Osmoniyə surəon-314

Osmoniyə surəon-314

Fələği mıborəkə surə Kərimə-Ğıroni sa senzəminə mıborəkə surəy,Məkkədə nozil bıə və 5 qılə ayəku iborəte.ın surə bə peyğombər(s) iyən muminon omuteydə və təlim doydə ki,har qıləy şərayitədə bə aləmi pərvərdıqori pənoh bıbon və ıştəni bəy baspardon ta əvon çəy pənohədə çı har qıləy şərə ğıvvə şərriku əmonədə bımandon.”vuji bə sıpiyə dəmi(sıbhi vaxti) pərvərdıqori pənoh bardedəm”.

Inson hejo çı xətər və təhlukə mə`rəzədəy və həmonə xətər mumkine har cəhəto bəy zərəl və ziyon bırosno.əmmo,əsliyə muşkil və problem ıme ki,əvon zıneydənin ım xətər və təhlukəon çı konco,kom zəmonədə və de kom kəsi vositə bəvon bome bərəse.bə Xıdo dəvotiye iyən pənoh bardey,həmişə de rufi iyən nəfsani holətiye ki,bəvədə inson ıştəni bə ğadir iyən hikməti soyb bıə Xıdo dəspardedə.joqo ki,əv əzın,vindedə və məseydə.insoni bə Xıdo pənoh bardey  əy hədəf qətə və bəy hucum bardə qıləy şərə ğıvvəku əmonədə mandey mənoədəy.

Fələği mıborəkə surə dıminə şərifə ayədə omə:”Ofəyə har çi şərriku”.

Bın ayədə peyğombər(s)-iku tələb kardedə ki,çı har qıləy ofəyə bıə çiy şərriku.çı qırd şərə ğıvvon şəriku,şərə insononku,şərə hodisəonku və çı şəytoni şərriku iyən əmmarə nəfsiku bə Xıdo pənoh bardedəm.Kərimə-Ğıroni nəzəku inson ehanə deştə dıli imoni bə Xıdo pənoh bıbu, çəy hiyləgərə deşmın bə har qıləy ko həm dast bığando,muvəffəğ nibəbe.Xıdovənde-Xalığ kardey bəzıne deştə bandəon ğəlbi imoni vositə şərə çiyon çəyku bə diyəroko və ya munkine qıləy şərə hodisə bəvə booy və Xıdovənd həm əy dəf və bərtərəf kardey bəzıne....

Mıfəssır iyən təfsirəvonon nəzəku çı har qıləy şər və xəbisə məxloğiku bə Xıdo dəvitiye iyən pənoh bardey,bın mənoədə ni ki,ilahi xılğət ıştən boştə və zotən qıləy şərə ğıvvəy. bəlkəm, Xıdovəndi ofəyə har çi xəyre.çoko ki,Kərimə-Ğıron hamyedə:”Həmonə Kəs ki,harçiş ofəyə,çokış ofəyə”.(Səjdə-7).

Şər bə zəmon pəydu beydə ki,məxloğ çı xılğəti ğanunonku mınhərif beydə və ya səhihə royədə ğərol qəteydəni.çoko ki,oson sığe,əmmo ehanə bə çəxo təbdil bıbu.mumkine şəyku suyi-istifodə bıbu.çəmə insonon həxədə bıə xəyr və səloh,bə qıləy çi votey beydə ki,deçəmə vucudi həmahənq bıbu və bəçəmə ozavziye iyən təkamuli boyis bıbu.əmmo,şər qıləy çiye ki,deçəmə vucudi həmohənq ni və bəçəmə bə dumo mandey iyən suğuti boyis beydə....