Самарқандда чўлланишга қарши кураш бўйича БМТ конференцияси бўлиб ўтади

Жорий йилнинг 13-17 ноябрь кунлари Самарқанд шаҳридаги “Ипак йўли" конгресс-холлда БМТ Конвенцияси (CRIC 21) ижросини кўриб чиқиш қўмитасининг 21-сессияси бўлиб ўтади.

Бу хақда Ўзбекистон Экология, атроф-муҳитни муҳофаза қилиш ва иқлим ўзгариши вазирлиги хабар берди.

Тадбир доирасида Африка, Осиё, Лотин Америкаси ва Кариб ҳавзаси, Шимолий Ўртаер денгизи, Марказий ва Шарқий Европа учун конвенцияни амалга ошириш бўйича иштирокчи давлатлар ўртасида маслаҳатлашувлар ўтказилади.

CRIC 21 давомида томонлар Бирлашган Миллатлар Ташкилотининг Чўлланишга қарши кураш тўғрисидаги конвенциясининг (UNCCD) 2018-2030 йилларга мўлжалланган Стратегия асосларини кўриб чиқадилар.

Шунингдек, конференцияда ернинг деградациясига бетарафлик мақсадларини белгилаш борасида ихтиёрий саъй-ҳаракатларини қўллаб-қувватлаш бўйича аниқ тадбирлар ҳақида маълумот берилади.

Бундан ташқари, қурғоқчиликни самарали бошқариш сиёсати ва уни амалга ошириш бўйича ҳукуматлараро ишчи гуруҳи CRIC 21 доирасида ўз тараққиёт ҳисоботини тақдим этади.

Маълумот учун, мазкур тадбир Ўзбекистон ҳукумати томонидан CRIC 21 ҳомийлигида ташкил этилади.