Փնտրելու կարիք չկա, այդ մարդիկ Տավուշում սպասում են ձեզ. Գառնիկ Դանիելյանը՝ Ալեն Սիմոնյանին
ԱԺ «Հայաստան» խմբակցության պատգամավոր Գառնիկ Դանիելյանն արձագանքել է ԱԺ նախագահ Ալեն Սիմոնյանի՝ այսօր հնչեցրած հայտարարություններին։
«ԱԺ նախագահ Սիմոնյանը հայտարարել է, թե փնտրում է այն մարդկանց, որոնք կասեն, թե դրանք ՀՀ տարածք են:
Ըստ Ալեն Սիմոնյանի՝ ՀՀ-ն օկուպացրել է Ադրբեջանից տարածքներ, և Ադրբեջանը կարող է դրանք հետ վերցնելու պատրվակով ցանկացած պահի հարձակվել:
Սրանով լեգիտիմ հիմքեր են տալիս Ադրբեջանին՝ ՀՀ-ի վրա հարձակում գործելու համար:
ԱԺ նախագահը, փաստորեն, ՀՀ-ին համարում է ագրեսոր պետություն և, առանց որևէ դելիմիտացիոն և դեմարկացիոն գործընթացի, Փաշինյանի օրինակով հայտարարում, թե ՀՀ-ի այս կամ այն մասը պատկանում է Ադրբեջանին:
Հայաստանի առաջին դեմքերից մեկը ուղիղ ասում է Ադրբեջանին, որ Հայաստանի բանակը կանգնած է Ադրբեջանի տարածքում, և վերջինս հանգիստ կարող է մտնել ու գերեվարել հարյուրավոր սահմանապահ հայ զինվորների:
Ահա, թե ովքեր են իրականում պատերազմի կոչ անողները և պատերազմ բերողները:
Փնտրելու կարիք չկա. այդ մարդիկ Տավուշում են և սպասում են իրեն»,- գրել է Գառնիկ Դանիելյանը: