“Абдулла долларчи” пичоқланди

Самарқанд вилоятининг Пастдарғом туманида халқ орасида “Абдулла долларчи” деб ном чиқарган 34 ёшли тадбиркор пичоқлаб кетилди.

Гувоҳларнинг   айтишича,  кечаси номаълум шахслар тадбиркорни пичоқлаб, ёнидаги бир неча минг долларини ўғирлаб, ўзини олма боғига ташлаб кетишган. Пичоқланган тадбиркор Пастдарғом туман касалхонасига оғир аҳволда ётқизилди.

 - Пичоқлаб пулини олишган. Бир неча минг доллар пули йўқ. Ўзини олма боғга ташлаб кетишган. Ҳозир бу бўйича тергов бормоқда. Пичоқлаганлар қидирилмоқда, - деди Пастдарғом ҳуқуқ-тартибот идораларида ишловчи мулозим  .

Пастдарғом туманининг энг бой кишиларидан саналган Абдулла Орифжоновнинг бир неча дўкони бор, айни пайтда у долларфурушлик билан ҳам шуғулланган.

Ҳамқишлоқларининг айтишича, шунинг учун ҳам у туманда “Абдулла долларчи” деб ном чиқарган.

- Йирик миқдорда доллар алмаштирмоқчи бўлганлар Жума шаҳридаги унинг точкаларига боришарди. Майда-чуйда алмаштирмасди. Айтишларича, уни пулини олиш учун пичоқлашган. Сабаби, ёнида ҳамма вақт беш-ўн минг доллари бўларди уни, - дейди пичоқланган тадбиркорни яқиндан билган пастдарғомликлардан бири.