Rəməzon,çı fırsəton manq-1

Rəməzon,çı fırsəton manq-1

Xosə Tolışon səlom, Rəməzamə manqi bino bey bə şımə təbrik ərz kardəm, ım əziz və bərəkətinə rujonədə, dıvo kardəm Xıdo dərqohədə, şımə rujəon və ibodəton ğəbul bıbu.

“Rəmezan fırsəton manq” nomo məxsusə bərnomə bə şımə xıdmət təğdim bəkamon.dəvət kardəm de Tolışi Rədio bə ico bımandən.

Bə Rəməzanə manqi səlom vığandəmon, bə Xıdo manqi səlom bıbu, bə rəhmətə manq, iyən bə baxşışi manq və fırsətonku istifodə kardə manq.

Əzizon Xıdo Bəğərə surə 183 minnə ayədə həmiyəşe:

“Ey imon vardəkəson! rujə bəşmə vacib be, çoko ki, bə şıməku bənav bıəyon vacib bıə be. ğasbu, şımə təğvanin bıbuən.”

Im Xıdo kəlome ki be şək, de Xıdo əmri bərobə heste, bandəon məsuliyət itoət kardeye. əmmo Xıdovənd irodə kardə ki inson deştə fik iyən əğli vositə, Xıdo bandə bıbu. Peşo əqə Xıdo qıləy əmri dodə, çəy bəpeşt, çəy hikməti həm vardedə. rujə qətey hikməti, təğva zumand kardey zıney bıdə.Təğva yəni ıştəni zərəl-ziyononku mıhofizə kardey.

Muminon həm bo şəytoni vıcudiku əmniyyətədə mandeyro, bəpe rujə bıqətən iyən təğva oləti tan kon.

Əzizə duston, insonon jimonədə bəpe hədəfi soyb bıbun, və əqə inson ıştə jimonədə hədəfi dumoədə nıbu iyən çəy jimon hərco-mərcədə bıbu, çəy jiomon bə insoni jimoni şəbih ni.

Ğıroni mədəniyətədə insoni hədəf fəğət i qılə hədəfe, bə Xıdo rəsəy, ım ki qıləy vırədə ğəror bıqəto ki əv iyən çəy Xıdo miyono fasilə nıbu, həmçınin təğva qıləy bərnomə heste ki insoni bə ım yolə hədəfi rosneydə, təğva yəni ım nuktə dərk kardey ki (aləm və dınyo, çı Xıdo məhzəre).

Mehribonon jəqo ki zıneydəmon, rujə qətey, sodə holətədə, yəni hardey iyən peşomeyku diyəro mandey, əmmo həğiğətədə rujə qətey cismi iyən nəfsi tələbon vədə, bo irodəon zumand kardeyro qıləy məşğ bə hisob omeydə.

Rəməzanə manq, b ğaydə-ğanunış bıə jimoniro, qıləy məşğ bə hisob omeydə. Im jimonədə, insoni əğl, de ğoyməti har çi bəştə vırə ğəror bədoy və bə hiç çi icozə nibədoy ki ıştə hədd və marziku dəvardo, ım həman ədoləti məno bə hisob omeydə.

Əzizə Tolışon, bo bə ictimai ədoləti rəseyro Rəməzanə manqi bənə qıləy hələkə roy zıneydən, həminə barədə İmom Sadığ(ə) hamiyəşe: “Xıdo rujə vacibış kardə ta bə çəy xoto sərvət soybə şəxson de fəğirə odəmon bərobər bıbun.”

Xədo ğıronədə, Rəməzanə manqi, “Əllah Şəhr” nom noəşe. Xıdovənde xalığ, çı həmmə manqon soybe, əmmo Rəməzanə manq həmmə manqon miyonədə vey çok və fəziləti nə manq bə hisob omeydə. Həmmə şəvon Xıdo nəzədəy əmmo i şəve ki fəğət əhya şəv zıney bıdə ki ə şəv, Rəməzanə manqədə ğəror qətəşe. Rəməzan ziyofətə manqe, həmonə ziyofət ki çəy mizbon Xıdovənde, əv vey mehribon Xıdo heste.

mıburək Rəməzanə manqi bino bey, həğiğətədə mısılmononro yolə id bə hisob omeydə, və bəpe muminon ım yolə manqi bino bey bə yande təbrik bıvoton.

Əzizon, kərimə Ğıron, Xıdo vəhy kəlome, ki bo həmmə insonon səadət və hidoyəti mesaj bə hisob omeydə. Çən Ğıron karde bəzne həmmə zəminəonədə bəşəriyəti ictimaiyə tələbon vey çokə holəti təmin, və milləti bə vey çokə roy səmti hidoyət ko.

Həğiğətədə ım əzəmətinə kitob, bo ictimai jimoni sə-saman doe və bo qıləy jimon de izzəti bə ico, ğaydə-ğanun bə hisob omeydə.

Bəle, ısət Rəməzanə manq bo Ğıroni təlimon zıneyro qıləy çokə fırsət bə hisob omeydə. Vey oxo iyən komilə osmoniyə kitob, yəni Kərimə Ğıroni handey, ım manqədə vey yolə aqahəti əbzor heste.

Im manqədə bə Ğıron handey və bəy fik kardey vey təkid bıə.

Kərimə Ğıron Bəğərə Surə 185 minnə ayədə hamiyəşe:

“Rujə manq qılı manqe ki, bəvədə ğıron nozil bıə.və ğıron qılı kitobe ki, məxloği de ojə-oşkoə dəlilon hidoyətəkə iyən həxı de botili coəkə vasitəy.”

Əzizə əməson bə ım bərnomə quş doe xoto şıməku təşəkkur kardm.

Şımə ibodəton ğəbul bıbu.