Osmoniyə surəon-256
Osmoniyə surəon-256
Çın ğəssəmon coqləyni baxş ki,de firiştə və mələkon vositə vəhyi nozil bıeyku sıxan votedə, həmçinin bə vo iyən bəçəy maddi aləmədə bıə nəticəon şəbohətış heste.firiştə və mələkon vəhyi kəlməon bənə voşi ğətrəon bəyji kardedən və ilahi pəyğombəron ğəlb və dılon nozil kardedən.əvon ilahi maarif və təğva vıl iyən miyvəon ğəlbonədə perosneydən və de ın tərtibi Xıdovənde-Xalığ Mursəlati mıborəkə surə sıftədə həm bə maddi aləmi murəbbi və perosniyə kəson və həmən bə mənəvi aləmi perosniyə kəson ğəssəm hardedə.əmmo,qırd ım ğəssəmon bo qıləy mətləbiye ki,haftminə ayədə bəy işorə bıə və əv həm çımiku iborəte:”bəşmə(ğıyoməti ruji) və`də doey bıə çi yəğınən vağe bıənine”. Səvob,uğubət,hisob,mizon,vəhışt iyən cəhəndım qırd ımon həxe və bəvədə hiç qıləy tərdid və şəkk ni.coqlə nuktə ki,iyo bəy işorə bıə,qıləy dıjdə əvəzon bə əməl omeye ki,dınyo aləmi oxoyədə və axırəti ruji astanədə bə əməl bome.şiddətinə tufon,buməlarzə və bənə astovəon okuşey iyən məhf bıey bıə dəhşətinə hodisəon,osmoni kurəon poə bıey və bandı-kuon ıştə vırəku beşey min cumlə çə vəhşətnokə hodisəonkuon.çın dıjdə hodisəon dəvomədə ğıyomət bərpo bəbe və bımyon iyən mardə kəson bəyji iyən ilahi ədolətinə məhkəmədə hozzı bəbeyn.həmonə məhkəməon ki,firiştə və mələkon çı bəşəri noməye-əmali nəşr bəkardeyn,çı muminon de kofiron səf və cərqə co bəkardeyn və çı har dastə həxədə ilahi hukmon elon bəkardeyn.bın zəmon peyğombəron novbə-novbə boştə umməti həxədə bo şəhodətiro hozzı bəbeyn.ın ruj həxı çı botıliku co kardə ruje.qıləy ruj ki,muminon kofironku,çokə ko soybon çı yavə ko soybonku co bəbeyn və çı həmmə kəson mutləğə həxı tərəfiku həxədə mıhokimə bəbeyn.bə ruji vay bıbu bo təkzibəkəyon...
Iyo təkzibəkəyon ə kəsonin ki,ğıyoməti inkor kardedən.muhimmə nuktə ıme ki,ikəs ki,bə ğıyomət,bə ilahi ədoləti iyən bə hisob-kitobi imonış nıbu,de hostonə formə bə zılm,qıno iyən fəsodi mırtəkib bəbe.əmmo,bə həmonə ruji bıə ğoymə imon,bə insoni təəhhud, təğva, məsuliyyəti hiss və pərhizkorəti baxşeydə.liza,ayəon de mıxtəlifə roon vositə bə ğıyoməti ruji inkor kardə kəson çəşnavi və xəbərdorəti doydə və əvoni bə dəvardə torıxi bardedə və çı nunkur iyən kofirə ğovmi ağıbəti bəçəvon quşon rosnedə və hamyedə:”aya əmə sıftənə (qınokorə) ğovmon (ki,kofirəti roşon qətəbe)həlok nıkardemone.peşo coqlə(qınokoron)çəvon dumo vığandemone.(bəle)jıləvoni de qınokoron rəftor kardedəmon”.(16-18)həmonə ğovmon əsər-əlomət ısət bəsə zəminədə bıə torıxi səyfəonsə ıştəni nımoyiş kardedə.
Mursəlati mıborəkə surə 20-ə şərifə ayə insonon bə dol və ruşeymi aləmi dığğət kardedə və Xıdovəndi əzəmət və ğudrəti və bın əsraramizə dınyoədə çəy neməton ziyodəti bəvon nışon doydə ta itərəfo miad iyən ğıyoməti ruji bərpo bıeyədə bə Xıdovəndi ğudrəti işorə kardedə və co tərəfiku həm inson ıştəni bə qırd ım ilahi neməton ğarzıxo zıneydə və bəy sə təzim kardedə.joqo ki,hamyedə:”aya əmə şıməmom qıləy exroc və beçizə oviku ofəyəmonni? Peşo əvımon oqətə bıə və hozzıə ğərolqoədə(rəhımədə)ğərol domone”.qıləy ğərolqo ki,çı insoni nutfə həyot, ozavziye iyən perəsey qırd şərayit əyo təmin bıə və qırd ımon vey əcib iyən dəğiğə formadə ofəyə bıə ki,har qıləy insoni bə təəccıb iyən çoçinəti vodor kardedən....
Xıdovəndi bın yolə dınyoədə bıə ayəon,nışonəon və neməton,bəçəy hevujə rəhmət və ğudrəti bəyon kardedə və həmçinin bə miadi imkon bıey qıləy dəlile və hamyedə:”aya əmə zəminımon çı insonon iştimo mərkəz ğərol nıdmone?.həm çəvon həyot və həmən maqi holədə”.(25-26).
Zəmin bo həmə insonon qıləy ğərolqohe və əyo jimon kardə kəson ıştə səpe cəm kardedə və zəmin çəvon qırd ehtiyocon çəvon ixtiyorədə ğərol doydə və çəvon bımyon həm ıştədə vırə doydə ki,ehanə zəminədə mardə insonon dəfn bıənəbe,ufunət və infeksiyə və çəyku bə əməl omə noxəşətiyon bo bəyjiyə kəson jimoniro qıləy faciyəvi hole.
