Ўзбекистон ташқи ишлар вазири UNWTO бош котиби билан учрашди

27 август куни Ўзбекистон Республикаси Ташқи ишлар вазири Абдулазиз Комилов UNWTO бошҳ котиби Талеб Рифаи билан учрашди.

Кун.ўз сайтининг хабар беришича, Абдулазиз Комилов Самарқанд шаҳрида бўлиб ўтадиган “Марказий Осиё уйғониш даврининг дунё тамаддуни тарихидаги ўрни” номли халқаро конференцияда иштирок этиш учун Ўзбекистонга  ташриф буюрган БМТ Бутунжаҳон сайёҳлик ташкилотининг (UNWTO) Бош котиби Талеб Рифаи билан учрашди. Бу ҳақида ТИВ матбуот хизматида хабар берилди. 

Учрашувда Ўзбекистон билан UNWTO ўртасидаги муносабатларнинг ҳозирги ҳолати ва уларни чуқурлаштириш истиқболлари юзасидан фикр алмашилди. Мамлакатимиз мазкур ташкилот фаолиятида 1993 йилдан буён иштирок этади.

Ўзбекистоннинг ташаббусига кўра, UNWTO доирасида минтақамизда туризм ривожланишини рағбатлантирган қатор ҳужжатлар – «Буюк ипак йўлида туризмни ривожлантириш тўғрисида Самарқанд декларацияси» (1995 йил), «Туризм ва маданий меросни сақлаб қолиш бўйича Хива декларацияси» (1999 йил), «Ипак йўли бўйлаб туризм бўйича Бухоро декларацияси» (2002 йил) қабул қилинган.

Учрашувда ўзбек халқининг бой тарихий, меъморий, маданий мероси асосида ҳамкорликнинг мавжуд салоҳиятларини босқичма-босқич амалга оширишга икки томонда ҳам қизиқиш борлиги қайд этилди.