Osmoniyə surəon-249

Osmoniyə surəon-249

”Muddəsiri mıborəkə surə ayəonku ibaxş bə yəmini əshobi iyən bəçəvon tərəf mığobili şərhe-holi işorə kardedə və hamyedə:”əvon çı vəhışti boğonədən və çı mucrimon(qınokoronku) sıvol bəkardeyn ki,kon çi şımənış bə cəhəndımi varid kardəşe?”.mucrimon bə çın sıvoli cəvobədə bəştə qıno etırof kardedə.sıftədə hamyedə ki,əmə çı nımojəvotonku nıbimon.ehanə nımojımon votəbe,nımoj Xıdo bəçəmə yod dəğandedə və nəhy əz fəhşo iyən munkər kardedə və əməni bə ilahi sıratəl mustəğimi səmt dəvət kardedə.

Coqləyni ıme ki,”Əmə bə ehtiyocinə fərdon təam(hardemon) doydənıbimon.bə msikini itam və xorək doey harçənd bə ehtiyocin və məhrumə fərdon hardemon doey mənoədəy,əmmo zohirən çəyku məğsəd bə həmonə fərdon harcurnə zəruri komək kardey mənoədəy,ısət çı hardemon, tankardemon və məskəni muşkilon bıbu və məğsəd həm vocibi zəkote.çıro ki,mustəhəbbə infoğ iyən baxşeşon tərk kardey,bə cəhəndımi daxil bıey boyis nibəbe.cəhəndımi əhl bəvoteyn:”və dayima de botıli əhli həmnışin və həmsədo bimon və hejo cəzo ruji inkor kardedəbimon ta qıləy zəmon ki,çəmə maqi zəmon ome rəse”.

Im votemonon nışon doydə ki,nımoj,zəkot,de botıli əhli həmnişinəti tərk kardey və bə ğıyoməti ruji imon vardey,çı insoni tərbiyə,perəsey və hidoyətədə fovğəl-addə əhəmiyyət və rolış heste. bəçəy xoto,”şəfoətəkəyon şəfoət bəçəvon holi hiç qıləy foydəş nibəbe” və bəpe əvon əbədi ilahi əzobədə bımandon.çıro ki,şəfoəti bə qıləy çok və munbitə şərayiti ehtiyociş heste və ım qınokoron zəminəonışon kulliyə formaədə çı miyoniku bardəşone.şəfoət bənə qıləy zulol və pokə oviye ki,bəsə qıləy zəyifə toğəsə ru kardey bedə və bədihi iyən təbiiyiye ki,ehanə həmonə toğə qırd hışk bıəbu,həmonə zulolə ov əy bəyji nibəkarde.

Imi həm votey lozıme ki,şəfoəti şərtonış həm heste və bo bə qınon mırtəkib bıə kəson qıləy havzə ço məhsub bedəni.bəlkəm bo insaoni qıləy tərbiyəviyə amile.

Ğıyoməti mıborəkə surə Kərimə-Ğıroni hafto-pencminə surəy,Məkkədə nozil bıə və 40 qılə ayəku iborəte.çoko ki,çın surə nomiku məlume,çəy bəhson həm çı miad iyən ğıyoməti ruji mevzu həxədə bəhs kardedə və fəğət çandə qılə ayə həm mevcude ki,çı Kərimə-Ğıron iyən əy təkzibəkəyon barədəy.

In surə de bə ğıyoməti ruji iyən bə insoni oğo və  mızəmmətəkə vijdoni ğəssəm hardey təkid kardedə ki,ğıyoməti ruj həxe və qırd şımə ğıyoməti ruji bəyji kardey bəbiyon və bəştə əməlon cəzo bərəsiyon.çın dıqlə ğəssəmi irtibat və rabitə bımədəy ki,əmə ıştə əxloği vijdoni vucudiku ğıyoməti vucudi sərəsəmon və dərkkəmon inson qıləy çokə bə vırə rosneyədə ”vicdoni məhkəmə” insoni coni dılədə se şoyvonəti pur bedə  və de ın roy vositə bəy mıkofot doydə və əv bə qıləy cinoyət və yavə koy mırtəkib beyədə,çəy ruf çı təzyiği jiyədə bedə və cəzo doydə. joqo ki,əv bo vijdoni çı əzobiku nicot doeyro intihor kardedə və ıştəni kıştedə.ın surə dığğət kardedə ki,çı insoni vucudi dılədə bıə qədə dınyoədə qıləy qədə məhkəmə mevcude.çən, çokonə ğəbul kardey bəbe ki,de qırd əzəməti pur bıə bın yolə aləmədə qıləy yolə ədolətinə məhkəmə mevcud nibəbe?...

“Aya inson fik kardedə ki,hiçvaxti çəy astəon cəm kardey nibəbe?bəle,əmə çəy aqnıştə (rizon) həm  (ijən) sərost bəkardemon”.(3-4).

Təbiiyie ki,Kərimə-Ğıron qıləy elmi kitob ni.əmmo,ıştə həmməysə barzə hədəfi real və təhəğğuğ kardey royədə yəni insoni hidoyət və bə ğeybi aləmi imon vardey koyədə,çı nuroniyə ayəon miyono qahi zəmon bə zərifə nuktəon işorə kardedə ki,çandə ğərn və əsron dəvardey bədiqə,bə insoni ecoz və təəəccıbi boyis bedə.həmmə insonon anqıştə rizon miyon tafut heste və çəvon riz və xətton hətto dıbıl həm bıbon,bənə iyande nin və qıləy formaədə qırd dınyoədə har qıləy fərdi şəxsiyyəti təyin kardedə.Kərimə-Ğıroni bə bımyon anqıştə səon riz və xətton ijən sənibəton xılğəti işorə kardey bəçəy xotoye ki,insonon dərəson ki,Xıdovənde-Xalığ ğadire hətto insonon iyandeyku co kardə xısusiyyəton həm ijən sənibəton ofəyo,xəlğko.bo ağımandə şəxson həmonə ım işorə kifoyət və vəs kardedə ta yəğınışon bıbu ki,vohidə Xıdo,hikməti soybe və maqi bədiqə bıə həyot və jimoni həxe.çoko ki,maq və mardey həx və həyğəte.