Հունիս 23, 2024 09:20 Asia/Tehran
  • ՌԴ–ն ամեն ինչ կանի Կիևի քայլերը կանխելու համար. ԱԳՆ-ն՝ Էներգոդարի վրա հարձակումների մասին

Զապորոժիեի ԱԷԿ-ի և ՌԴ այլ էներգաօբյեկտների վրա Կիևի ռեժիմի հարձակումների համակարգվածությունը ցույց է տալիս Ռուսաստանի տնտեսությանն անընդունելի վնաս հասցնելու և տեխնածին վթարների ռիսկեր ստեղծելու կուրսը, նշել են ՌԴ ԱԳՆ-ում:

Ռուսաստանն ամեն ինչ կանի Ուկրաինային Էներգոդարի վրա անօդաչու թռչող սարքերի հարձակումների ու նման հարվածներ հասցնելու հնարավորությունից զրկելու համար։ Այս մասին ասվում է ՌԴ ԱԳՆ պաշտոնական ներկայացուցիչ Մարիա Զախարովայի մեկնաբանության մեջ, որը հրապարակվել է գերատեսչության կայքում։

Ավելի վաղ հայտնի էր դարձել, որ հունիսի 21-ի երեկոյան Ուկրաինայի զինված ուժերը դրոնով հարվածել են Էներգոդարը մատակարարող միակ «Ռադուգա» ենթակայանին, վնասվել է տրանսֆորմատորը: Քաղաքի հիմնական մասը մնացել է առանց լույսի և ջրի։ Հարձակման հետևանքները վերացվել են հունիսի 22-ի կեսօրից հետո։ Մինչ այդ Ուկրաինայի զինված ուժերը անօդաչու թռչող սարքերով ամբողջությամբ ոչնչացրել էին «Լուչ» ենթակայանը։

«Հաշվի առնելով Զելենսկու ռեժիմի՝ բանակցություններ վարելու լիակատար անկարողությունը, մեր երկիրը կձեռնարկի բոլոր անհրաժեշտ միջոցները, որպեսզի զրկի Կիևի ռեժիմին նմանատիպ հարվածներ հասցնելու հնարավորությունից», – ասվում է Զախարովայի մեկնաբանության մեջ։

Նշվում է, որ Զապորոժիեի ԱԷԿ-ի և ՌԴ այլ էներգաօբյեկտների վրա Կիևի ռեժիմի հարձակումների համակարգվածությունը ցույց է տալիս Ռուսաստանի տնտեսությանն անընդունելի վնաս հասցնելու և տեխնածին վթարների ռիսկեր ստեղծելու ուղղությունը, որոնք կարող են հարվածի տակ դնել ամբողջ եվրոպական մայրցամաքի միջուկային անվտանգությունը:

«Ստիպված ենք արձանագրել, որ Զապորոժիեի ԱԷԿ-ի աշխատակիցներն ու նրանց ընտանիքների անդամները, այդ թվում՝ երեխաները, շարունակում են Ուկրաինայի հատուկ ծառայություններից ստանալ կյանքին ու առողջությանը սպառնացող հաղորդագրություններ։ Եվ, ըստ ամենայնի, Կիևի ռեժիմը մտադիր չէ հրաժարվել կայանի անձնակազմին սպառիչ շանտաժի միջոցով վախեցնելու և հոգեբանական ուժեղ ճնշում գործադրելու իր նախաձեռնած քաղաքականությունից», – նշել է Զախարովան իր մեկնաբանության մեջ։

Հիշեցնենք, որ Զապորոժիեի ԱԷԿ-ը գտնվում է Դնեպրի ձախ ափին՝ Էներգոդար քաղաքի մոտ։ Սա ամենամեծն է Եվրոպայում բլոկների և տեղադրված հզորության քանակով. կայանում կա վեց էներգաբլոկ՝ յուրաքանչյուրը 1 գիգավատ հզորությամբ։ 2022-ի հոկտեմբերին ատոմակայանն անցել է ՌԴ-ին։

Sputnik