Զարիֆ. Իրանի համար կարևոր է Միացյալ Նահանգների քաղաքականությունը, ոչ թե թեկնածուների խոստումներն ու կարգախոսները
«Իրանի Իսլամական Հանրապետության համար կարևոր է ընտրություններից հետո Սպիտակ տան քաղաքականությունը, ոչ թե այն, ինչ խոստանում են նախագահի թեկնածուները», - ասել է Իրանի արտգործնախարար Մոհամադ Ջավադ Զարիֆը:
CBS News- ին տված հարցազրույցում, Զարիֆը հայտարարել է, որ Իրանի կառավարությունը չի նախընտրում ոչ Դոնալդ Թրամփին, ոչ էլ Ջո Բայդենին: Նա նշել է. «Եթե Միացյալ Նահանգները որոշի դադարեցնել Իրանի դեմ ուղղված իր ապակառուցողական քաղաքականությունը, իրավիճակը կփոխվի, անկախ նրանից, թե ով մուտք կգործի Սպիտակ տուն»:
Իրանի արտգործնախարարը շեշտել է, որ Թեհրանն ԱՄՆ-ի հետ չի բանակցելու ՀԳՀԾ-ի շուրջ, հավելելով. «Կարող ենք շփման նոր եզրեր փնտրել, սակայն դա չի նշանակելու նոր բանակցություններ: Դա նշանակելու է, որ ԱՄՆ-ն պետք է վերադառնա բանակցությունների սեղանին»:
ԱՄՆ-ի կառավարության կողմից սահմանված հակաիրանական պատժամիջոցների կապակցությամբ Զարիֆն ասել է. «Պատժամիջոցները վնասեցին Իրանին, սակայն չառաջացրին այն քաղաքական փոփոխությունը, որը ցանկանում էր ԱՄՆ-ն»:
Իրանի արտաքին գործերի նախարարը հայտարարել է, որ Ջո Բայդենը գիտի, որ եթե հաղթի ընտրություններում, Իրանը ՀԳՀԾ-ի շուրջ չի բանակցելու Վաշինգտոնի հետ:
Հարցազրույցի մեկ այլ հատվածում Մոհամմադ Ջավադ Զարիֆն ասել է. «Թրամփը միակ անձն է, ով վիրավորական հայտարարություններ է անում ԱՄՆ-ի ընտրական համակարգի վերաբերյալ»: