De Ğuds beynəlxalğə ruji mınosibəti bərnamə-1

De Ğuds beynəlxalğə ruji mınosibəti bərnamə-1

Əzizə duston səlom, şımə nımoj-rujəon ğəbul bıbun, əzizon, ınşanqo de Həzrəte İmom Həsən(ə)-i milad şəvi sorəqardışi bərobəre ki ın əzizə şəvi bə şımə mehribonon təbrik ərz kardəm və dıvo kardəm ım kərimə İmomi lutf və inoyət bə şımə ğısmət bıbu.Xosə Tolışon, ımsornə Ğuds ruji astanədə, Fələstinıjon iyən sioniston miyono dave, de 4 qılə mıvzo dim bə dim heste. əvvəl, kali Ərəbi kişvəron və sionist rejimi miyono rabitəon əlovə bey, 2 minnə məsələ bə Fələstinıjon zidd bıə sioniston vızməti, 3 minnə mıvzo işğaliyə əraziədə bə sioniston ələyh fələstinıjon şəhodət tələbonə əməliyaton vey be, ijən sionist rejimi əmniyyəti tarsi əlovə bey. Dəvət kardəm dəmə bə ico bımandən, həminə mıvzo barədə bəşımə xıdmət məlumat bədamon.

Səmimi həmzıvonon, miladi 2022 minnə sori Ğuds beynəl xalğiyə ruji astanədə, kali kişvəron de İ Bıə Ərəbə Əmirəti rəhbəriyəti vositə, de sionist rejimi ıştə rabitə zumand karde holədən. Tojədən və mıborəkə Rəməzonə manqi astanədə, Misri Şərmoşşeyx və işğaliyə ərazi Nəğəbə daştədə, de israil iyən ərəbi kişvəron rəsmi şəxson iştiroki, 2 qılə iclos bərpo bıə. ım iclosi nuktə ım be ki işğaliyə əraziədə iyən  iminnə kərə ərəbi rəsmi şəxson və sionist rejimi yolon qıləy, iclosi bərpo kardeşone.

Əzizon, ım məsələ oşko heste ki Sionist rejim de ərəbi kişvəron normalə rabitə bərğəror kardeyku 2 qılə siyosi və iğtisodi hədəfış heste. Siyosi nəzəku, sionist rejim səyo cəhdış heste ki Asiya ğərb məntəğə mohitədə, coyliyətiku xarıc bıbu. Və iğtisodi nəzəku, sionist rejim ki iğtisodi vey təziğon jintonədəy, rabitəon adi kardey royku, səyo cəhdış heste ki ərəbi kişvəron sərmoyəon cəzb ko və çəy əvəzi bə ım kişvəron siloh bıhəvoto, ki təğribən həminə hədəfi bə vırə rosniyəşe.

De Ərəbi kişvəron sionist rejimi, rabitə zumandəti həmzəman, bə Fələstinıjon ələyh, ın rejimi cinoyəton həm əlovə bıə, jəqo ki Fələstini statestika mərkəz elan kardəşe ki, Miladi 2021 minnə sorədə, ğərbi  sahilədə 17 nəfər hırdən və Ğəzzə tanqədə 61 nəfər hırdən de Sionist rejimi hərbi ğıvvon cinoyəti vositə, şəhid bıən. Həmçınin Miladi 2022 minnə soriku tosə bə ısət, yəni fəğət dəvardə 100 ruji mıddətədə, de israili hərbion əməliyoti vositə, 37 nəfər şəhid bıən , əlovə bə ım ımsor, Fələstinıjə əsiron miğdor, 1100 nəfəriku dəvardedə, və bə Fələstini əsironku himoyəəkə komitə statestikaon əsos, Aprilə manqi əvvəliku tosə bə ısət, 200 nəfəriku vey fələstinıjon, sionist rejimi tərəfo dastqir iyən zindoni bıən.

Həğiğət ıme ki, Fələstini millət, ısət harcurnə xarıci himoyəku numid bıən və Sionist rejimi mığubilədə, muğaviməti roy vıjniyəşone. Həminə cəhətədə, Martə manqi oxoku tosə bə ısət, Fələstinıjon səmtiku 4 qılə şəhodət tələbonə əməliyot əncom bıə ki çəyədə,14 nəfəriku vey sionist kıştə bıən. əmmo ım 4 qılə əməliyaton barədə, muhimmə mıvzoonku qıləyni, əməliyoton coqrafiya cəhəto hevujəti be. İminnə əməliyot, Bərolsəb məntəğə be, 2 minnə əməliyot, Əlxəzirədə, 3 minnə əməliyot Telavivi Beni Berak məntəğə və 4 minnə əməliyotədə həm ki Telavi şəhri mərkəzi Dizenkof xiyabonədə əncom bıə nışoş do ki  işğaliyə Fələstini Cənub tosə Şimoliədə muğavimət çandə zumand bıə.

Mehribonon, dəvardə soron Rəməzanə manqədə, həmişə Fələstinıjon iyən Sionist rejimi miyono, hadisəon və daveon əlovə peydo əki, əmmo ısət co manqonədə həm, ğərbi sahil iyən Ğəzzədə daveon muşahidə bıdə. de ım vucudi, ım 4 qılə əməliyot ki həmmə 1948 minnə sori işğaliyə sərzəminon daxılədə əncom bıə stratejik nəzəku vey muhimin.

Fələstinıjon şəhodət tələbə əməliyaton, əmniyyəti nəzəku, israili zəifə sima nışo doydə. Fələstinıjon ım əməliyaton, kali ərəbi rejimon de sionisti işğalçiyəti rejimi yolon iştiroki , xaenanə icloson bərpo kardey mığubilədə, vey muhimm və təsirinə əməliyə cəvob zıneydən.

Aprili 14 minnə rujədə, iyən tojə təhəvvolaton barədə Sionisti rejimi rəis, Eshağ Hertzok, votışe: fələstinıjon əməliyaton ki tosə bə ısət 14 nəfəri kışte bois bıə, vey təhdid heste. Im şəxs, qıləy nəzədə ki Telavivi tars iyən dəhşəti nışonəy bəyonış kardə ki əmə və Fələstinıjon bəpe de yande votımon kardeyro qıləy roy dumoədə bıbəmon.

Həminə cəhtədə, sionist rejimi kabinet elanış kardə ki de 40 kilometriyə divo dutey vositə, təhdidon vədə mığubilə kardedəmon, həlbətə ım iminnə kərə ni ki ım xəbisə rejim de təhdidon kam kardey bəhonə, divo dutey dumoədəy, dəvardə soron həm bənə ım ko əncom doəş be, əmmo de ım divoon vıcudi, bə Fələstini muğavimət və Fələstinıjon mubarizə qurupon miğdori və keyfiyəti ğabeliyəton əlovə bey, bois bıə ki sionist rejimi dıvo dutey strateqiya həm məğlub bıbu.

Əzizə Tolışon, mehribonon, bə ım bərnomə quş doe xoto şıməku təşəkkur kardedəm, əzizon Rəməzanə manqədə şıməro xəy, səadət və məğfirət urzu kardəm, dəvət kardəm de Tolışi Rədio bə ico bımandən və bə co bərnoməon həm diğğət bıkənən.