Zəncan,Huseyni həyəcon və dərki poytəxt

Imruj Məhərrəmə manqi həştminə ruje.ğıyom iyən xuni manq ki,bəvədə İmom Huseyn(ə) və çə həzrəti yaro-yavəron bə botıli ələyh həxə canqədə bə şəhodət məğami rəsin.Məhərrəmə manq de Huseyn ibn Əli(ə)  iyən deçəy əbədiyə ğıyomi anqıl qıniyə və çandə əsrone ki,dınyo mısılmınon bın rujonədə İmom Huseyn(ə) iyən çəy əbədiyə ğıyomi zikr kardedən və bo ə həzrəti ğıyomi bə yod dənoero əzodorə mərosimon bərpo kardedən.ironədə həm de qıləy məxsusə həyəcon iyən hisson bo İmom Huseyn(ə)-i bərpo kardedən və çın mərosimon İronədə qıləy nığılə rəğ-rişəşon heste.

Bo həzrəte İmom Huseyn(ə)-i Məhərrəmə manqi mərosimon bərpo kardey Ali-Buyə şiyə hakimon hakimiyyəti zəmonədə yəni Hicri-Ğəməri 320- 447 və Milodi 932-1055-ə soronədə ironədə bərpo bıə. əmmo,Ğəməri  907-1135-ə soronədə de Səfəviyyə silsilə zuhuri təşəyyu ki,İronədə rəsmi məzhəb elon be,Məhərrəmə manqədə sinəzəni,nərsiyyəxani və co əzodorəti mərosimon de ısətnə formə rəvocış pəydu karde və çəy bədiqə həm umum milli surətədə bo İmom Huseyn(ə) iyən çə həzrəti bəfodorinə yaro-yavəron və xanedani şəhodəti sorəqardışi ğeyd kardero İronədə pevolo be......

Məhərrəmə manqi mərosimon məxsusən Tasua və Aşurə ruji əzodorəti mərosimon bərpo kardey,çı şiəyon fərhənqi-məzhəbi mərosimonkuye ki,ha sor de umum millətiku iborət çı qıləy dıjdə dastə hərəkəti  ğolibədə İroni qırd vıronədə və həmçinin islomi veyə məmləkətonədə bərpo bedə.çun,ım mərosimon İroni həmmə vıronədə dəvordıney bedə,əve İroni har qıləy ğovm və milləton miyono de mıxtəlifə rəsm və adəton dəvordıney bedə.bın miyono Zəncani şəhr ki,de “Huseyni həyəcon və dərki poytəxt”-i nomi məşhure,ha sor Məhərrəmə manqi həöştminə ruji peşt çoştə sinə jıə əzodorə dastəon çın şəhri Ə`zəm Huseyniyyədə cəm bedən və de qıləy mislış nıbə eşğ və həyəconi nımoyiş kardey,ıştə bə imomət və nıbuvvəti xanedani məxsusən bə həzrəte Seyyiduş-Şuhəda(ə)-i bıə eşğ və məhəbbəti nışon doydən.......  

Zəncani şəhr ki,çı Zəncan ostani mərkəze,İroni şimol-ğərbi nahiyə və tərəfədə ğərolış qətə.torıxəvonon və arxeoloqon çın şəhri torıxışon de Ərdəşir Babək Sasani səltənəti zəmoni (224-242) bə ico zınəşone. İroni vey məşhurə torıxəvononku qıləyni Həmdullah Mostovfi ıştə əsəronədə Zəncani şəhri nomış ğeyd kardə.Əv,ım şəhrış çı Ərdəşir Babəki soxtə və inşa kardə şəhrış zınə.Zəncan ki,çı İroni vey ğədimi məntəğonkuye,dəvardə zəmononədə de Zənqan nomi zıney bıə və ısət həm çın kanə şəhri sakinon veyni bəy Zənqan votedən.Zəncani şəhri veyə torıxi iyən təbiiyi cozibədorə vıronış mevcudeki,çəvon miyono bə Zəncani çıl sutunə məçit,arxeoloji muzey və sayirə işorə kardey bəbe.ım ğəşənqə şəhr ıştə torıxi iyən turistikə cəizbədorəti kəno,ha sor Məhərrəmə manqi bə ironi şiəyon həmməysə dljdə məzhəbi və fərhənqi qırdbemon iyən hodisə şoyde...

Zəncani camaati bə şəhidon əğə İmom Huseyn(ə)-i qıləy məxsusə ehtırom və məhəbbətışon heste və Məhərrəmə manqi bə çın şəhri əhali miyono bıə veyə həyəconi xoto, ın şəhr ironədə de Huseyni həyəcon və dərki poytəxti nomi məşhure.bın şəhrədə məxsusən Ə`zəm Huseyniyyədə ha sor Məhərrəmə manqi iminə rujiku de tobə 13-ə ruji qıləy əzəmətinə əzodorəti mərosimon dəvordıney bedə ki,çəvon həm həmməysə əzəmətin və yolə mərosim həm Tasua şəvi yəni Məhərrəmə manqi həştminə rujiye.

Məhərrəmə manqi həştminə ruji Zəncani şəhr de “Yəvmul-Əbbas” yəni de Əbbosi ruji məşhure və bın ruji bo şəhidon əğə İmom Huseyn(ə)-i Aşurə ğəhrəmonon qıləy məxsusə əzəmətinə əzodorəti mərosim bərpo bedə.bın mərosimədə ki,çı bənə Ardəvil,şərği Azərbaycan,ğərbi  Azərbaycan, Ğəzvin, Ğom, Qilon,Tehron,İsfəhon,Xuziston və sayirə şəhronku həm iştirok kardedən,bo şəhidon əğə İmom Huseyn(ə)-i iyən bo ə həzrəti bəfodorinə əshobi qıləy yolə əzodorəti mərosim bərpo kardedən.joqo ki, ironıjə mısılmınonku əlovə,ətrofə kişvəronku məxsusən Az.Respublikəku həm şiyə mısılmınon bın əzodorəti mərosimədə iştirok kardedən.