Ватанга қайтганларни фақат қамоқхона эмас, балки совға ҳам кутаркан...

Мирзиёев Германияда 11 йил ишлаб Ўзбекистонга қайтган фермерга "Каптива" совға қилди

Германияда 11 йил давомида чорвачилик бўйича ишлаган ва ўтган йили ватанига қайтган қорақалпоғистонлик Алишер Қурбановга президент Шавкат Мирзиёев "Каптива" машинасини совға қилган.

Маҳаллий нашрларнинг хабар қилишича, Мирзиёев Қорақалпоғистонга ташрифи давомида Хўжайли туманида барпо этилаётган замонавий логистика марказида бўлган ҳамда "Panaev Farms" фермер хўжалиги раҳбари Қутлимурат Панаев билан суҳбатлашган.

Суҳбат давомида Панаев Германияда 11 йил давомида чорвачилик бўйича ишлаган Алишер Қурбановни Қорақалпоғистонга қайтариб, унга барча имкониятларни яратиб бергани ва у бугунги кунда фермада менежер лавозимида ишлаётганини билдирган.

"Шавкат Мирзиёев Алишер Қурбановга юртимизга қайтиб ишлаётгани учун Каптива автомашинасини совға қилди", дейилади хабарда.

Ўзбекистон раҳбари хорижда ишлаётган юртдошларини ватанга қайтиб, юрт равнақига хисса қўшишга даъват этиб келади.

Ҳозирда чет давлатларда ишлаётган ўзбекистонликлар сони бир неча миллионни ташкил этиши айтилади.