Osmoniyə surəon-255
Osmoniyə surəon-255
Mursəlati mıborəkə surə Kərimə-Ğıroni hafto-haftminə surəy,Məkkədə nozil bıə və 50 qılə ayəku iborəte.Mursəlati mıborəkə surə əsliyə məhvər və mevzu,bə ğıyoməti ruji ayid məsələon və həmonə ruji inkorəkə kəson inzar və torsıneye.bın surədə həmçinin zikr bıə coqlə mevzuon çımiku iborətin:navkonə ğovmon ğəmənqizə sərquzəşton,insoni xılğəti xısusiyyəton və zəmini sape bıə İlahi neməton.Mursəlati nom bo ın surə boçəy xoto vıjniyə bıə ki,çın surə sıftədə omə və Mursəlatiku murad və məğsəd həm firiştə və mələkonin ki,dumo yənde bo ilahi vəhyi vardero bə pəyğombəron səmt vığandey bedən və ya vığandə bıə tındə vo-vavazon.bın surədə bə ğıyoməti ruji dığğət kardə holədə,mukərrərən və tikrorinə surətədə bə təkzibəkəyon tars doey bıə.”vəylun yəovməizin –vay bıbu bə ruji bo təkzibəkəyon”-da kərə Mursəlati mıborəkə surədə tikror bıə.
“Ğəssəm bə firiştəon(ya vavazon)ki,dumo yənde vığandey bedən və əvon ki,bənə tındə vo hərəkət kardedən və ğəssəm bəvon ki,(avəon) hovuj kardedən və əvon ki,co bedən və ğəssəm bəvon ki,(ilahi)oğoəkə ayəon(bə pəyğombəron)ilğa kardedən”.(1-5).
Mursəlati mıborəkə surə iminə ayəonədə bə vavaz və tufoni ğəssəm hardey həm zikr bıə və ım bəçəvon xılğəti aləmədə bıə muhimmə roli xotoye.əvon avəon bə hərəkət vardedən və peşo çəvon de hışk iyən mardə zəmini miyono rabitə bərğərol kardedən və çı voşi nozil bıey bədiqə əvoni co və pevolo kardedən.çən,çı beməyon tum və donəon vırə bə vırə kardedən və cənqəlon və bılındə vıron bə əməl vardedən və bə vıl iyən miyvəon veyni səmərə və bar doydənvə vo və vavazon tojə iyən de oksigeni pur bıə həvo çı məzə və səhroonku bə şəhər vardedən və nopok və notəmizə həvoon bo təsfiyə və təmiz kardero bə səhro iyən cənqəlon vığandedən.dıyo ovon təlatumin kardedən və bo bəyjiyə məxloğati əy de oksigeni pur kardedən.həyğətədə,vo-vavaz və nəsimon bə inson iyən dınyo qıləy dıjd və həyoti xıdməton nışon doydən.
Çın ğəssəmon coqləyni baxş ki,de firiştə və mələkon vositə vəhyi nozil bıeyku sıxan votedə, həmçinin bə vo iyən bəçəy maddi aləmədə bıə nəticəon şəbohətış heste.firiştə və mələkon vəhyi kəlməon bənə voşi ğətrəon bəyji kardedən və ilahi pəyğombəron ğəlb və dılon nozil kardedən.əvon ilahi maarif və təğva vıl iyən miyvəon ğəlbonədə perosneydən və de ın tərtibi Xıdovənde-Xalığ Mursəlati mıborəkə surə sıftədə həmə bə maddi aləmi murəbbi və perosniyə kəson və həmən bə mənəvi aləmi perosniyə kəson ğəssəm hardedə.əmmo,qırd ım ğəssəmon bo qıləy mətləbiye ki,haftminə ayədə bəy işorə bıə və əv həm çımiku iborəte:”bəşmə(ğıyoməti ruji) və`də doey bıə çi yəğınən vağe bıənine”. Səvob,uğubət,hisob,mizon,vəhışt iyən cəhəndım qırd ımon həxe və bəvədə hiç qıləy tərdid və şəkk ni.coqlə nuktə ki,iyo bəy işorə bıə,qıləy dıjdə əvəzon bə əməl omeye ki,dınyo aləmi oxoyədə və axırəti ruji astanədə bə əməl bome.şiddətinə tufon,buməlarzə və bənə astovəon okuşey iyən məhf bıey bıə dəhşətinə hodisəon,osmoni kurəon poə bıey və bandı-kuon ıştə vırəku beşey min cumlə çə vəhşətnokə hodisəonkuon.çın dıjdə hodisəon dəvomədə ğıyomət bərpo bəbe və bımyon iyən mardə kəson bəyji iyən ilahi ədolətinə məhkəmədə hozzı bəbeyn.həmonə məhkəməon ki,firiştə və mələkon çı bəşəri noməye-əmali nəşr bəkardeyn,çı muminon de kofiron səf və cərqə co bəkardeyn və çı har dastə həxədə ilahi hukmon elon bəkardeyn.bın zəmon peyğombəron novbə-novbə boştə umməti həxədə bo şəhodətiro hozzı bəbeyn.ın ruj həxı çı botıliku co kardə ruje.qıləy ruj ki,muminon kofironku,çokə ko soybon çı yavə ko soybonku co bəbeyn və çı həmmə kəson mutləğə həxı tərəfiku həxədə mıhokimə bəbeyn.bə ruji vay bıbu bo təkzibəkəyon.
