Ilahi rəhbəron-24
Ilahi rəhbəron-24
Peyğombər(s)-i sınnət və siyrə hejo bo mısılmonə muhəğğiğon muhimə mevzuonku bıə və çəy barədə veyə bəhson bıə.ziyodə elmi kitob və risoləon çı dəvardə zəmononku de tosə ısət bın zəminədə nıvıştey bıə ki,ım həm çı mısılmonə alimon palu bə ın mevzu bıə dığğəti nışon doydə. ın kitobon ənışvışton səyışon kardə bə Xıdo-Rəsul(s)-i şəxsiyyət və jimoni ayid vey cuzi məsələon həm ğeydkon və de çə həzrəti iştimoyi iyən hukuməti şivəon bəyon kardey,çə həzrəti dınyo əvəz kardey iyən islomi dıjdə təməddun iyən mədəniyyəti icod kardeyədə bıə roli bəyon kardedən.
Islomi əzizə peyğombər(s) bənə dəvəşə həşi insoniyyəti osmonədə vavriski doydəbe və əxloği və insoni barzə keyfiyyət və erjonş bəyji karde.camiyədə qıləy insoni lozım bıə qırd kəmolat və imtiyozon soyb be və çə həzrəti jimon de əzəmət və mecuzə purbe ki,dayima bənə qıləy nur doə məşəli bə odəmon hidoyəti boyis beydə...
Həmməkəson bə ın nuktə işorə kardedən ki,islomi inkişofi əhəmiyyətinə nuktəonku qıləyni, peyğombəre-əkrəmi(s) de insonon de cozibə pur bıə və bə dılon nıştə barzə əxloğ bıə. muhəğğığon çı Xıdo-Rəsul(s)-i namə xosyət və mehribonə əxloği,bo islomi ayini bə insonon dılon nufuz kardero həmməysə muhimmə amilışon hisob kardə.Məcidə-Ğıron bə ın nuyə din və aynini inkişofədə bıə peyğombər(s)-i əxloği roli de ojə-okoə holi işorə kardə holədə hamyedə: ”fəbima rəhmətin minəllahi lintə ləhum vələov kuntə fəzzən ğəlizəl-ğəlbi lənfəzzu min həvlik.f`əfu ənhum və vəstəğfirləhum və şavirhum filəmr”.
Ha çəmə Rəsul ha! Bəçəmə tərəfku bıə lutf iyən rəhməti xoto ki,bəştı holi şomil bıə,de milləti mehribonəri karde və ehanə hozi iyən sığə dıl bıəbiş,millət ıştı kənoku volo-volo əbin.çən,əvoni bıbaxş və boəvon məğfırət tələbkə və koonədə deəvon məşvərətkə”.(Ali-İmran-159)...
İslomi-Peyğombər(s) ıştən ki,əxloği fəziləton iyən insoni barzə erjon soyb be,insoni və əxloği erjonış tiki həm barzış karde və əvış islomi qədə camiyədə rəvocış doe.jimoni qırd cəhətonədə de sırə diyəni və de ğoym və bə dıl nıştə kəlomi de hodisəon rəftorış karde.torıxədə omə ki, Hicrəti nəvminə sori Tayi .....tuğyongərə ğəbilə bə islomi ğəhrəmonə ləşkəri həmlə xoto məğlub bin,Udey ibn Hatəm ki,çın ğəbilə məşhurə qıləyni be bə Şam vitə be,əmmo çəy hovə ki,çəy nom Səffahə be,de islomi ləşkəri dasti əsir eqıne.Səffahəşon de coqlə əsiron bə mədinə vardeşone və əvışon çı məçiti kəno qıləy kəyədə oqətşone.iruj Xıdo-Rəsul(s) bə həmonə əsiron osəş ğande və Səffahə həm çın vəzyətiku istifodəş karde və voteşe:”ha Muhəmməd ha! Çımı pı Hatəm dınyoku şe və mıni nığo doə və çımı yol Udeyy həm vitə və qim bıə.ehanə məsləhətebu mıni ozodkə ta çı ərəbi co ğəbiləton şəmotət və yavə sıxanon çımıku bə diyəro bıbu. həyğətən, çımı pı Hatəm nokəon ozod əki,hamsuyon nığo ədi və bə milləti xorək ərosni və oşko səlom ədəy və tel iyən bə xoş nıomə hodisəonədə bə milləti komək əkəy”.
