Իրանը վճռական է 20 հազար մեգավատտ միջուկային էներգիա արտադրելու հարցում
Իրանի Ատոմային էներգիայի կազմակերպության ղեկավարն ասել է. «Իրանի Իսլամական Հանրապետությունը, իր ազգային զարգացման ռազմավարական ծրագրի շրջանակում, վճռական է մինչև 2040 թվականը, երկրի էներգետիկ պորտֆելում միջուկային էներգիայի մասնաբաժինը հասցնել 20000 մեգավատտի»:
Մոհամմադ Էսլամին երկուշաբթի օրը Վիեննայում Ատոմային էներգիայի միջազգային գործակալության գլխավոր կոնֆերանսի 67-րդ ամենամյա նստաշրջանում ունեցած ելույթում հավելել է,-«Չնայած ճնշող պատժամիջոցներին, Իրանի Իսլամական Հանրապետությունը, մարդկանց կյանքի որակը բարելավելու նպատակով, իր օրակարգում է ներառել հետազոտական ռեակտորների, արագացուցիչների ու ճառագայթման համակարգերի նախագծումն ու կառուցումը, և առողջապահության, գյուղատնտեսության, շրջակա միջավայրի ու արդյունաբերության ոլորտներում ռադիոիզոտոպների արտադրությունն ու կիրառումը»:
Իրանի Իսլամական Հանրապետության փոխնախագահը նշել է,-« Իրանի Իսլամական Հանրապետությունը, որպես Մերձավոր Արևելքում միջուկային զենքից զերծ տարածաշրջան ստեղծելու ծրագրի նախաձեռնող, ևս մեկ անգամ իր լուրջ մտահոգությունն է հայտնում Սիոնիստական ռեժիմի գաղտնի միջուկային ռազմական ծրագրի վերաբերյալ»:
Իրանի Ատոմային էներգիայի կազմակերպության ղեկավարը հավելել է. «Ցավոք, Սիոնիստական ռեժիմը, հրաժարվելով NPT-ին միանալուց, իր միջուկային օբյեկտներն ու գործունեությունը չի դրել վերահսկողության տակ և այն համարվում է մշտական սպառնալիք միջազգային խաղաղության և անվտանգության համար»:
