Osmoniyə surəon-247

Osmoniyə surəon-247

Muddəssiri mıborəkə surə Məkkədə nozil bıə və 56 qılə ayəku iborəte.Muddəssiri mıborəkə surə bə peyğombər(s)-i ə həzrəti ıştə dəvəti oşko kardey bədiqə nozil bıə iminə surəy və Məkki surəon xısusiyyətonku ıme ki,bə məbdə və miadi iyən de şırki mıborizə bardey dəvət və ıştə mıxolifon de ilahi əzobi təhdid kardeyku iborəte və qırd ımon bın mıborkə surədə inikas bıə. Muddəssiri mıborəkə surədə bıə mevzuon çımiku iborəte:peyğombər(s)-i dəvətiəsliyə mehvər və usuli şərh,miad iyən ğıyoməti ruji həxədə bıə mətləbon,mutəkəbbir və yoləşəxə insoni nışonəon,çı insoni əməlon deçəy tale əloğədor bıey,vəhışti əhli xısusiyyəton,cəhəndımi hıvoskəon və ilahi əzobi məmuron. Muddəssiriku mənzur və məğsəd ə kəse ki,təcrid bıə və camaatiku bə kəno mandə və coyli jimon kardedə.sıftənə ayə Xıdo-Rəsul(s)-iku dəvət kardedə ki,çı mıxolifon ihonət,təhğır və hoziyətiku ğəmqin nıbu,çı inzivo və təcridiku beşo və de qıləy rasix iyən ğoymə əzmi de Xıdo bandəon tars doey və hidoyəti koy məşğul bıbu. Muddəssiri mıborəkə surə sıftənə ayəon muhimmə dəsturon və fərmonon bə tohidi ehtırom noey əmr kardedə və buzurquvarə peyğombər(s)-iku tələb kardedə ki,ıştə pərvərdıqori yol bızıno,həmonə Xıdo ki,malik iyən perosnəkəse və de ın tərtibi bə qırd duyə məbudon sape qıləy sıə xətt kəşeydə və harcurnə şırk iyən bıtpərəsti əsəron məhf kardedə.ayəon bə ın həyğəton işorə kardedə ki,bəpe vohidə Xıdo,etığod iyən əməli nəzəku və həmən sıxani nəzəku yol hisob kardey bıbu və əy bəpe cəmol sıfəton və noxsan iyən aybonku pok iyən mınəzzəh zıneydə və hətto pərvərdıqore-aləmi həmonə sıfətonku bəpe zınedə.çən,çı nopokətiyonku təmiz kardey əmr kardedə və əlovə kardedə ki,ıştə libos və oləti pokkə,təmizkə.mıfəssir iyən təfsirəvonon nəzəku de libosi təbiri mumkine çı insoni əməliku kinoyə bıbu.çıro ki,çı hakəsi əməl çəy libos iyən oləti mənoədəy.bəziyon həm votəşone ki,libosiku mənzur iyən məğsəd iyo ğəlb,ruf iyən cone.yəni ıştə ğəlbi harcurnə mırdolətiyonku pokkə.qıləy vırədə ki,bəpe olət təmiz bıbu,çı libos və oləti soyb bəsə həmməysə bənave.kali qıləyniyon həm de həmonə zohiri libosi təbir kardəşone.çıro ki,zohiri libosi pokəti çı şəxsiyyət,tərbiyət və mədəniyyəti muhimmə nışonəonkuye. Muddəssiri mıborəkə surə 7-ə ayə peyğombər(s)-iku bəştə pərvərdıqori xoto,səbr kardey iyən tov vardey tələb kardedə və çı mışrikon iyən nodonə deşmınon əzob-əziyyəton mığobilədə mığovimət nışon doeyış piyedə.ım əmr itərəfo çımi nışonəy ki,çanədə qıləy sanqinə bo bə peyğombər(s)-i duş və ami noey bıə ki,ğərəz ilahi himoyəon əy peqətey ğeyri-mumkine.co tərəfiku həm ruşin bedə ki,hətto Xıdo bənə peyğombər(s)-i bıə vey komil iyən vey loyığinə bandəon həm bə Xıdo ehtiyocişon heste.bəlkəm,rujbəruj bəçəvon ehtiyocon əlovə bedə.tosə əvrə ki,ıştə məbudi mığobilədə boştə hiç qıləy əsolət,əsləti və orijinaləti ğayil nin.əvoni bə mığoviməti səmt dəvət kardey həm boçəy xotoye ki,çı hidoyət və təblıği roy sərmoyə həmməysə muhimə qıləyni,səbr iyən tov vardeye.səbro-hovsələ çı qırd bərnomə və proqrami əsos və icro kardey zamine.liza,Məcidə-Ğıron çandə kər bəy təkid kardedə və bə həmonə dəlili xotoye ki,Əli(ə) hamyedə:”bə imoni nisbətədə səbr və istiğomət,bənə sə bə bədəmi nisbətədəy”. və bə həmonə dəlili xoto,Xıdo ovliya iyən peyğombəron vey muhimmə sıfətonku qıləyni,səbr.istiğomət və tov vardey bıə.bə buzurquvar və yolə insonon çanədə həm saxtəti.şiddət və sanqinəti həm varid bedəbe,ijən əvon qırd çıəmon mığobilədə sərbr kardedəbin iyən tov vardedəbin. İslomi Pyeğombər(s)-iku nəğl bıə:Xıdovənd hamyedə ki,bəçımı banqəonku qıləyni deçəy con, mol iyən fərzəndi mısibət rəseyədə və əv bımi çokə səbr kardeyədə ,az həyo kardedəm ki, ğıyoməti ruji boçəy əməlon pamyuero mizon ğərol bıdəm və ya çəy noməye-əmali ojkəm”. Muddəssiri mıborəkə surə ayəon dəvomədə handedəmon:”əv,(de Ğıroni mıborizə bardero) fik-fam kardeşe və mətləbonış hozzı karde.maq bıbu bəy ki,çokonə(bo de həxı mıborizəro) mətləbış hozzı karde.ijən maq bıbu bəy ki,çokonə (boştə şəytoniyə nəxşəonro) mətləbış hozzı karde.peşo qıləy nəzəş karde.peşo ıştə diyənonış ekarde və rəyrə de ko məşğul be.peşo(bə həxı) peştış karde və təkəbbır(yoləşətiş) karde.və oxoyədə voteşe ın(Ğıron) bənə navkonəyon cəlbəkə sehrisə co qıləy sehr ni.ım sıvoy inoni sıxani co çi nibəbe”.(18-25).