Սանաան արձագանքել է Եմենի վերաբերյալ Անվտանգության խորհրդի հայտարարությանը
Եմենի գերագույն քաղաքական խորհրդի անդամն ի պատասխան ՄԱԿ-ի Անվտանգության խորհրդի հրապարակած հաղորդագրության, հայտարարել է, որ կազմակերպությունը պատասխանատու է Եմենի ժողովրդի՝ վեց տարի անընդմեջ շարունակվող տառապանքների համար:
«Ֆարս» լրատվական գործակալության հաղորդման համաձայն, Եմենի ազգային փրկության կառավարության գերագույն քաղաքական խորհրդի անդամ Մուհամմադ Ալի ալ-Հութին, ուրբաթ օրը Թվիթերի իր միկրոբլոգում գրել է. «Մենք սպասում էինք Անվտանգության խորհրդի նման հայտարարությանը և դա վկայում է խորհրդում սկզբունքների ու ազնիվ մոտեցման բացակայության մասին»:
Ալ-Հութին հավելել է, որ ԱԽ-ն չպետք է նման թույլ գործունեություն ծավալի և որ խորհուրդը Սաուդյան Արաբիայի դաշնակիցն է:
ՄԱԿ-ի Անվտանգության խորհուրդը տարածել է հայտարարություն, որում, անտեսելով Եմենի դեմ սաուդյան կոալիցիայի ագրեսիան, դատապարտել է այդ երկրի կառավարության հարձակումները Սաուդյան Արաբիայի վրա և անհանգստություն հայտնել Եմենի այլ շրջաններում ռազմական զարգացումների վերաբերյալ:
Սաուդյան Արաբիան, Միացյալ Նահանգների, Արաբական Միացյալ Էմիրությունների և մի շարք այլ երկրների աջակցությամբ, 2015 թ. մարտից ռազմական գործողություններ է սկսել Եմենի դեմ, ցամաքային, ծովային և օդային շրջափակման ենմթարկելով այդ երկրին, սպանելով ավելի քան 16 հազար և վիրավորելով տասնյակ հազարավոր եմենցիների:
