Брукингс тадқиқот маркази: Эронга қарши янги санкциялар намойишдан иборат

Брукингс тадқиқот марказининг катта эксперти АҚШнинг Эронга қарши иқтисодий босимни кучайтириш режасига ишора қилиб, кутилганидек, бу режа шов-шувли ташвиқот кампаниясидан бошқа нарса эмаслигини айтди.

Порс Тудейнинг хабар беришича, Брукингс тадқиқот маркази таҳлилчиси Сюзан Малони Х ижтимоий тармоғида қолдирган постида АҚШ Молия вазири Скотт Бессентнинг Эронга қарши «мисли кўрилмаган» иқтисодий кампания ҳақидаги баёнотларини намойишкорона ҳаракат деб баҳолади.

У бу ҳақда шундай деди: «Башорат қилиш мумкин бўлганидек, Скотт Бессент томонидан иқтисодий “D куни” деб аталган тадбирни бошлаш — барчаси шов-шув ва ташвиқотдан иборат».

«D куни» АҚШда урушда йирик ҳужумкор операция бошланишини англатувчи ҳарбий атамадир.

Трамп ўтган ҳафта АҚШнинг ҳарбий тўқнашувдан иқтисодий босимга ўтишини таъкидлаб, Эронга қарши кенг кўламли иқтисодий кампания ўтказиш нияти борлигини даъво қилган эди. Бироқ бу даъвони ҳозиргача бир қатор ғарблик экспертлар шубҳа остига қўйган.

Брукингс тадқиқот маркази таҳлилчиси ҳам АҚШнинг даъволари пуч эканига ишора қилиб, Трамп маъмурияти АҚШ миллий хавфсизлиги манфаатлари ва Форс кўрфазидаги иттифоқчиларига етказилган улкан зарарни қоплаш бўйича аниқ амалий режага эга эмаслигини айтди. Унинг таъкидлашича, бу зарар «президентнинг Эронга қарши фалокатли уруши» туфайли юзага келган.