Լաչինում հանդիպել են Հայաստանի ու Ադրբեջանի էներգետիկ համակարգերի ներկայացուցիչները
ՀՀ տարածքային կառավարման և ենթակառուցվածքների նախարարության և հայկական «Էլեկտրաէներգետիկական համակարգի օպերատոր» ընկերության, ինչպես նաև Ադրբեջանի էներգետիկայի նախարարության և ադրբեջանական «Ազերէներջի» ընկերության ներկայացուցիչները հանդիպել են։
Այս մասին հայտնում է ՀՀ տարածքային կառավարման և ենթակառուցվածքների նախարարությունը։
Նշվում է, որ հանդիպումը տեղի է ունեցել Լաչինում (հայկական Բերձոր –խմբ.)։
«Հանդիպման ընթացքում կողմերը քննարկել են 2 երկրի միջև էլեկտրաէներգիայի ներմուծման և արտահանման հնարավորությունները։ Խոսվել է նաև երկու պետությունների էներգետիկ ենթակառուցվածքները պետական սահմանին փոխկապակցելու հնարավոր տարբերակների մասին»,– ասված է հաղորդագրությունում։
Հիշեցնենք, որ օգոստոսի 13-ին ՀՀ վարչապետ Նիկոլ Փաշինյանը կառավարության նիստից հետո հաստատեց, որ ադրբեջանցի մասնագետները էներգետիկ ոլորտում վերլուծություն են կատարել Հայաստանի տարածքում։ Մինչ այդ այդ մասին հայտնել էր նաև Ադրբեջանի նախագահ Իլհամ Ալիևը` անդրադառնալով TRIPP-ի շրջանակում էներգետիկ ոլորտին։ Այդ վերլուծության ժամանակ որոշվել են այն վայրերը, որտեղ կարող են տեղադրվել էլեկտրահաղորդման գծերի հենարանները։
Փաշինյանը նաև ընդգծեց, որ ՀՀ–ն կարող է էլեկտրաէներգիայի լրացուցիչ պահանջարկ ունենալ, քանի որ մեծ տեմպերով զարգանում են արհեստական բանականության գործարանները, որոնք սպառում են էլեկտրաէներգիայի ծավալներ։
