Osmoniyə surəon-244

Osmoniyə surəon-244

Muzzəmmili mıborəkə surə Məkkədə,peyğombər(s)-i  bə Mədinə hicrət kardey bənav nozil bıə və 20 qılə ayəku iborəte.ın surə de Kərimə-Ğıroni cəm kardey tərtibi hafto seminə və de nozil bıey tərtibi seminə surəy ki,”Ğələm”-i surə bədiqə və “Muddəssir”-i surə bənav enovniyə bıə. Muzzəmmili mıborəkə surə ıştə oləti bəştə dəqətey mənoədəy və çəyku məğsəd və murad həm Xıdo-Rəsule(s).

Rəvoyətədə omə ki,peyğombər(s) ıştə dəvəti oşko kardə  zəmonədə,Ğureyşi yolon “Darun-Nudvə”-də cəm bin ta de ə həzrəti mıborizə bardero qıləy ro pəydukon.çəvonku bəzi qıləyni voteşe ki,bəy çı kahini nomi bınəmon.əmmo,i dastə de ın təklifi mıxolifətışon karde.kali qıləyniyon həm tərcihışon doe ki,bə həzrəti sahir və sehrboz bıvoton ki,ım təklif həm ğəbul nıbe. nəhoyətən,voteşone ki,harçi ki,heste,əv çəmə duston miyono qıləy coəti və təfrığəş eğandə. peşo.əyo cəm bıə mışrikon iyandeyku co bin şin.

Im sıxan bə peyğombər(s)-i rəse və ə buzurquvarə həzrət ıştə risolət və missiya sanqinəti və saxtəti dərəse və ıştə olətış bəştə dəqəteşe və de istirohəti məşğul be.bın zəmonədə Cəbrəyil-Əmin(ə) nozil be və Muzzəmmili mıborəkə surəş bo ə həzrəti handışe.

Muzzəmmili mıborəkə surə ayəon iminə baxş,islomi-peyğombəri(s) bo bəşəvnəy ibodət iyən Kərimə-Ğıroni tilovət kardey ko dəvət kardedə və ə həzrəti bo qıləy sanqinə ibodi bərnomə ğəbul kardey hozzı kardedə.

Ayəon dəvomədə peyğombər(s)-iku hovsələ və səbr kardey iyən deştə mıxolifon  mudorə və çəvon mığobilədə mığovimət kardey dəvət kardedə.miad,həzrəte Mosə(ə)-i bə fironi səmt vığandey və çəy tuğyongərəti iyən bə əzobi mıbtəlıo bıəey barədə bıə bəhson,şəvi ibodəton həxədə bıə dəstur və fərmon,bo Kərimə-Ğıroni tilovət kardey dəvət kardey,nımoj votey,zəkoti pərdaxt kardey və doey,Xıdo royədə infoğ və baxş və istiğfor kardey həmçinin çın mıborəkə surə coqləyni baxşonkuye.

Ayəon sıftədə de lətifə zıvoni peyğombəri osmoniyə dəvətiku votedə.jıqo bızın bəşəri camiyə qıləy oxoş nıbə okeyane ki,əksər dastə bəvədə ğərğ bedən,bə cuş omə ləpon miyono hərkət kardedən və sərqərdonə kəştiyon əyo çı qıləy pənohqo dumon.bın dıyoədə fəğət islomi peyğombər(s) eşəkəson nicot doə kəse və Kərimə-Ğıron fəğət nicoti kəştiye.ım dıjdə hidoyətəkə bəpe de bəşəv-bəruj ibodəton ,ıştənış bo ın dıjdə risolət və məmurəiyyəti xoto,hozzı kardedə. Muzzəmmili mıborəkə surə iminə ayə jıqo xitob kardedə və hamyedə:”Ha bəştə oləti ıştəni dəqətəkəs! Şəvi i hissə istisna bıə holədə bəyşt bə səpo! Şəvi nimə ya lıski çəyku bəkam ya bəy nimə əlovəkə və Ğıroni de tərtili(orom) və de dığğəti və oxonə ruşinəti iyən fəsohəti tilovətkə!(1-4)....

Şəv bə ooroməti boyis bedə və çın oroməti nəticə,insoni ıştə harujə ko-məşğələ iyən problemonku asudə və rohət bıeye.liza,ayəon bə peyğombər(s) votedə ki,çun ruji  dayimi iyən dırozə cəhdon kardedəş və de milləti hidoyəti ko məşğul bıbi və ıştə pərvərdıqori risoləti ko bə vırə bıroson.tı rujion çı milləti harujnə fərdi iyən iştimayi muşkilaton həll kardedəş,əve bo ibodət və sıtoyişi kifoyət ğədər məcol və vaxtı bedəni.binobərin,şəvədə de oroməti iyən asudə formadə de Xıdovəndi ibodəti ko məşğul bıbi və boştə bərujnəy bıə dıdj iyən hevujə fəoliyyəton bə vırə rosnero lozım bıə hozzıəti bə dast biyə.təbiiye ki,şəvi zəmonədə bo təfəkkur,əndişə və nəfsi tərbiyə kardey qıləy çokə fırsət doydə.

Həmçinin,bə Kərimə-Ğıroni ğiroəti təkid kardey,de ın bəşəvnəy bərnomə əsliyə mətni bəçəy xotoye ki,ım osmoniyə kitob lozım bıə qırd dərson insoni ıştə səpe koy kardey zəminədə şomil bedə və ımi bo imon,istiğomət,təğva və nəfsi pok kardeyro vey çokə vositəy.

Bə həmonə dəlili xoto,ın ayəon bəşəvnəy bəyji mandey,şəvi nımoj və  Kərimə-Ğıroni tilovəti əhəmiyyət,qıləy zəmon ki,ğafilon hanədən,rosnedə.bəşəvnəy iyən sıbi vaxti ibodət,qıləy fovğəladə əsər və təsir bə insoni rufi noydə və inson ıştə nəfsi,ğəlbi pok və çəy con iyən dılədə bıə təğva zumand kardedə.min cumlə İmom Sadığ(ə)-iku rəsə qıləy hədisədə omə:”seqlə çi ilahi məxsusə inoyət və lutfonkuye:bəşəvnəy ibodət,bə rujə qətəkəson iftor doey və ıştə mısılmonə bıvə muloğat kardey”.

Muzzəmmili mıborəkə surə 9-ə şərifə ayə buzurquvarə peyğombəriku(s) piyedə ki,çı şərğ iyən ğərbi pərvərdıqor bıə Xıdo boştə hıvoskə iyən vəkil bıvıjno.

In ayə həmmə koonədə bə Xıdo təvəkkul kardey və koon bəçəy ehdə noey bəyon kardedə.qıləy Xıdovənd ki,çı aləmi şərğ iyən ğərbi yəni çı hestemoni aləmi hukumət çəy seytərə və təsəlluti jiyədəy və fəğət əy bo pərəstışiro  ləyoğətinə məbud zıneydə.bəpe dığğət kardey bıbu ki,har qıləy ğudrət ki,insoni ixtiyorədə ğərolış qətə,çı Xıdokuye.çən,çokonə inson bə sabit nıbə ğıvvə təkyə bəkarde.qıləy holədə ki,zıneydə çəy hestemon iyən çəy ğudrət həmmə Xıdokuye və bə Xıdo ayide və hiçvaxti həyğiyə malik bıəni və nibəbe.

Bə Xıdo təvəkkul iyən etımod,hestmoni aləmi həyğiyə Xalıği zıneye.ehanə inson Xıdovəndi ıştə malik və ixtiyori soyb bızıno,həni əv bə cokəson soyəx nibəşe və bə hiçk kəsi səmt ıştə dasti oj nibəkarde.əmə yəğınə formadə bə Xıdo xotırcəmətimon bıbu və ıştə ruf iyən rəvoni de Xıdovəndi zikri zumandkəmon,çəmə daxili imoni boğ.hejo havz və kavu bəbe...