Osmoniyə surəon-315
Osmoniyə surəon-315
Osmoniyə surəon-315
Fələği mıborəkə surə dıminə şərifə ayədə omə:”Ofəyə har çi şərriku”.
Bın ayədə peyğombər(s)-iku tələb kardedə ki,çı har qıləy ofəyə bıə çiy şərriku.çı qırd şərə ğıvvon şəriku,şərə insononku,şərə hodisəonku və çı şəytoni şərriku iyən əmmarə nəfsiku bə Xıdo pənoh bardedəm.Kərimə-Ğıroni nəzəku inson ehanə deştə dıli imoni bə Xıdo pənoh bıbu, çəy hiyləgərə deşmın bə har qıləy ko həm dast bığando,muvəffəğ nibəbe.Xıdovənde-Xalığ kardey bəzıne deştə bandəon ğəlbi imoni vositə şərə çiyon çəyku bə diyəroko və ya munkine qıləy şərə hodisə bəvə booy və Xıdovənd həm əy dəf və bərtərəf kardey bəzıne....
Mıfəssır iyən təfsirəvonon nəzəku çı har qıləy şər və xəbisə məxloğiku bə Xıdo dəvitiye iyən pənoh bardey,bın mənoədə ni ki,ilahi xılğət ıştən boştə və zotən qıləy şərə ğıvvəy. bəlkəm, Xıdovəndi ofəyə har çi xəyre.çoko ki,Kərimə-Ğıron hamyedə:”Həmonə Kəs ki,harçiş ofəyə,çokış ofəyə”.(Səjdə-7).
Şər bə zəmon pəydu beydə ki,məxloğ çı xılğəti ğanunonku mınhərif beydə və ya səhihə royədə ğərol qəteydəni.çoko ki,oson sığe,əmmo ehanə bə çəxo təbdil bıbu.mumkine şəyku suyi-istifodə bıbu.çəmə insonon həxədə bıə xəyr və səloh,bə qıləy çi votey beydə ki,deçəmə vucudi həmahənq bıbu və bəçəmə ozavziye iyən təkamuli boyis bıbu.əmmo,şər qıləy çiye ki,deçəmə vucudi həmohənq ni və bəçəmə bə dumo mandey iyən suğuti boyis beydə....
Fələği mıborəkə surə 2-ə şərifə ayədə çı həmmə şərə ğıvvonku bə Xıdo pənoh bardey işorə bıə. əmmo,ım surə çandə qılə şəron nomi bəçəvon məxsusə əhəmiyyəti xoto kəşedə.”Toykiyə şəvi şəriku ki,omeydə(dəmedə).və coduqərə(jenon)şəriku ki,bəçəmə anqılon pu kardedən və çı har qıləy həsodətəkə həsədiku(3-5).
Şərə fərdon və fitnəkoron veyə zəmonədə bo məkrinəplan kəşey iyən hiylə kardero şəvi toykiyəti vıjniyedən ta məlum iyən zıney nıbon.əvon çı insonon ratədə nışteydən ta çəy zəyifə vıron bızınon və ya qıləy mınosibə fırsətədə yəni şəvi nimədə bəy qıləy zərbə bıjəno.liza,əmə bəpe şəvi nimədə bıə şərə ğıvvon və fərdonku bə Xıdo pənoh bobəmon ta əv əməni çə şərron tiy və zərəlonku əmonədə oqəto.
Suyi-təbliğot,vəzyəti bəyənde jıey,sıxançinəti və şayiə pevolo kardey çiyonin ki,coduqər və folçiyə jenon bəy dast ğandedən.Fələği mıborəkə surə oxonə ayə həsodət iyən pəxıləti kardə kəsi şərri işorə kardedə.həsəd və pəxıləti əxloği rəziləton həməysə yavə qıləyni bə hisob omeydə.boçi ki, Kərimə-Ğıron əy çı vəhşiyə heyvonon cərqədə və çı vəsvəsəkə şəytonon səfədə ğərolış doə. Həsodət iyən pəxıləti qıləy bədxahə fərdonin ki,çı cokson neməton çəvon dastiku beşey oruzuədən.həsəd bənə imoni zəyfəti,tanqə nəzə və pəxıləti bıə mıxtəlifə amilon təsiri xoto,çı insoni vucudədə pəydu beydə və çı veyə fərdi iyən sosyal cinoyət və xətoon mənbə və sərçeşməy.de İmom Bağır(ə)-i təbiri:”həsəd çı insoni imoni hardedə və çı miyoniku bardedə. çoko ki,ezım otəşi sutuneydə”.bə həmonə dəlili xoto,Fələği mıborəkə surə oxonə ayə çı pəxıl iyən həsədəkə fərdi şəriiku bə Xıdo dəviteydə və pənoh bardedə.
