Osmoniyə surəon-261
Osmoniyə surəon-261
Əbəsə mıborokə surə Kərimə-Ğıroni həştominə mıborəkə surəy ki,Məkkədə nozil bıə və 42 qılə ayəku iborəte.çın surə mehtəvo və məzmun çımonku iborəte:de həyğəti dumo bıə kuyə merdi nomınosibə rəftori xoto şiddətinə mızəmmət,Kərimə-Ğıroni əzəmət və çəy təlim doə həyğəton, insoni çı Xıdovəndi mığobilədə bəçəy əto kardə neməton nunkurəti və bə neməton kufr kardey, inson iyən heyvonaton hardemoni sahə iyən zəminədə ilahi neməton bəyon kardey,ğıyoməti ruji hodisəon və bə yolə ruji çı mumin iyən kofiron tale və sərnıvışt.Əbəsə nom bə çın surə sıftənə ayə xoto noey bıə.....
Ğureyşi yolonku i hissə çı peyğombəri(s) xıdmətədə bin və ə həzrət əvoni de bə islomi tərəf dəvət və təbliği koy məşğul be.Əv umudəvo be ki,çəy sıxanon bə bə həmonə mışrikon dılon təsir bıno.bın miyono zohirədə ku iyən fəğır bıə Əbdullah bin Ummu Məktum bə məclisi daxil be və çı peyğombəriku(s) tələbıəş karde ki,boəy çı Kərimə-Ğıroni ayəonku boəy tilovətko və bəy təlim bıdo.əv dayima və hejo ıştə sıxani tikror kardedəbe və orom bedə nıbe.Əbdullah bin Ummu Məktum anədə və əxtə ıştə sıxanış tikror karde ki,ə həzrət norohət be və çəy norohətçəti əsər və təsir çə həzrəti mıborəkə dim və çehrədə oşko be,peşo çəyku dimış qordıne və de Ğureyşi əşrafon bə Xıdo dini səmt dəvəti koy məşğul be.bın holədə Əbəsə mıborokə surə sıftənə ayəon nozil be və bə peyğombəri(s) xitob iyən ə həzrəti mızəmmət kardedə.ım hodisə nışon doydə ki,islomi din bə həxı roy anqıl qıniyə kəson məxsusən bə məzlum və zəyif bıə kəson məxsusə ehtırom noydə və insoni ehtıromi bə təğva,imon iyən fəziləti əsos zıneydə. bərəks,islom bə ilahi ziyodə neməton və veyə sərvət təsiri xoto,məst iyən məğrurə fərdon ələyh şiddətinə mevğıyyət qətedə və əvoni mızəmmət kardedə....
“Bımardo inson.çanədə kofir iyən nukure”!-cumlə ki,çın surə 17-ədə ayədə omə,bəyon kardedə ki,Xıdovənde-Xalığ bəçəy neməton kufr kardə iyən nunkurə fərdon xışm və ğəzəb kardedə.və çun qırd çı nunkurəti iyən noşukrəti sərçeşmə təkəbbırəti iyən məğrurətiye,əve bo ın məğrurəti darıştero hamyedə:”aya ğərəz ımiye ki,Xıdovənd əvış çı beçizə nurfəku ofəyəşe?çən,qırd ım tuğyongərəti və nunkurəti boçiye?”.
Əbəsə mıborokə surə 24-ə ayədə insoni bəçəy hardemoni səmt dığğət doey vanq kardedə.joqo ki,hamyedə:inson bəpe bəştə (hardə)xorəki(xılğəti) nəzəko”.ayəon dəvomədə Xıdo çı inson iyən çolınqə heyvonon ixtiyorədə ğərol doə nevbənevə xorəkon barədə sıxan votedə və insoni daxilədə bıə şık kardey hissi təhrik kardedə və əy bə ın neməton əto kardə xılğəti aləmi ofəyə Xıdovəndi səmt dəvət kardedə.insoni nəzdədə bıə xorək vey çokə maddəonku ki,de qıləy əvəzon çəy vucudi i hissə bedə və bəçəy cism iyən rufi təsir noydə.bə həmonə dəlili xoto, Kərimə-Ğıron bə de beməyon iyən doon roon vositə bə insoni nəsib bıə xorəki maddəon təkid kardedə.ruşin iyən məlume ki,məğsəd fəğət bə xorəki nəzə iyən təmşo kardey ni,bəlkəm bə insoni vucudədə bıə ın maddəon tərkibi və bəçəvon nığılə təsiri və məno dığğət kardey dəvət kardedə. çən,peşo çəvon xalıği həxədə fik-fam və təfəkkur kardey və bəpe de dığğəti odyəso və nəzəko ki,Xıdovəndi boəy hozzı kardə qırd ım xorəkon aya həlole ya hərom? ğanuniye ya ğeyri məşruyi?.
