Тошкентдан Душанбега авиачипта нархи икки бараварга арзонлаштирилди
-
Тошкентдан Душанбега
ТОШКЕНТ, 13 окт — Sputnik. "Ўзбекистон ҳаво йўллари" миллий авиакомпанияси жорий йил 13 октябрдан Тошкент-Душанбе-Тошкент йўналишида авиачипталарнинг нархини арзонлаштирди. Бу ҳақда Sputnik Ўзбекистон мухбири авиаташувчи матбуот хизматига таянган ҳолда хабар қилди.
Шу тариқа Тошкентдан Душанбегача авиачиптанинг якуний нархи 75 евро ва Тошкент-Душанбе-Тошкент йўналишида авиачиптанинг умумий нархи 153 еврони (барча йиғимлар билан бирга) ташкил қилади. Шу ўринда Душанбедан Тошкентга 87 евро ва Тошкент-Душанбе-Тошкент чипта нархи 153 еврони ташкил этади.Миллий авиакомпания Ўзбекистон ҳудудида чипталар учун тўловлар сотиш кунида Марказий банк томонидан белгиланган курс бўйича миллий валютада тўланишини эслатиб ўтди.
Сўнгги вақтда мазкур йўналишда авиачипталарнинг арзонлашиши биринчи маротаба амалга оширилмаяпти. Жумладан, "Ўзбекистон ҳаво йўллари" 6 сентябр куни Душанбе-Тошкент йўналиши учун авиачипталар нархи 10 еврога камайтирган эди. Натижада чиптанинг умумий нархи 98 еврони ташкил қилган эди. Ўша пайтда авиакомпания вакиллари кўпроқ йўловчиларни жалб этиш мақсадида бу қарорга келинганлигини маълум қилишганди.
