Ўзбекистон Хитойга газ етказиб бериш ҳажмини кескин камайтирди
-
Ўзбекистон Хитойга газ етказиб бериш ҳажмини кескин камайтирди
Хитойга етказилаётган ўзбек гази қиймат кўрсаткичида 60 фоизга камайди. Бунга сабаб сифатида ички эҳтиёжларнинг ортиши кўрсатилмоқда.
2023 йил январь-май ойларида Ўзбекистон Хитойга табиий газ етказиб бериш ҳажмини қиймат жиҳатидан сезиларли даражада қисқартирди.
Ўзбек газининг экспорти 60,71 фоизга камайиб, 118,63 миллион долларни ташкил қилган. Газ таъминотининг физик ҳажми кўрсатилмаган.
Сўнгги йилларда Ўзбекистон ички бозорда талаб ортиб бораётганлиги сабабли хорижга табиий газ сотишни жиддий қисқартирди. 2020 йилда Россияга экспорт бутунлай тўхтатилди ва Хитойга етказиб бериш ҳажми уч бараварга қисқарди. Бир йил аввал Россия 6,8 миллиард куб метр ўзбек газини сотиб олган ва харид қилиш бўйича (5,1 миллиард) Хитойдан ўзиб кетган эди.
Ҳозир Ўзбекистон газ импортини оширмоқда. Хусусан, 16 июнь куни Россиянинг «Газпром» компанияси билан йилига 2,8 миллиард куб метр газ етказиб бериш бўйича икки йиллик шартнома имзоланди.
Шу билан бирга, қозоқ газининг Хитойга экспорти эса 25,4 фоизга камайиб, 300,13 миллион долларни ташкил қилган. Туркманистондан газ экспорти қарийб 13,5 фоизга ошиб, 4,25 миллиард долларни ташкил этган. Натижада, бу мамлакат Хитойга газ етказиб берувчилар орасида биринчи ўринга кўтарилган. Иккинчи ўринда Хитойга 2,81 миллиард долларлик газ етказган Россия жойлашган бўлиб, йиллик ўсиш 2,12 баробар кўп.
