmon bino bıbu və bəvon həm qıləy mənfəət bırəso. liza,ım pəxılə fərzəndon jıqo məxfiyonə formadə hərəkət kardedəbin ki,həni hiçkəs ehtımol nıdo jıqo qıləy ruj omə rəsə.əmmo,əvon çoko ki,(bə boğon varid) bin və əvışon (jəqo)vinde və voteşone:əmə həxədə ıştə romon qin kardə.bəlkəm,əmə məhrumimon.(26-27)əmə dılımon hestebe fəğıron və etiyocinə şəxson  məhrumkəmon,əmmo ıştən həmməysə vey məhrum bimon.həm maddi bəroməku və həmən mənəvi bərəkatonku.

Çəvon miyono qıləy muminə şəxs ki,əvoni çı pəxıləti iyən hərisətiku nəhy kardedəbe,bəvon voteşe:”aya bəşmə nıvotıme çıro Xıdo təsbihi votedəniyon?”.əvon bəştə ğəflət,xudxahəti iyən qıno etırof kardeşone və voteşone:”çəmə pərvərdıqor (harcurnə zılmiku) mınəzzəhe (poke). beşək,əmə zolım bıəmon”.əmə həm bəştə və həmən bə cokəson sıtəm kardemone.çən.peşo bə iyande dim qəteşone və binoşon karde iyənde mızəmmət karde.hakəs əsliyə qıno bə iyande qıy şododəbe və bəy de şiddəti sə-sıxan kardedəbe.boği soybon çoko ki,ıştə bədbəxtəti nığlılətiku aqag bin,de fəryodi vanqışon je:”vay bıbu bəmə ki,əmə tuğyongər bimon”.....