Իրանի ԱԳ նախարարի ուղերձը Մինայի ողբերգության տարելիցի առիթով
Մինայի ողբերգության տարելիցի առիթով հղած ուղերձում, Իրանի իսլամական հանրապետության արտաքին գերատեսչության ղեկավարն ընդգծել է, որ արտգործնախարարությունը լրջորեն հետամուտ է անցած տարի Մինայի հովտում տեղի ունեցած ողբերգության հարցին՝ մինչև զոհերի ու վիրավորների իրավունքների վերականգնումը:
Կիրակի օրը, Մինայի ողբերգության տարելիցի առիթով հղած ուղերձում, Մուհամմեդ Ջավադ Զարիֆը հայտարարել է, որ մինչև այդ դեպքի նահատակների ու վիրավորների իրավունքների վերականգնումը, արտգործնախարարության օրակարգում է մնալու Մինայի ողբերգության հարցը և անտարակույս ապագայում Սաուդյան վարչակազմի հետ վերաբերվելու կարևորագույն և ազդեցիկ գործոններից մեկն է լինելու:
Անցյալ տարի, Սաուդյան վարչակազմի սխալ կառավարման պատճառով, զոհվեցին Աստծո տան հազարավոր մուսուլման ուխտավորներ:
Այդ ուղերձում, հարգելով Մինայի ողբերգության հազարավոր զոհերի հիշատակը, Զարիֆը հավաստիացրել է, թե վերջին տարիների ընթացքում, Բեյթոլլահ Ալ-Հարամ մզկիթի ուխտավորների համար տեղի ունեցած աղետները վկայում են այն մասին, որ Սաուդյան վարչակազմի իշխանավորներն իսլամական սրբավայրերը շահագործում են իրենց թշնամական քաղաքականությունների և կայսերապաշտության ու սիոնիզմի նկրտումների իրագործման ուղղությամբ:
«Ցավոք Թեհրանում Սաուդյան Արաբիայի դեսպանատան վրա կատարված հարձակման սխալ դեպքից հետո, Ռիադն այդ միջադեպը պատրվակ ծառայեցնելով, փակել է հարցի հետաքննման բոլոր երկկողմ առիթները և չի պատասխանել Իրանի նախաձեռնություններից և ոչ մեկին, այդ թվում «իսլամական միջազգային փաստահավաք կոմիտե» ստեղծելու առաջարկությանը»,-ասել է Իրանի արտգործնախարար՝ Մոհամմեդ Ջավադ Զարիֆը:
