Երևանում Ոստիկանության Նոր Նորքի բաժնի մոտ 2 քաղաքացի սպառնում են նռնակներ պայթեցնել
Այս պահին լարված ու պայթյունավտանգ իրավիճակ է ստեղծվել Երևանում։
Երեք քաղաքացի մարտի 24-ին, ժամը 17։00-ի սահմաններում, զինված փորձել են ներխուժել ՆԳՆ ոստիկանության Նոր Նորքի բաժնի վարչական շենք, գործադրել են նռնակ, ինչի հետևանքով ներխուժող անձանցից 2 հոգի վիրավորվել են և տեղափոխվել բուժհաստատություն։ Այս մասին հաղորդագրություն է տարածել Ներքին գործերի նախարարությունը։
«Մեկ հոգի այս պահին զինված շարունակում է մնալ Ոստիկանության բաժնի դիմաց։ Ձեռնարկվում են համապատասխան աշխատանքներ՝ նրան վնասազերծելու ուղղությամբ»,- ասված է հաղորդագրության մեջ։
Միջադեպի վերաբերյալ հաղորդագրություն է տարածել նաև Երևանի քաղաքապետարանը՝ նշելով, որ Նոր Նորքի ոստիկանության բաժանմունքի տարածքում տեղի ունեցած միջադեպից հետո «Շտապօգնություն» ՓԲԸ-ի բրիգադներից մեկը 2 քաղաքացու բեկորային վնասվածքներով տեղափոխել է բուժհաստատություն։
Արդեն մոտ 2 ժամ ոստիկանները բանակցում են եւ փորձում վնասազերծել նռնակով զինված տղամարդուն, որը ոստիկանության Նորք Նորքի բաժնում մուտքի մոտ կանգնած է նռնակը ձեռքին եւ սպառնում է պայթեցնել այն: Ինչ է պահանջում տղամարդը, այս պահին հայտնի չէ:
Նռնակով զինված տղամարդը պարբերաբար գոռալով ինչ-որ բան է ասում, որը չի հասկացվում:
Ոստիկանները քիչ առաջ շենքի մուտքի մոտից հեռացրել են լրագրողներին եւ օպերատորների եւ տեղափոխել նրանց շենքի կողային հատված, որտեղից շենքի մուտքն այլեւս տեսանելի չէ:
Դեպքի վայրում են բարձարստիճան ոստկանության աշխատակիցներ, ոստիկանության ուժեր՝ ՆԳՆ փոխնախարար, ոստիկանապետ Արամ Հովհաննիսյանի գլխավորությամբ: Դեպքի վայրում այս պահին մեծ թվով իրավապահներ են աշխատում, այդ թվում քննչական կոմիտեից:
Ազգային անվտանգության ծառայության աշխատակիցները Ոստիկանության Նոր Նորքի շենքի մոտ վնասազերծել և բերման են ենթարկել նռնակով զինված տղամարդուն։