Pars Today

İmom Səccodi(ə) şəhodət

Imruj Məhərrəmə manqi donzəminə ruj bə qıləy məşhurə rəvoyəti əsos,çı həzrəte Əliyyibni Huseyni(ə) şəhodəti ruje.əkəs ki,hejo ıştə buzurquvarə pı rəşodət,məzlumiyyət iyən ğəribonə şəhodətış ıştə xotırədə oqətəşbe.Əliyyibni Huseyn(ə) ıştə 35 sornə imoməti zəmonədə har vırədə ki,şərayit mevcud be,Kərbəlo vağiyəku sıxan votedəbe və həxı oşko iyən botıli xar kardedəbe. zehnon de həyğəti nuri nuroni kardedəbe və şəkkon iyən tərdidon deştə rostə sıxan və əməlon bə kəno jeydəbe.ə həzrət Hicri-Ğəməri 61-ə sori Məhərrəmə manqi həmonə rujonədə 23 sinnış hestebe,bəştə cismi cəhəto zəyfəti iyən noxəşəti xoto,Aşurə ruji mıboriə kardey ğudrətış nıbe, əmmo həmonə bə xoş nıomə şərayitədə vey dılış hestebe ta bəştə azizə pı komək bıko.Kərbəlo vağiyəku qıləy kırtə mıddət dəvardey bədiqə,bəştə daxili dardon iyən xarici rencon rəğmən, İmom Səccod(ə)  bəsə rəhbərəti sanqinə səkkusə mande və ıştə risolətış bino karde.ə həzrət çı qırd darı-ğəmi dılədə bənə qıləy rəşidə sərvi rost mande və deştə bırniyə kəlomi jıqo fəzoş vəzə karde ki,çı əməvi zolımə huukuməti qırd yavə təblığaton bə hədər beşin və həx iyən həyğəton deştə dəvəşey dılonış lorzıne və həmmə kəson bo İmom Huseyn(ə) iyən boçəy xanedani məzlumiyyəti bəmedəbin.bəle,Əliyyibni Huseyn(ə) qıləy erjinə qovhər be ki,vey saxtə şərayitədə milləti rəhbərəti iyən hidoyəti pərçəmış rost kardəbe…..

Əməvi siyuə hukuməti devronədə ki,insoni erjon iyən əxloği fəziləton çı viro bekardey bıəbe və millət ıştə bənə xəlifə zınə rəhbəronku zuhd,sodə jimon kardey,təvazu,dustəti nevi,namə diməti iyən rəiyyət pərəstəti mışohidə kardey əvəzi,dınyopərəstəti,əşrafiyyət və aristokratizm, dəbdəbəninə jimoni tərz və təkəbbırətişon vinde.İmom Səccod(ə) bənə qıləy vavriski doə həşi deştə vucudi qırd yodo bekardə bıə erj iyən fəzilətonış ehyo iyən bəyjiş karde.joqo ki,həmmə dust iyən deşmın bə həzrəti əm hərəkəti əhsənışon vote.

Əməviyon de “Cəbri” təfəkkuri şua ın məsələşon bə milləti təlğin kardeyışon piyedəbe ki, Xıdovəndi piyedəşe hukumət çı muaviyə iyən çəy xanedani dastədə bıbu və ehanə jqıoş piyə nıbe,çəvon hukumət dəvom pəydu nıəkəy.həyğətədə,hiylə və məkr çı əməvi hukuməti tətbiğ kardə şivəonku be.əvon de şubhəon icod kardey milləti zehnon bə inhirof iyən şəkkon səmt bardeəbin və əvoni çı həxə royku bə diyəro kardedəbin.əməviyon məxsusən Kərbəlo ğətlı-am iyən Aşurə hodiə bədiqə,Əhli-Beyti(ə) tərəfdor iyən piyəkəson təmom bıə çi fərz kardedəbin və şoyvonəti kardedəbin ki,həni əvon ıştə mıxolifonışon məhf kardə.qıləy holədə ki,əvon çı İmom Səccodi(ə) vucudi nur iyən nığılə təsironku xəbəşon nıbe…..

İmom Səccodi(ə) ıştə imoməti hejo sıftənə zəmoniku ki,23 sinnış hestebe,de Aşurə odəmi dıli sutunə hodisə xotırəon bəyji kardey,bə ın nəticə rəsin ki,islomi dınyo həmməysə muhimmə baxş ki,de Kərbəlo vağiyə bə oxo rəse,nəyinki,çı əməvi hukuməti fəsod be,bəlkəm çı milləti əxloği fəsodon həm bımi koməkışon karde.ehanə millət bə əxloği rəziləton malik bıə nıəbin,harçənd hukuməton zolım,fosid iyən bedin həm bıbon,əmmo jıqo qıləy dıjdə fociyə bə əməl vardey nıəzınin.ə həzrət sərəsin ki,qıləy zəmon çı qıləy milləti əxloğ xərob bıbu,həmonə millət çı qırd fəsodon mənşə bəbe.bəçəy xoto,İmom Səccod(ə) ıştə qırd zuş bo milləti əxloği çok kardey və əvoni bə mədəniyyəti səmt oqordıneyro sərfış karde.

İmom Səccod(ə) bın fikədə be ki,bəpe çı milləti din iyən əxloğ isloh kardənin bıbu və əvoni bəpe çı fəsodi qirdobiku xaric kardey bıbu və dini əsliyə mənəvi cəhəton qıləy camiyə bəyji oqəteydə. əmmo,həmonə zəmonə yavə şərayit  və vəzyəti nomınosib bıey,icozə doydə nıbe ki,İmom Zeynul-Abidin(ə) de milləti ruşin,oşko və qıləy pardə nıbə holədə sehbətko.əve İmom Səccod(ə) bo camiyə islohiro,həmməysə çokə şivə yəni çı dıvo iyən razo-niyozi şivəş vıjniye.ə həzrət dıvoş bo milləti əxloği mıolicə kardero binovrəş noe və islomi camiyədə qıləy mənəvi iyən ruhaniyə fəzoş icod kardeyış zıne.

Dıvo qıləy məxsusə həlovət və şiniş heste və çı odəmi jimoni şinə ləzon de Xıdovəndi mınocot və dıvo kardeye.bandə ıştə dıvoədə ıştəni zindoniku ozod kardedə və deştə qırd vujudi ıştə məbudi vanq jeydə.əv qıləy məxsusə mənəvi fəzoədə ğərol qəteydə ki,həmmə kəsiku co bıə və fəğət bəy vey nez bıə deştə pərvərdıqori sıxan votedə…..

İmom Səccod(ə)-I “Səyfəye –Səccodiyyə” kitob çə həzrəti deştə məbudi aşiğonə irtibot və barzə mənəvi məzmunonku iborət dıvo kitobe ki,İmom Səccodi(ə) muhimmə cəhdon nəticəy.“Səyfəye –Səccodiyyə” ki,54 qılə dıvoku iborəte,İmom Səccod(ə) əvonış bənə Xıdoşınosi, dınyoşınosi, insonşınosi,ğeybi aləmi bəhson,məlayikon,ənbiya və peyğombəron risolət,əxloği fəzilət və rəziləton,huğuği,iştimoyi iyən ixtisodi məsləon və ibodəton ğolibi formədə bəyonış kardə və bə camiyə fərdon hidoyəti boyis bıə.qıləy məşhurə rəvoyətədə bın barədə omə :”summə…peşo millət bə əslə milləti səmt oqardin və ziyod bin”.yəni çı İmom Səccod(ə)-I ziyodə səyon bəpeştə, dılon de dıvoon vositə bə Xıdovəndi anqıl qınin və həyğiyə mısılmınon ziyod bin.