Osmoniyə surəon-308

Osmoniyə surəon-308

Nəsr  ya Məsədi mıborəkə surə Kərimə-Ğıroni sa daminə mıborəkə surəy.ın surə Mədinədə nozil bıə və 3 qılə ayəku iborəte.

“Qıləy zəmon ki,Xıdo komək və ğələbə ome rəse.və bəvindeyş millət dastə-dastə bə Xıdo dini daxil beydən.çən,(bə ın neməti şık kardeyro)bəştə pərvərdıqori  təsbih və həmdkə və çəyku məğfırət tələbkə ki,əv vey tobə ğəbuləkəy”.(1-3).....

Məkkə mışrikə millət islomi-peyğombər(s)-i həddiku ziyodə bə əzob-əziyyəti məruz haştəbe.ə həzrət həm noçor be oxoyədə ıştə vətən və moəku bıə vırə yəni Məkkə şəhri tərkko və bə Mədinə muhacirətko və əyo jimonko.əmmo,Xıdo-Rəsul(s) həmişə əruji çəş kardedəbe ki,ijən bə Məkkə oqardo ta Nəsri mıborəkə surə nozil be və qıləy muhimmə səbarzəti iyən ğələbəku mıjdəvoniş doe.Peyğombər(s)-i çı Xıdovəndi ım naviku doə xəbəku vey xoşhol və şo be və cərəyonış bə mısılmınon xəbəş doe.həmə mısılmınon şo və xoşhol bin və besəbrəti iyən de dastpoçəti çə həmonə torıxi ruji bə həyğət rəsey intizorədə bin.tayin ki,Hicri-Ğəməri həştminə sori Xıdovəndi tərəfiku  çı mısılmınon bə Məkkə səmt hərəkəti əmr və fərmon sadir be.de mıslmınon ın ləşkərkəşey  Məkkə şəhr fəth be və jıləvoni çı Xıdovəndi tərəfiku Nəsri mıborəkə bə peyğombər(s)-i mıjdəvoni doey bıə fəth iyən səbarzəti mıjdəvoni həyğətən bə əməl ome. Ğıroni ın macəra naviku xəbə doey,çı Kərimə-Ğıroni ecoz və mecuzəonku bə hisob omeydə.

Həlbəttə,Peyğombər(s)-i devrədə ziyodə futuhat və fəthon bə əməl ome.əmmo,həmməysə vey ruşinə hodisə be ki,Nəsri mıborəkə surə işorə kardə fəth,Məkkə fəthe.zira,Məkkə fəth çı islomi sıftənə soron fəthon həmmə miyono,həmməysə vey ruşin iyən vey məşhurə qıləyniye.Məkkə fəth islomi torıxədə qıləy nuyə fəslış oj karde və çı Məkkə mışrikon təğribən vist sornə mığoviməton darıştey be.

Məkkə fəthi barədə odəmi dığğəti cəlb kardə nuktə ıme ki,Peyğombər(s)-i əmrış karde ki.islomi ləşkər bə hiçkəsi zəhmət nıdo iyən mane nıbu və çı hiçkəsi xun ru kardey nıbu.çın yolə səbarzəti cərəyonədə Peyğombər(s) bə Məkkə şəhri varid be və bə Məscidul-Hərami şe.ə həzrət Kəbə nezi rəse və əyo bıə qırd bıtonış darışte.peşo Kəbə kə kəno mande və çı millətiku dəparseşe:”şımə ımruj mıku çiç çəş kardedon?voteşone:baxşeş.Peyğombər(s)-i çəşonədə ars cari be və millət həm de ə həzrəti bə ico bəmin.

Deməkə ki,Məkkə mışrikon bə Peyğombər(s)-i ziyodə əzob-əziyyətışon doəbe,ƏMMO Ə HƏZRƏTİ HAMYEŞE:mı şımə barədə həmonə çi votedəm ki,çımı bo Yusifi votəşbe.ımruj bo şımə hiç qıləy mızzəmmət və sə-sıxan ni.Xıdovənde-Aləm şıməni bəbaxşe və əv Ərhəmər Rahimine.”de ın tərtibi rəhməti rəsul həmmə kəsış baxşe və əfvış karde və hamyeşe:bə kon vırə piyedəyone,bışənən.

De ın tərtibi Məkkə,becanq və hiç qıləy xun rukardə holədə fəth be.çı islomi ın  rəhmət və əfvi cozibə ki,Məkkə millət əy çəş kardedə nıbe,jıqo bə milləti dılon təsirış  jnoe ki,əvon dastə-dastə bə dini-islomi səmt dimışon qəte.ım yolə fəth de surəti qırd Ərəbıstoni niməcəzirəş bə larzəş varde və həmonə sərzəminədə şırk iyən bıtpərsətəti rınəş bırniye.demiyən,islomi sədo həmmə vırəş dəqəte və çəy səbarzətiyon təsbit be.çəy bədiqə,islomi xoşə sədo bə dınyo co noxtəon həm rəse....