İlahi əsma və nomon

İlahi əsma və nomon

Torıxi dıjdə saleh iyən barzə həkimonku qıləyni,həzrət loğmane(ə) ki,çəy mıborəkə nom Ğıronədə dı kərə omə və Kərimə-Ğıroni sıvi iminə nom həm deçəy nomiye.Ğıroni bəyoni şivə nışon doydə ki,loğman(ə) peyğombər ni.Peyğombəre-Əkrəmiku(s) omə hədisədə nəğl bıə ki,ə həzrəti hamyəşe:”həxədə votedəm ki, loğman peyğombər bıəni,əmmo qıləy bandə be ki,ziyodə fik kardedəbe,çəy imon iyən yəğınış ali dərəcədə be.Xıdovəndış piyedəbe və Xıdovəndi həm əvış piyedəbe və hikməti nemətış bəy inoyətış karde”.

Loğmani mıborəkə surə 12-ə şərifə ayədə handedəmon:”və ləğəd atəyna luğmanəl hikmətə” əmə bə Loğmani hikmət domone”.loğmani hikməti ovciku ım vəs kardedə ki,Xıdovəndi çəy nəsyətonış Ğıronədə vardəşe və ıştə nəsyəton Loğmani zıvoniku(Loğmani mıborəkə surə-14-15-ə şərifə ayəonədə) nəğl kardedə və de ın tərtibi Loğmani həkim bıey təyid və təsdığ kardedə.iyo ım sıvol bənav beşedə ki,Loğman çokonə ım ziyodə hikməti ləyoğətış bə dast vardə? İmom Sadığ(ə) bə ın sıvoli jıqo cəvob doydə ki,: Loğman bəştə nəsl,sərvət,xıyzon,zumandəti iyən reçinəti xoto  çı hikməti soyb nıbe.bəlkəm Xıdovəndi koyədə qıləy zumandə merd və bo Xıdo xoto qıləy təğvaninə şəxs be.çəy qıləy nığılə nəzəş hestebe və de ehtiyoti hərəkət kardedəbe.qıno tarsiku hiç vaxti bo bihudə ko sıredə nıbe və hiçvaxti ğəzəbin beydənıbe və de hiçkəsi zərfət kardedənıbe və ehanə çı dınyo koonku bəy qıləy çi rəseydəbe,şoyvonəti və xoşholəti kardedənıbe və boçəy çı dasto doey həm ğəmqin beydənıbe.ibrətış qəte və bəştə nəfsi ğalib omə çiş omute və  deçəy vəsilə deştə həvəson mıborizəş barde və deçəy koməki vositə çı şəytoniku bə diyəro mande....və bə ın cəhət be ki,bəy hikmət doey be”...

Peyğombəre-Əkrəmi(s) barzə səhobəonku bıə Səlman həm bənə Loğmani əməl kardedəbe və bə deştə nəfsi və həvaye-həvəson mıxolifəti və bə saxtiyon təhəmmul kardey və tov vardey xoto,jıqo qıləy ləyoğətış hestebe ki,bə İlahi məxsusə lutfi şomil be və Xıdovəndi çı hikməti çeşməonış çəy vucudədə bə cuş vardeşe.Səlman bə hikməti qıləy dərəcə rəse ki,Əmirəlmuminin Əli(ə) əvış bə loğmani təşbihış kardə və hamyəşe:bəxxin....bəh bəh bə Səlmani məğami.əv çəmə Əhli-Beytikuye.şımə komco bənə Səlmani vindedon ki,bənə həkimə Loğmaniye ki,əvvəl və oxonə elmi zıneydə .əv qıləy oxoş nıbə dıyoe”......