Osmoniyə surəon-246

Osmoniyə surəon-246

Muzzəmmili mıborəkə surə 17-ə şərifə ayə bə coqləyni xısusiyyəton işorə kardedə və hamyedə: ”Ğıyəmət,qıləy ruje ki,hırdənon iyən nevcıvonon həmonə ruji piy bəbeyn.bın ruji ziyodə mısibət, saxtəti iyən bəloon bo insoni qon dəbəvarde.həmonə ruji saxtətiyon vey və maqiku qıləy xəbə ni.əzob iyən piy bıey heste,əmmo hiçkəs nibəmarde.bə saxtəti iyən əzob-əziyyəti şiddəti xoto, qıləy dırozə ruje ki,Xıdovənde-Təala çəy barədə hamyedə:”ha məxlğ ha! bə təğva rioyətkənən ki,ğıyoməti zuhuri zəlzələ,əzime( vey dıjde).həmonə ruji dardo-bəlo və mısibəton şiddət,bəçəy xotoye ki,insoni bo ıştəni həmonə mısibəton mığobilədə oqətey və hifz kardeyro bıə qırd zu və imkonaton çəy dastiku xaric bəbe və əv təşnə,vəşyan iyən harçiku məhrum bıə holədə bəbe və ğıyoməti ruji tars və dəhşətiku hiç qıləy əminyyətış nibəbe.həmonə ləzə və anonədə çəy yeqanə sərmoyə,bə Xıdovəndi bıə ğəlbiyə imon və saleh və çokə əməlonış bəbe.həmonə ruji deməkə ki, çəy mıddət kam bəbe,əmmo həmonə ruj bo insoni vey saxt iyən vey dıroz dəbəvarde....

Muzzəmmili mıborəkə surə 20-ə ayə çın surə həmməysə vey dırozə ayəy və bə çandə qılə mevzu və məsələ  işorə kardedə.muminonku idastə bəşəvnəy ibodətonədə de peyğombər(s)-i bə ico bin.zira,bə islomi zuhuri sıftənə soronədə bıə şərayiti xoto,əvon həm de Kərimə-Ğıroni tilovəti məşğul bedəbin ki,bəvədə çandə nev əğedəvi,əməli iyən əxloği dərson mevcud be və həmçinin de şəvi ibodəton vositə əvon ıştəni komil kardey iyən bo islomi təblığ və əy mıdofiyə kardey dumo bin.əmmo,mısılımonku idastə şəvi i nimə və ya sedə ihissə hisobi oqəteyro bə dardı-sər və işkalon dıço bedəbin və ım ko boyis bedəbe ki,qahi vaxti əbvon qıərd şəvi oğo bımandon və de ibodəti koy məşğul bıbon.joqo ki,bəşəvnıəy ğıyom iyən sapoysə mandey xoto, hətto çəvon lınqon həm pandoməbe.liza,Xıdovəndi bın hukmədə bəvon təxfifış doe və sıvıkış qətevə hamyeşe:”Əv,zınedə ki,şımə çəy mığdori(bo ibodətiro de dığğəti)pamuey əzıniyon. çən, şımənış baxşe(əfvış karde)ısət çanədə kardey bızniyon Ğıron bəhandənən”.həlbəttə,ım Ğıron handey bəpe de tədəbbır iyən təfəkkuri bə ico bıbu.bəçəy xoto,İmom Rıza(ə) hamyedə:”anədə Ğıron bəhandənən ki,bəvədə ğəlbi xuşu,botıni səfo iyən qıləy ruhani və mənəviyə əhvol-ruhiyyə bıbu”...

Ayəon dəvomədə insoni bo ıştəni komil kardey xoto bıə qıləy hartərəfinə bərnomə və proqramiku bəhs kardedə və hamyedə:”və nımoji bərpokənən və zəkoti pərdaxtkənən,bıdənən və bə Xıdo ğarzul-həsənə bıdənən(çəy royədə infoğ,baxşkənən)və(bızınən ki) şımə ıştə vığandə çokə koon Xıdovəndi nəzdədə de vey çokə formə və de vey yolə mıkofoti bəvindeyon və Xıdovəndiku məğfırət tələbkənən ki,Xıdovənd əbaxş iyən mehribone”.

Ayə oxoyədə Xıdovəndiku “istiğfor”-i  yəni baxşey tələb kardey kəlmə zikr bıə ki,mumkine ın  məsələ bımi işorə kardedə ki,məbodə şımə de ın ibodət iyən itoəton ıştəni qıləy komilə inson bızınon və məğrur bıbon,bəlkəm hejo bəpe şımə ıştəni çı Xıdovəndi mığobilədə hırd və qədə hisobkon və hejo bəçəy dərqo səmt dim bıqətiyon....

Muddəssiri mıborəkə surə Məkkədə nozil bıə və 56 qılə ayəku iborəte.Muddəssiri mıborəkə surə bə peyğombər(s)-i ə həzrəti ıştə dəvəti oşko kardey bədiqə nozil bıə iminə surəy və Məkki surəon xısusiyyətonku ıme ki,bə məbdə və miadi iyən de şırki mıborizə bardey dəvət və ıştə mıxolifon de ilahi əzobi təhdid kardeyku iborəte və qırd ımon bın mıborkə surədə inikas bıə.

Muddəssiri mıborəkə surədə bıə mevzuon çımiku iborəte:peyğombər(s)-i dəvətiəsliyə mehvər və usuli şərh,miad iyən ğıyoməti ruji həxədə bıə mətləbon,mutəkəbbir və yoləşəxə insoni nışonəon,çı insoni əməlon deçəy tale əloğədor bıey,vəhışti əhli xısusiyyəton,cəhəndımi hıvoskəon və ilahi əzobi məmuron.