ՌԴ–ն Բաքվի և Երևանի միջև շփումների շարունակման կողմնակից է. Պեսկովը` Կիրանցի դեպքերի մասին
ՌԴ նախագահի մամուլի քարտուղարը հրաժարվել է մեկնաբանել Կիրանցում բողոքի ակցիա անող քաղաքացիներին զինվորականների միանալու լուրը։
. Ռուսաստանը հանդես է գալիս Բաքվի և Երևանի միջև շփումների շարունակման օգտին, դրանք անհրաժեշտ են վիճելի հարցերի լիարժեք լիցքաթափման և կարգավորման համար։ Այս մասին ասել է ՌԴ նախագահի մամուլի քարտուղար Դմիտրի Պեսկովը, հաղորդում է ՌԻԱ Նովոստին:
Ավելի վաղ «Տավուշը հանուն հայրենիքի» հասարակական նախաձեռնությունը հայտնել էր, որ պայմանագրային զինծառայողներ են միանում Կիրանցում բողոքի ակցիային, որի մասնակիցները պահանջում են դադարեցնել Ադրբեջանի հետ սահմանագծման գործընթացը և մի շարք սահմանամերձ տարածքներ ադրբեջանական կողմին հանձնելը:
«Մենք չէինք ցանկանա դա մեկնաբանել։ Դուք գիտեք, որ մենք կողմ ենք Բաքվի և Երևանի միջև շփումների շարունակմանը։ Մենք կարծում ենք, որ դրանք անհրաժեշտ են ընդհանուր լիցքաթափման և բոլոր վիճելի հարցերի վերջնական կարգավորման համար, որոնք դրված են օրակարգում, որպեսզի շուտափույթ դուրս գանք խաղաղության պայմանագրի ստորագրմանը»,– ասել է Պեսկովը՝ պատասխանելով լրագրողների խնդրանքին՝ մեկնաբանել Կիրանցում Ադրբեջանի հետ սահմանի սահմանազատման դեմ ակցիային պայմանագրային զինծառայողների միանալու մասին տեղեկատվությունը:
Հավելենք, որ ՀՀ ՔԿ–ն արդեն այս դեպքի առթիվ քրեական վարույթ է նախաձեռնել` կից հրապարակելով տեսանյութ, որում զինծառայողներից 2–ը վստահեցնում են, որ ցուցարարների մոտ գնացել են պահի ազդեցության տակ, ինչի համար զղջում են, ու խնդրում են այդ ամենը չքաղաքականացնել։
Հիշեցնենք` Հայաստանի և Ադրբեջանի սահմանազատման հարցերով հանձնաժողովներն ապրիլի 19-ին պայմանավորվել են սահմանազատումը սկսել Տավուշի մարզից։ Սահմանագծի տվյալ հատվածների նկարագրությունը կազմվելու է` հաշվի առնելով տեղանքում գեոդեզիական չափումների արդյունքում կատարված կոորդինատների հստակեցումը, որը պետք է ավարտվի մինչև 2024 թ. մայիսի 15-ը:
ՀՀ վարչապետի աշխատակազմը հայտարարել է, որ Ադրբեջանն այս ամենի արդյունքում 2.5 գյուղ է ստանում, իսկ Հայաստանի Հանրապետությունը` անվտանգային ռիսկերի նվազեցում։ Կիրանց գյուղի հատվածում ճանապարհի մի քանի հարյուր մետրանոց հատվածի փոփոխություն կարվի, իսկ Ոսկեպարը ճանապարհի խնդիր չի ունենա։ Սահմանազատումից հետո չորս գյուղերի հատվածում զինված ուժերը հետ կքաշվեն և իրենց տեղը կզիջեն սահմանապահ զորքերին:
Տավուշի սահմանամերձ գյուղերի բնակիչներն ապրիլի 19-ից բողոքի ակցիաներ են անում Հայաստան-Վրաստան միջպետական ճանապարհին: Նրանք դեմ են սահմանազատման այն տարբերակին, որը համաձայնեցրել են Երևանն ու Բաքուն։