Həzrəte Əbbos(ə)
Həzrəte Əbbos(ə)
Həzrəte Əbbos(ə)
Imruj Məhərrəmə manqi nəvminə ruj və de Tasua ruji məşhure.qıləy ruj ki,bə həzrəte Ənbbosi(ə) məxsuse.İmom Huseyn(ə) və çə həzrəti qırd əshob Məhərrəmə manqi daminə ruj yəni həmonə Aşurə ruji sıbi zəmoniku de tosə zohri vaxti bə şəhodət məğami rəsin.əmmo,peşo de zəmoni dəvarde bo Məhərrəmə manqi sıftənə da rujon əziz qəteyro,de har qıləy Şəhidi nomi nom noey be.çın da ruji sıftənə şəv de Kərbəlo roy şəhidi nomi yəni de Muslim ibn Əğili nomi ğeyd beydə.Muslim çı İmom Huseyn(ə)-I səfir be ki,Zilhiccə manqi nəvminə ruji de bəni-uməyyə muzduron dasti Kufə şəhrədə bə şəhodət məğami rəse.liza Əhli-Byeti(ə) məddah iyən zakiron Məhərrəmə manqi iminə ruji bə ın fədokorə şəhidi confışonəti xoto,deçəy nomi ğeyd kardey beydə və çə həzrəti barədə nohəon handey beydə.Məhərrəmə manqi nəvminə ruji həm çı İmom Huseyn(ə)-I şəhodəti bənav Kərbəlo daşti oxonə mıboriz de həzrəte Əbbos(ə)-I nomi ğeyd kardey beydə.bın ruji İmom Huseyni(ə) əzodoron de həzrəte Əbbosi(ə) nomi və çəy bəfodorəti iyən məzlumonə şəhodəti həxədə nohəon handedən.həlbəttə,bo həzrəte Əbbos(ə) iyən Kərbəlo qırd şəhidon handə bıə ım nohəon,bə peyğombər(s) iyən bəçəy pokə xanedani ıştə məhəbbəti izhor kardeysə əliovə co çi ni.çıro ki,Kərimə-Ğıron iyən rəvoyətonədə bə Xıdo peyğombəri(s) xıyzoni dustəti iyən məhəbbəti bə həmmə mısılmınon vocibış kardə.çı dustəti iyən məhəbbəti muhimmə şərtonku qıləyni,ıştə duston ğəm iyən şoyə rujonədə deəvon həmdıləti iyən həmrayəti kardeye.hədisonədə həm bə Əhli-Beyti(ə) şoyvonəti rujonədə id və şoyvonəti kardey və çəvon matəmə rujonədə ğəmqin və məhzun bıey təkid kardey bıə.bəçəy xoto ımsor deməkə ki,Koronavirusi noxəşəti pevolo bıə və bəçəy xoto çın əzodorəti mərosimon bərpo kardeyədə kəmiyyət və zohiri nəzəku mıəyyən məhdudiyyətonış ico kardə,əmmo ım ko nəyinki, Huseyni həyəconiku zərrə ğədərədə bə kamış kardəni,bəlkəm çəy keyfiyyətış həm ziyod kardə. ziyodə təşəbbısinə cıvonon iyən heyəton bə meydon omən və de nuyə səpk iyən şivəon de bə dıl nıştə dini şuaron çı islomi həmdıləti iyən əxloği miyono bıə qıləy rabitəşon bə əməl vardə.əvon həmçinin bo Kovid-19 noxəşəti vəy qəteyro de bə səhiyyəvi təilomaton rioyət kardey,Aşurə şəhidon mesaji rosnə ozodə pərçəmon bəyji oqəteydən.Huseyni əzodoron həmmə bə heyəti daxil bıey bənav maskə jeydən,ıştə daston de əlkoli dezinfeksiyə kardedən və ıştə məşon və lınqə dılon bə qıləy məxsusə salafoni dılə noydən.heyəton qıləy noxəşə şəxsi bə ın məclison daxil bıey vəy qəteydən tainki,bın məclisonədə qıləy noxəşə odəm nıbu və ım noxəşi bə cokəson həm nıovoştıno…..
İmom Əli(ə) şirə zoə Həzrəte Əbbos(ə) Ummul-Bənin ya Fatmə binti Hizami nomo qıləy təğvanin iyən çokə jeniku moku bıə və bə dınyo omə.Əbbos(ə) cıvonəti zəmonədə qıləy xoşsima suvari və zumand be və bəçəy reçinəti xoto bəy Ğəmərı Bəni-Haşim ya çı Haşımi Zoon ovşımi nomışon noəbe.ə həzrət əndom iyən cismi bədəni cəhəto vey barzə səviyyədə be.boçi ki,çəy pı çı ərəbi pəhləvonon həmməysə dıjdə qıləyni bə hisob omeydəbe və həmən çəy inə tərəfi xıyzon həmmə pəhləvon iyən şucoətin bin.çımonsə əlovə həzrəte Əbbos(ə) hırdənəti zəmoniku de varzeş iyən bədəm tərbiyə koy məşğul beydəbe.ə həzrət məzə iyən hərbi təlimonədə iştirok kardedəbe və nəhoyətən həzrəte Əbbos(ə) bənə qıləy şucoətinə cıvoni perəse.nəğl bıə ki,qıləy ruj İmom Əli(ə) məçitədə nıştə be və bə milləti pand iyən nəsyət doydəbe.qıləy ərabiyə merd bə məçit daxil be və səlomış karde.çəy dastədə qıləy sondox hestebe,bəsə zəminsə noşe və bə həzrəte voteşe:”ha Əmirəl-Muminin ha! Bomı qıləy peşkeşışon vardə.peşo həmonə sondoxçəş oj karde və qıləy unikal və bə ovi doə bıə şımşiş çəyo bekardeşe və bə ə həzrətiş təğdım karde.bın zəmon həzrəte Əbbos(ə) ki,qıləy nevcıvonə zoə be,bə məçit daxil be və səlom doey bədiqə de qıləy ədəbi çı məçiti qıləy kıncədə mande.çəy çəşon bə həmonə dəvəşə şımşi peqıniye.İmom Əli(ə) vindeşe ki,həzrəte Əbbos de qıləy şovği bə həmonə şımşi nəzə kardeydə,əve dəparseşe: ”çımı əzizə zoə,tı piyedə ki,həmonə şımşi bətı bıdəm?”.həzrəte Əbbosi(ə) de qıləy şoyvonəti voteşe:”bəle,şinə pı!”.həzrəte Əli(ə) bəsə səpoysə əyşte və deştə dasti şımşiş bə həzrəti təğdımış karde.ə həzrət peşo bə həzrəte Əbbosi(ə) əndomi dırozi ehaştə bıə şımşi nəzəş karde və çə həzrəti sipyi bıə rişədə ars cari be.əyo bıə kəson dəparseşone ki,ha Əmirəl-Muminin ha!çıro tı jıləvoni bəmeydəş?ə həzrəti hamyeşe:qıləy ruji vindedəm ki,əv de ın şımşi çı deşmıni nəfəsi çəvon sinədə həbs bəkarde,beəmon bəvon həmlə bəkarde və nəhoyətən bə şəhodəti məğami bərəse”……
