Шавкат Мирзиёев БАА-нинг “Masdar City” технопаркига ташриф буюрди
Технопарк ҳудудига автомобиллар кириши тақиқланган. Манзилларга ҳайдовчисиз бошқариладиган электр транспортларида борилади.
Президент матбуот хизмати хабар беришича, Ўзбекистон президенти Шавкат Мирзиёев “Masdar City” технопаркига ташриф буюрди.
“Masdar City” замонавий технологиялар ва муҳандислик ютуқлари асосида бунёд этилган инновацион шаҳарчадир. 600 гектарни эгаллаган технопарк экологик тоза ҳудуд ҳисобланиб, бу ерда фақатгина муқобил энергия – қуёш батареялари ва фотоэлектр қурилмаларидан фойдаланилади. Ҳудудга автомобиллар кириши тақиқланган. Манзилларга ҳайдовчисиз бошқариладиган электр транспортларида борилади.
Шавкат Мирзиёев қуёш панеллари ишлаб чиқариш бўйича илмий изланишлар олиб бориладиган лаборатория фаолияти билан танишди. Бундай масканлар фан-техника ютуқларидан унумли фойдаланган ҳолда инсониятнинг атроф-муҳитга таъсирини камайтириш, мамлакатлар ўртасида илмий ҳамкорликни мустаҳкамлашда муҳим ўрин тутиши қайд этилди.
Давлати раҳбари Халифа университетида мазкур соҳада илмий изланиш олиб бораётган ўзбекистонлик талаба қиз билан суҳбатлашди. Бу ерда олган билим ва тажрибаларини Ўзбекистонда татбиқ этиб, мамлакатда муқобил энергетикани ривожлантиришга ҳисса қўшиш муҳимлигини таъкидлади.
