İlahi əsma və nomon-3
İlahi əsma və nomon-3
Dəvardə bərnoməonədə votemone ki,ilahi əsma və nomon bo Xıdovəndi çok zıneyroe.çıro ki, Xıdovndi zot bo həmmə kəsi puşniyə bıə və ğərəz Xıdo hiçki çəyku xəbəş ni.İmom Əli(ə) həm bo Xıdovəndi zoti zıney imkon nıbey və Xıdo vucudi və çəy bə qırd çiyon cəhəti komilə elmi əhotə həxədə Nəhcul-Bəlağə iminə xutbədə hamyedə:la yudrik.....həmonə Xıdo ki,bılındə fik iyən nığılə əndişə çəy zoti dərk kardey nibəzıne və ağılmandə ğəvvoson (elmi dıyo) bəçəy hestemoni kəmoli dast pəydu kardey nibəzneyn”.yəni fəğət Xıdo ıştən çoko ki,bəpe bıbu bəştə zoti mərıfətış heste.
Əmmo,inson de xılğəti nizomi sə təfəkkur kardey,Xıdovəndi bənə Xalığ, Rəzzağ, Şafi, Cəvad, Hadi,Malik iyən Kərimi bıə çokə sıfəton de tosə qıləy həddi zıney bəbe.binobərin harçənd ilahi zoti zıney imkonış nıbu,əmmo hakəs ıştə zərfiyyət və ğabiliyyəti mığdorədə ilahi əsma və sıfəton zıney bəbe.
Co tərəfiku dınyoədə əsər və xısusiyyəton əmə vindedəmon ialhi sıfət və nomon har qıləyni çəyku təsir peqətedə.liza,bə maddi iyən mənəvi tələbon har qıləyni dast pəydu kardeyro, Xıdovəndi deçəy həmonə hacəti mınosib nom iyən sıfəton vanqkəmon.məsələn,ikəs ki,çı ğudrəti dumoe,Xıdo de Ğəni nomi vanqko.və noxəş de Şafi nomi ıştə şifo tələb kardedə.vəikəs ki,ıştə yavə koonku peşmon bıə,boştə bə Xıdo səmti oqardero,de Təvvab nomi komək seydə.
Həmçinin,dəvardə bərnomədə işorə kardemone və votemone ki,qırd ilahi əsma iqlə mərtəbə və məğamədə nin,bəlkəm,Xıdovəndi bənə Xalıi bıə kali nomon qıləy hevujə mənoş heste və çandə qılə ilahi nomon çəy məcmuə jiyədə ğərolış qətə.kali qıləyni bənə Şafi(şifoədə) vey cuziye və tanqə mənoş heste.əmmo,Allah kəlmə çı qırd ilahi əsma və nomon miyono qıləy hevuj və yolə mənoş heete....
Xıdovəndi Rəhmoni nom həm bənə Allah nomi qıləy hevujə mənoş heste.liza,Xıdovənd İsra mıborəkə surə 110-ə şərifə ayədə hamyedə:”Ğul udull... vuji:Xıdo de Allah nomi vanqkənən ya de Rəhmon nomi tafut(farğ) kardedəni.de har qıləyni vanqkon,(əvon)həmməysə çokə nomonin və çokə nomon həmmə bəy məxsuse”.
Rəhmoni kəlmə çı rəhmətiku peqətə bıə.rəhmət insonədə mehrbonəti iyən dıləsutəti mənoədəy. de qıləy co təbiri rəhmət inev ğəlbi şiddətinə hisse ki,ehson iyən bə cokəson çokəti kardeyədə təcəlli pəydu kardedə. əmmo,Xıdovəndi zotədə hiç qıləy əvəz bıey holət mevcud ni ki,bıvotəmon çəy dıl bə rəhm boy və dılış bısuto.rəhmət Xıdovəndi palu bənə qıləy yolə baxşeşəkə mənoədəy ki,bə hestemoni aləmi mevcudaton baxşış kardə.
Rəhmonə Xıdo bəştə zoti məhəbbət və mehrbonəti xoto,ruzi doydə,lozım bıə hidoyəti inoyət kardedə və bə kəmolaton iyən ozavziye roy rəsey nışon doydə və ıştə nemətonku bəştə bandə behisob əto kardedə.ın rəhmət həmonə rəhməte ki,Xıdovənde-Xalığ Ərafi mıborəkə surə 157-ə şərifə ayədə hamyedə:”və rəhməti vəsiət kullə şəy-çımı rəhmət həmmə çiş dəqətə”.
Çın rəhməti kənoyədə inev coqləyni rəhməti həm ğərolış qətə ki,çəy nom həm Rəhime və fəğət bə insonon şomil bedə ki,deştə imon iyən salehə əməlon roy vositə ıştənışon çı İlahi məxsusə rəhməti nəsimi mə`rəzədə ğərolışon doə.qıləy rəvoyətədə İmom Sadığ(ə)-iku handedəmon: ”vəllahu....Xıdovənd çı həmmə çi mə`bude,bəştə qırd məxloğati nisbətədə Rəhmone və bə muminon nisbətədə rəhime”....
Kulliyə formaədə Xıdovəndi qıləy umumiyə rəhmətış hesdte ki,bəy rəhmaniyyə rəhmət və həmçinin qıləy məxsusə rəhmətış heste ki,bəy rəhimiyyə rəhmət votedən.rəhmon həmonə behisobə mehrbonətiye ki,bə qırd dust-deşmon,mumin iyən kofiri və bə çokə ko soyb iyən yavə ko soybon,cın və insi nəbotat,cəmodat iyən heyvonon şomil bedə.
