Ալ Քազեմի. Իրաքն այլ երկրների վրա հարձակվելու հենակետ չի դառնա
«Մենք երբեք թույլ չենք տա, որ Իրաքի տարածքը դառնա հենակետ՝ այլ երկրների դեմ հարձակում իրականացնելու համար», - ասել է Իրաքի նոր վարչապետը:
Հինգշաբթի առավոտյան, նոր կառավարության հանդեպ վստահության վերաբերյալ քվեարկությունից առաջ ունեցած ելույթում, Մուստաֆա ալ Քազեմին հայտարարել է, որ իր կառավարության ամենակարևոր առաքելությունն է՝ ճանապարհ հարթել արտահերթ և առողջ ընտրությունների համար: Նա հավելել է. «Ընտրություններից առաջ և Սահմանադրության համաձայն, Իրաքի ազգային ինքնիշխանությունը պետք է ապահովվի երկրի ամբողջ տարածքում»:
Իրաքի վարչապետը նշել է, որ կորոնավիրուսի հետևանքով առաջացած առողջապահական ու տնտեսական ճգնաժամի լուծումը նոր կառավարության ամենակարևոր պարտականություններից մեկն է, հավելելով, որ իր կառավարությունը խնդիրների լուծման ուղին է:
Քվեարկությունից առաջ, Մուստաֆա ալ Քազեմին ներկայացրել է ութ կետից բաղկացած իր կառավարության ծրագրի փաստաթուղթը: Ներկայացված ութ կետերը վերաբերում են անվտանգության կազմակերպությունների արդիականացմանը, տնտեսական խնդիրների լուծմանը, կոռուպցիայի դեմ պայքարին և այլ հարցերի:
Այսօր առավոտյան, Իրաքի խորհրդարանում մեծամասնության ձայները ստանալուց հետո, Մուստաֆա Ալ Քազեմին պաշտոնապես ստանձնել է վարչապետի պաշտոնը:
