Шавкат Мирзиёевнинг Бишкекка ташрифи якунланди

Қирғизистон президенти расмий сайтида Бишкек шаҳридаги «Манас» халқаро аэропортида мамлакат президенти ва унинг рафиқасини кузатиш вақтида олинган суратлар жойлаштирилган.

     Ўзбекистон президенти Шавкат Мирзиёев Қирғизистон Республикасига ташрифини якунлади. Ўзбекистон президентининг Бишкекка ташрифи 5 сентябрь куни бошланган эди. Ташрифнинг биринчи кунида Шавкат Мирзиёев қўшни давлат раҳбари Алмазбек Атамбаев билан учрашув ўтказди.

Музокараларда муҳокама қилинган асосий мавзулар чегара муаммоларини ҳал этиш ҳамда Қамбар ота ГЭСи қурилиши бўйича ҳамкорлик масалалари бўлди.

Ташрифнинг иккинчи кунида эса Шавкат Мирзиёев Қирғизистон сиёсий партиялари раҳбарлари билан учрашди, ўзи учун ажратилган қароргоҳда Қирғизистон Республикаси Жогоргу Кенешининг раиси Чинибай Турсунбековни ва Қирғизистон Республикаси Бош вазири Сапар Исаковни қабул қилди.