Osmoniyə surəon-245

Osmoniyə surəon-245

Həmçinin,bə Kərimə-Ğıroni ğiroəti təkid kardey,de ın bəşəvnəy bərnomə əsliyə mətni bəçəy xotoye ki,ım osmoniyə kitob lozım bıə qırd dərson insoni ıştə səpe koy kardey zəminədə şomil bedə və ımi bo imon,istiğomət,təğva və nəfsi pok kardeyro vey çokə vositəy.

Bə həmonə dəlili xoto,ın ayəon bəşəvnəy bəyji mandey,şəvi nımoj və  Kərimə-Ğıroni tilovəti əhəmiyyət,qıləy zəmon ki,ğafilon hanədən,rosnedə.bəşəvnəy iyən sıbi vaxti ibodət,qıləy fovğəladə əsər və təsir bə insoni rufi noydə və inson ıştə nəfsi,ğəlbi pok və çəy con iyən dılədə bıə təğva zumand kardedə.min cumlə İmom Sadığ(ə)-iku rəsə qıləy hədisədə omə:”seqlə çi ilahi məxsusə inoyət və lutfonkuye:bəşəvnəy ibodət,bə rujə qətəkəson iftor doey və ıştə mısılmonə bıvə muloğat kardey”.

Muzzəmmili mıborəkə surə 9-ə şərifə ayə buzurquvarə peyğombəriku(s) piyedə ki,çı şərğ iyən ğərbi pərvərdıqor bıə Xıdo boştə hıvoskə iyən vəkil bıvıjno.

In ayə həmmə koonədə bə Xıdo təvəkkul kardey və koon bəçəy ehdə noey bəyon kardedə.qıləy Xıdovənd ki,çı aləmi şərğ iyən ğərbi yəni çı hestemoni aləmi hukumət çəy seytərə və təsəlluti jiyədəy və fəğət əy bo pərəstışiro  ləyoğətinə məbud zıneydə.bəpe dığğət kardey bıbu ki,har qıləy ğudrət ki,insoni ixtiyorədə ğərolış qətə,çı Xıdokuye.çən,çokonə inson bə sabit nıbə ğıvvə təkyə bəkarde.qıləy holədə ki,zıneydə çəy hestemon iyən çəy ğudrət həmmə Xıdokuye və bə Xıdo ayide və hiçvaxti həyğiyə malik bıəni və nibəbe.

Bə Xıdo təvəkkul iyən etımod,hestmoni aləmi həyğiyə Xalıği zıneye.ehanə inson Xıdovəndi ıştə malik və ixtiyori soyb bızıno,həni əv bə cokəson soyəx nibəşe və bə hiçk kəsi səmt ıştə dasti oj nibəkarde.əmə yəğınə formadə bə Xıdo xotırəcəmətimon bıbu və ıştə ruf iyən rəvoni de Xıdovəndi zikri zumandkəmon,çəmə daxili imoni boğ.hejo havz və kavu bəbe.

Muzzəmmili mıborəkə surə ayəon ibaxş bə miadi mevzu işorə kardedə və hamyedə ki,ğıyoməti ruji nezi maddi nizomiku iborət bıə ın dınyo bəyənde bəqıniye.Kərimə-Ğıron çandə qılə surəonədə çı zəmini vey ğoymə əczoonku iborət bıə bandon bəyənde qıniyə mıxtəlifə mərhələon bəyon kardedə.Muzzəmmili mıborəkə surə 14-ə şərifə ayədə bə həmonə prosesi oxonə mərhələ işorə kardedə və hamyedə:”qıləy ruj ki,zəmin iyən bandon bəlarzen və bandon bənə huşə təpə cəm bəbeyn”.

Muzzəmmili mıborəkə surə 17-ə şərifə ayə bə coqləyni xısusiyyəton işorə kardedə və hamyedə: ”Ğıyəmət,qıləy ruje ki,hırdəon iyən nevcıvonon həmonə ruji piy bəbeyn.bın ruji ziyodə mısibət, saxtəti iyən bəloon bo insoni qon dəbəvarde.həmonə ruji saxtətiyon vey və maqiku qıləy xəbə ni.əzob iyən piy bıey heste,əmmo hiçkəs nibəmarde.bə saxtəti iyən əzob-əziyyəti şiddəti xoto, qıləy dırozə ruje ki,Xıdovənde-Təala çəy barədə hamyedə:”ha məxlğ ha! bə təğva rioyətkənən ki,ğıyoməti zuhuri zəlzələ,əzime( vey dıjde).həmonə ruji dardo-bəlo və mısibəton şiddət,bəçəy xotoye ki,insoni bo ıştəni həmonə mısibəton mığobilədə oqətey və hifz kardeyro bıə qırd zu və imkonaton çəy dastiku xaric bəbe və əv təşnə,vəşyan iyən harçiku məhrum bıə holədə bəbe və ğıyoməti ruji tars və dəhşətiku hiç qıləy əminyyətış nibəbe.həmonə ləzə və anonədə çəy yeqanə sərmoyə,bə xıdovəndi bıə ğəlbiyə imon və saleh və çokə əməlonış bəbe.həmonə ruji deməkə ki, çəy mıddət kam bəbe,əmmo həmonə ruj bo insoni vey saxt iyən vey dıroz dəbəvarde.