Ըմբշամարտի համաշխարհային միությունը հարգել է Իրանի որոշումը
Ըմբշամարտի համաշխարհային միության նախագահը արձագանքելով ամերիկացի ըմբիշների մուտքն Իրան արգելող Թեհրանի որոշմանը, հայտարարել է. «Ընդունված որոշումը հարգելի է»:
Նենադ Լալովիչը միևնույն ժամանակ հույս է հայտնել, որ մոտ ապագայում իրանցի ու ամերիկացի ըմբիշները կմրցեն միմյանց հետ:
Իրանի ըմբշամարտի ֆեդերացիան մի նամակ հղելով Ըմբշամարտի համաշխարհային միությանը պահանջել է Քերմանշահում նախատեսված ազատ ոճի ըմբշամարտի միջազգային գավաթի մրցաշարին մասնակցող ԱՄՆ-ի հավաքականին փոխարինել այլ խմբով:
Իրանի ԱԳ նախարարության խոսնակ Բահրամ Ղասեմին ուրբաթ օրն ասել է, որ նկատի առնելով ԱՄՆ-ի նոր կառավարության որդեգրած քաղաքականությունը, Իրանի ԱԳ նախարարությունը հայտնվել է այնպիսի պայմաններում, որ պարտավորված հակառակել է ԱՄՆ-ի ըմբշամարտի հավաքականի Իրան կատարելիք ուղևորությանը:
ԱՄՆ նախագահ Դոնալդ Թրամփն անցած շաբաթ երեք ամսով արգելել է իսլամական յոթ երկրների, այդ թվում Իրանի քաղաքացիների մուտքն ԱՄՆ:
Ազատ ոճի ըմբշամարտի միջազգային գավաթի մրցաշարը տեղի կունենա փետրվարի 16-ին և 17-ին` Իրանի արևմտյան Քերմանշահ նահանգում:
